Aban wadagimanu le barüti buiti resultóu
Ǘrüwa dimaasu lubaragiñe adamurini distritu, ladügǘwayaba aransehani lun tederegehóun amisuragülei houn sun gürigia ha lídanbaña fulasu le ñein lubéi wapurichiha lun hachülürün lidoun adamurini, anirein buiti resun wama lun wídehan lidan wadagimanu le. Lidan burí irumu le sügühalibei, wéiritu hanigi gürigia ha ánharubaña lun amisurahani le dan le haganbuni yanu tídangiñeti Bíbülia le ichugúbei ñein, lau harihini hagunfulirun ídehatiña lidan kada departamentu lau hawadigimari keisi lubudubu luma lubuidun hóuserun gürigia ha achülürübaña lidoun adamurini luma úarani le haganaguabei (Sal. 110:3; 133:1; Isa. 65:13, 14). Gama lumoun, barüti funa san wadagimanu le resultóu buiti lídantima fulasu le ídanbei mosu lan haweiyasuhan gürigia dise lun hachülürün lidoun adamurini?
Lárigiñebei ladügǘniwa aban adamurini lánina distritu lidan irumu 2011, resibitu aban Beteli aban gárada tóunahan aban würi to meha héchuboun aramudagua hawéi gefentiña luagu Heowá, gama lumoun, aba meha tadarirun aban amisuragülei lubadu tubenari. Ariñagatu gárada tuguya: “Anuhein aban tubuidun muna numa ani hanarimeti lubuidun nani weiriei, sun yebe nasaminarun memegeirunhadina lan amu katei lun gunda nan. Gama lumoun mítaranti; masuuniti meha nibagari. Adügati lira lun busén nan nidin lidoun adamurini samudi lau sun meha mosu lan nábugahan 320 kilometuru lun nachülürün lidoun”. Kei weiri lubéi tugundan lau le taganbubei lidan adamurini, aba tagúarun lun tani weiriei lun tariñagun lun magiribudunboun lan múnadoun guñoun ligía ladüga busén tan giñe tidin lidoun adamurini dimaasu. Ariñagatu: “Aganba numuti sun yanu, ani aba nasubudirun saragu gefentiña. Mabusenruntina yebe lagumuchun”. Dan le tagiribudunbei, aba tagumeserun aturiahoun Bíbülia ani gádürü hati lárigiñe aba tagumeserun apurichiha mabadiseirunga. Ariñagatu: “Seremei meha nadarirunu amisuragülei tuguya nubenari! Anati guenlé gasuunihali nibagari”.
Chóuruti ñéinbaña lan fiú hádangiñe ha únbaña tichugúa amisuragülei achülürütiña lidoun adamurini. Ligíati, adüga waméi wadagimanu súdiniti le lau saragu ubebeni. Barǘ humóun amisuragülei to ígiraguboun hun húmagua lidoun uburugu le ñeinba lubéi ladügǘwa adamurini lun hayusurunu danme le mama lan hapurichihaña muna tuagun muna.
[Rekuáduru le lídanbei páhina 5]
Ida luba wederegerunu amisuragülei?
Lun gayara lan tederegehóun lidan sun fulasu, mosu murusunrügü lan wayanuhan. Gayarati wariñagun: “Buiti binaafin. Lídanñadiwa aban wadagimanu le adügǘbei lidan sun ubóu lun tafanreinhóun amisuragülei to. Busentina níchugun aban hun. Hadariruba lanwoun ariñahani tidan”. Adüga waméi lau ubebeni. Danme le wáfuridun samudi luma dimaasu lun wederegehanu amisuragülei, gayarabei giñe wayusurunu Garüdia Atalaya tuma ¡Despertad! anhein wariha buídubei lan wadügüni.