Ru wamá arigei furendei wamaamuga
1. Ka uagu hénrengutima lubéi lichugúniwa arigei lun sun le ariñawagúbei lidan burí adamurini lánina distritu?
1 Málübei burí adamurini distritu lánina irumu 2013 agumesera. Adügǘwaali saragu áfaaguni lun laransehóun aban programa le gayarabei líchuguni le hemegeirubei gürigia lídangiñetiña sun ubóu houn lun buidu lan hamadagua luma Bungiu. Adügaadün san aransehani lun meferidirun humá ni aban weyu? Lidan burí adamurini wéiriti, gíbetimati katei le adügübei lun hénrengutima lan woun wetenirun lun programa. Kei migifetima lubéi burí sesióun lidan adamurini sügǘ luéi lidan adamuridaguni, gíbetimati dan wemegeirun lun wetenirun lun programa. Libe-agei giñe dan bucharuaraütiwa ladüga waweiyasuhan o ladüga amu burí resun. Kaba íderaguawa lun agagudúañu wamá lun wíchugun arigei furendei wamaamuga? (2 Lur. 31:12.)
2. Ka lunbei hadügüni lun aransereina humanu hanigi lubá adamurini?
2 Lubaragiñe adamurini. Lidan wani páhina lánina Internet www.jw.org/es, hadarirubei programa lánina adamurini lau burí liri yanu luma aban o bián bérusu súdiniti lun kada yanu. Anhein anihein lubéi Internet huma, líderagubadün hakutihani ariñahani le lun haranserunu hanigi lubá adamurini (Esü. 7:10). Háfuga gayarabei hayusuruni Guñoun lánina Áhuduraguni lidan Familia lun hasaminarun sun lílana familia luagu le lunbei hafurendeiruni lidan adamurini.
3. Kaba íderaguaün lúntima híchugun arigei lun sun le lunbei lariñawagún lidan adamurini?
3 Lidan adamurini. Anhein gayara lubéi, heiba tidan kumú lubaragiñe lagumeserun programa lánina adamurini. Ñegú huméi giñe higagamurun meberesehan láamugaün ladüga labürühóun o laguarún hun o luéi busén humá habürühan houn amu lídangiñe danme gumeseeli programa. Anhein mosu lubéi hígiruni beñu, seti huméi lun meberesehan lani haganbun amu anhein aguarúa hun. Anhein hayusuruba lubéi aban konputadora fadatu (tableta electrónica) áfaagua humá lun meberesehan lani hetenirun amu lun programa. Meiga humá matun huguyame furesigu o katei líbeina lira lidan aniha lan programa (Apur. 3:1). Kipu huméi harihin luagun íchuguti yanu ani áluaha huméi bérusu burí le líridubei tidan hibibülian. Buídubei giñe lun habürüdün somu puntu súdiniti.
4. Ka gayarabei hadügüni agübürigu lun híderaguniña harahüñü íchiga arigei lun hafurendeirun?
4 Busentiwa híchugun irahüñü arigei lun hafurendeirun. Ariñagati Ariñawagúni 29:15: “Isaanigu ha wéiriyati hínsiñegu rútiña busiganu tun háguchu”. Ligía buidu lubéi hañuurun irahüñü hama hagübürigu, hagíaba etenira lun híchugun arigei lun programa lubaragiñe herederun ayanuha, abürüha luéigiñe gágamuru o asariñaha. Íbini houn irahüñü ha ñǘbüritimagiñabaña gayarati larufudahóun houn lun marumugun hamá ani redei hagíame maniñu, íbini ua lan gunfuranda hamani sun le ariñawagúbei.
5. Ka uagu buidu lubéi wáguyuguagüdüni le ariñawagúbei lidan programa, ani ida luba wadügüni?
5 Lárigiñe programa. Marumuga humá tarü. Houcha huguyame lun harumugun buidu. Yusu humá fiú minutu lun háguyuguagüdüni úara hama hufamilian le furendei humaalibei weyu ligía, luéi habulieiduni lau lóufudagun. Anhein háfuriduba lubéi eiga hama humadagu tidan somu éigagülei, ka uagu mayanuhan hubéi luagu aban o biama puntu le hínsiñetimabei hun lídangiñe programa? Gayarati hayusuruni le habürüdübei. Líteme, danme háhuduragun lidan familia akutiha huméi úara ida luba lan gayara lan hafalaruni adundehani ligía lidan hibagari. Gayarabei giñe hayusurun fiú minutu sagü dimaasu lun hakutihan somu fánreinti tídangiñe iseri burí agumeiraguagüdüni.
6. Ka uagu ua lubéi buídurügü lan wachülürün lidoun adamurini?
6 Mesiriwínbei woun lun ni kata woudin eiga lidan aban adineruni anhein masandi wabalin lisemén éigini ligía. Gayarati giñe lariñawagún ligiaméme luagu ariñahani tídangiñeti Bíbülia le ichugúbei lidan adamurini distritu le ítarabei woun kei éigini semeeti. Lun wasagarun buiti lídangiñe, áfaagua wamá lun meferidirun wamá ni aban sesióun, ru wagíame arigei lun sun le ariñawagúbei lidan ani falá wameime le wafurendeirubei lidan wabagari.