Ábanbei hati lánina wadagimanu mabulieidúaditi widü-hati

1. Kaba wadagimanu espechaliti adügǘwa lidan sun Ubóu lau ayarafadeina liña lan lagunfulirun Larúeihan Bungiu 100 irumu lúmagiñe lagumeserun arúeiha?

¹ Kei ayarafadeina liña lan lagunfulirun Larúeihan Bungiu 100 irumu lúmagiñe lagumeserun arúeiha, wéiriti lubuidun walawahani Heowá lau aban wadagimanu espechaliti! Lidan widü-hati, wafanreinhaba aban iseri tratadu lidan sun Ubóu, tratadu to gíriboun Halía ladarirúa lóunabagüle álügüdahani le hadügübei gürigia hóuniwagua? Tamisurahañanu tratadu to gürigia áluahei lóunabagüle álügüdahani le hadügübei hóuniwagua tidan Bíbülia ani afuranguagüda tumuti ida luba lan líderaguniña páhina lidan Internet jw.org.

2. Ka gayaraabei wadügüni lun “[w]agúaragun [...] lau ugundani” lun walawahani Heowá lidan widü-hati?

² Wagua humá lau ugundani lun halawahani Heowá. Lun híderawagun íbirigu aganwoundagüdei hapurichihan, adügǘwaali aransehani espechaliti lun heseriwidun sun ha busentiña kei prekursorugu ídehatiña lidan widü-hati lau hapurichihan darandi oura. Kei séingübei lubéi wándaradi, samudi luma dimaasu lanügün widü-hati, gayaraabei heseriwidun saragu íbirigu ha nadagimeinbaña o ha aleskuelahabaña lúmagiñe leindi darí wándaradi kei prekursorugu ídehatiña. Anhein gayaraahali lubéi liridún aban hádangiñe gürigia ha aturiahabarun Bíbülia huma o aban hisaani keisi apurichihati, ariñaga huméi lau lóufudagun lun Íbiri le ídehabei hama wéiyaaña lidan afiñeni lun hawadigimaridun lidan úarani. Mame lueirin hagundan lau hagumeserun apurichiha lidan hati mabulieidúati le! Gíbetiña prekursorugu hádangiñe ha apurichihabaña 70 oura sagü hati emeraagutiña lidan widü-hati lárigiñe hagunfulirun lau oura le lunbei hadügüni lidan irumu, gama lumoun, gayaraati hadügün asansiruni lidan ókaasion le ídeha hamaamuga lau sun hagundan lidan wadagimanu espechaliti le. Gayaraahali hagumeserun sun iduheñu arihei kaba lan hadüga gayara láamuga “hagúaragun [...] lau ugundani” lun halawahani Heowá lidan widü-hati (Ésüd. 3:11; Ari. 15:22).

3. Ka katei wagurabubei wibihin lídangiñe wadagimanu espechaliti le lunbei wadügüni?

³ Lau sun ídeha wamá lidan aban wadagimanu ítarati lidan dan le sügühalibei, agurabatiwa mabulieidúadibei lan ókaasion le. Laganwounduba funá san oura le wásügürübei lidan apurichihani, hanumerun apurichihatiña, luma hanumerun prekursorugu ídehatiña lidan widü-hati? Éibume agumucheina lan irumu lánina eseriwiduni 2014, agurabatiwa labiniruni Heowá áfaaguni le lunbei wadügüni lidan sun Ubóu lun ábanbei lan hati le úagili libe widü-hati, le ídanti lapurichihóua lidan aban igaburi le madügǘnwañahagili! (Mat. 24:14.)