Iseri burí uremu lun walawahani Heowá!
1 Lidan adamuridaguni irumu-auti le málügilibei lúmagiñe ladügǘn tidan óundaruni Watch Tower Bible and Tract Society of Pennsylvania 4 lidan diisi-hati, irumu 2014, awisahóuati luagu ladügǘña lan aransehani lun techekürǘn líburu lánina eremuhani to wayusuruboun guentó. Ma lubuidun ñunsu! Haritaguagüdawati houn sun ha ñéinbaña weiri lan lisudinin uremu lun lalawahóun Heowá lidan wáhuduragun lun (Sal. 96:2).
2 Másiñati álügüdagua humá hungua: “Ka uagu megei tubéi líburu lánina eremuhani techekürǘn?”. Gíbeti resun. Furumiñe, abuidureinatima liña gunfuranda wamani le tarufudahabei Bíbülia ani gayaraati gani lan lira efekütu luagu liletüran weremun (Ari. 4:18). Libiaman, tídangiñe binadu Traducción del Nuevo Mundo lasagarúa besafu lídangiñe dimurei luma saminaü le ayusurúbei tidan líburu lánina eremuhani. Mosu laransehóuniwa dimurei burí le lun úaragua lan luma le tariñagubei Bíbülia to chéküwaaruboun. Wéiribei wadagimanu le lunbei ladügǘniwa lun laranserún tiletüran liliburuna eremuhani ani desidíruaali lichugún iseri uremu lanwoun le tídanbei.
3 Mini lan san lira mosu lanme wagurabun imprimírua tan iseri liliburuna eremuhani lubá wagumeserun eremuhei iseri burí uremu le? Uá. Gúndaatiwa wasubudiragüdüni hun lichugúba lan saragu iseri uremu lidan wani páhina lidan Internet jw.org fiu hati lárigiñe le. Danme le láfuridun aban iseri uremu lidan wani páhina, lichugúba tidoun programa to lánina Adamuridaguni lánina Eseriwiduni kei lagumuhóun uremu le lunbei leremuhóun, lau iri “iseri uremu”.
4 Le unbei wadügüni lun wafurendeiruni iseri uremu. Gayaraati hénrengu lan lafurendeirúniwa aban iseri uremu. Íbini ítara, kei meha ladüga abürühati Sálumu, mabusenruntiwa werederun “maniñu” lidan adamuridaguni, busentiwa wiñuruni wamalali danme weremuhan (Sal. 30:12). Sigí waméi adundehani sensiyuti burí le lun wafurendeiruni iseri uremu.
Aganba ani aganbaya huméi músika gürawáruaali le lunbei láfuridun lidan wani páhina lidan Internet. Anhein hadüga ítara, ménrenguntimabei hun haritaguni ida liña lan leremuhóun.
Aturiaha huméi liletüran uremu ani áfaagua humá hafurendeiruni lidan hichügü.
Eremuha huméi liletüran sun aünha lan aganbahei lumusikan darí hafurendeiruni buidu buidu.
Sagá humá dan lun hasayahani iseri uremu lidan Guñoun lánina Háhuduragun Iduheñu lun Bungiu úara darí hafurendeiruni súngubei.
5 Danme le ábanba lan iseri uremu eremuhóua danme lagumuchun Adamuridaguni lánina Eseriwiduni, laganbagüdüwaba músika le gürawáruaalibei houn lílana damuriguaü aban wéiyaasu lubaragiñe hagumeserun eremuhei. Ábameti heremuhani uremu úara luma músika, ítara kei weremuhani le líbiri uremu.
6 Gabaroun waméi ru lan weremuhan lidan adamuridaguni chansi woun súngubei wagía lun wiñuruni wamalali lidan aban lun walawahani Wabungiute Heowá. Ligíati moun lumuti lubéi wéchudun ásaara lídangiñe wala lun woudin adüga amu katei le masudininti dan le lawisahóuniwa leremuhóua lan uremu.
7 Anihein giñe amu katei le gayaraabei wadügüni lun warufuduni weiri lan lebegi músika sagüráuti le wámabei woun. Gumeseti kada sesióun lidan adamurini lau músika. Bián wéiyaasu lidan irumu, aweiyasuhatiña íbirigu úaraguatiña lídangiñe gádürügubei larigeirugu ubóu ani fayei haméi hapasein lun hachülürün uburugu Patterson, Newayoru, lun háfaruni lubuidun burí músika le wayusurubei lidan wáhuduragun lun Bungiu. Ligíati lunti lubéi gaganbadi wamá dan le lamisurahaniwa alidihati sesióun áluahei wala lun waganbuni músika le aranserúaalibei. Líderagubadiwa lira aranseroun wanigi lubá ariñahani le lunbei waganbuni (Ésüd 7:10).
8 Danme lagumuchun wadamuridagun uguñe, weremuhaba aban iseri uremu gíriti: “Gumeseeli Larúeihan Bungiu agumadiha”. Anihán uremu le asagarúbei luagu furumiñeti wéiyaasu lidan adamuridaguni irumu-auti le málügilibei lúmagiñe ladügǘn tidan óundaruni Watch Tower, ani adügǘwati luagu lagunfulirun Larúeihan Bungiu 100 irumu lúmagiñe lagumeserun agumadiha.
9 Chóuruti aban lan lídangiñe “katei buiti” le weresibirubei lúmagiñe Heowá iseri uremu le (Mat. 12:35a). Desidírü wamá wafurendeiruni ani eremuha waméi tau sun wanigi, gayara láamuga walawahani ani ru wagíame uéiriguni lun Wabungiute Heowá keisi lubudubu (Sal. 147:1).