“Óundaraguabaña lílana fulasu”
1. Ka idan genegegua lan adamurini distritu, adamurini houn lílana ámuñegueinarügü ageiraü luma adamurini mabulieidúati le meha hadügübei ísüraelina lárigiñebei háfuridun Ehiptugiñe?
1 Fiu dan lárigiñe háfuridun ísüraelina Ehiptugiñe, ariñagati Heowá lun Moisesi lun lóundaraguniña gürigia luagu wübü Sinaí aganba hamaamugei Lererun, furendei hamaamuga arufuda inebesei lun luma lun harufudahani Lémeri houn hasaanigu (2 Lur. 4:10-13). Chóuruti adüga lan ókaasion mabulieidúati ligía lun lederebugudun hafiñen. Hóundaraguba giñe lubúeingu Heowá lun ladundehaniña lidan burí adamurini distritu luma adamurini houn lílana ámuñegueinarügü ageiraü le lunbei ladügǘn lidan burí hati le lunbei liabin. Ka lunbei wadügüni lun wasagaruni sun buiti le wayaraati lídangiñe?
2. Ka lunbei wadügüni lun aranseñu wamá lubá adamurini distritu?
2 Lunti aranseñu wamá. Ruti Heowá gumadi houn ísüraelina lun aranseñu hamá lubá adamurini le meha lunbei ladügǘn luagu wübü Sinaí (Afu. 19:10, 11). Ítarameme, mosu giñe haranserun sun ha lúnbaña houdin lidan adamurini distritu, mámarügü ha lúnbaña gafanran hamá lidan programa. Kei hénpulu, mégeibaña saragu hamuriahan üma lídangiñe hawadigimari. Másiñati hásügürüña lan lídangiñe aban turobuli libe le meha uéigiñebei lásügüra Neemíasi. Busenti meha libihin üma lídangiñe luadigimari kei eseriwihati luerun urúei Árütaherühesi lun lidin Herusalén lunya liñuraguni lubarieirun, gama lumoun, háfuga subudi lani meha mígirun lubéi lan urúei lun lidin. Ligía lafurieidúnbei Neemíasi, saminaléi le lunbei lariñaguni buidu, ñéingiñeti lau ganigi aba lamuriahani le labusenrubei. Ruti urúei üma lun, ruti íbini ídemuei lun lun ladügǘniwa ábunaguni (Neem. 2:1-9). Lóugiñe hamuriahan üma luma hiyubudiri, adügaadün san aransehani libügürü ida luba lan háfayahan luma halíaba lan harumuga? Híderagubei wéiyaaña lidan afiñeni gürigia le mégeibei ídemuei lidan katei le. Aranse humá lun chülügiñe humá lubá kada sesión, ani aranseñu humá lun “[h]eteniruntima lun uganu” le lunbei haganbuni (Ebü. 2:1).
3. Kaba íderaguawa aranseroun wanigi lubá adamurini?
3 Súdiniti giñe waranserunu wanigi lun waganbun furendei wamaamuga (Ésüd. 7:10). Rúagiñeboun programa lubá adamurini lidan páhina lidan Internet jw.org to ídanboun bürüwañu lan liri burí yanu luma aban o biama bérusu le ídangiñebei lasagarúa kada aban. Buídubei lun taturiahóun lidan Guñoun lánina Háhuduragun Iduheñu lun Bungiu úara fiu dimaasu lubaragiñe lagumeserun adamurini le atokarubei woun. Añahein íbirigu imprimírü hamutu programa lun habürühan somu puntu tidan lidan adamurini.
4. Ida luba hayusuruni agübürigu adamurini distritu lun harufudahan houn hasaanigu?
4 Arufudaha humá houn hisaanigu. Harufudahan ísüraelina houn hasaanigu, ligía meha ábanbei lídangiñe lisuuni adamurini le adügǘbei luagu wübü Sinaí (2 Lur. 4:10). Ruti adamurini distritu aban lubuidun chansi lun ladügǘniwa ligiaméme. Lunti hañuurun agübürigu úara hama hasaanigu danme lichugúña lan programa íderagua hamaamugaña íchiga arigei lun le ariñawagúbei. Gayarati hadimurehan iduheñu hámagua luagu le hafurendeirubei lídangiñe adamurini sagü weyu lárigiñe lagumuchun programa lánina adamurini, luma lidan Guñoun lánina Háhuduragun Iduheñu lun Bungiu úara.
5. Kaba buiti wibiha lídangiñe wachülürün lidoun adamurini distritu le yarafaalibei?
5 Íderagua lumutiña adamurini mabulieidúati le meha adügǘbei luagu wübü Sinaí ísüraelina lun gebegi lan chansi le hámabei houn lánina hádangiñetiña lan lubúeingu Bungiu (2 Lur. 4:7, 8). Aranserúaali adamurini distritu le lunbei ladügǘn yarafa madise lun líderaguniwa lidan aban igaburi ítarati. Gayarabei wadisedun luagu ǘrüwa weyu luéi ubóu le lábugiñebei lubafu Satanási le, le ítarabei kei aban luriban fulasu mageirawati, lunya wárügüdün erei luma lun wagundaarun hama wíbirigu lidan aransehani lánina áhuduraguni inarüniti le adüga láalibei Heowá, le ítarabei kei aban paraísu (Isa. 35:7-9). Kei yarafaali lubéi luéyuri Heowá, meferidira waméi chansi lun wíchugun gurasu wóuniwagua (Ebü. 10:24, 25).