Uremu le adügübei lun wayarafadun lun Bungiu

Aban lubuidun idewesei lúmagiñeti Heowá uremu. Íderagua lumutiwa lun buidu lan ligaburi wasaminan, lun buidu lan wasandiragun woungua luma lun gúndaañu wamá. Chóuruti ligía lan asuseredubei woun dan le waganbahani weremun, kéiburi le ichugúbei lidan JW Broadcasting^®. Yarafagüda lumutiwa uremu burí le lun Heowá.

Lúmagiñe lidan irumu 2014, adügǘwaali kéiburi 70 uremu, ani anihein aban lídangiñe, sügügüdawaali lidoun lóugiñe 500 iñeñein. Másiñati álügüdagua humá hungua: “Ida liña san ladügǘn uremu burí le? Ani ka adügübalin?”.

Ida liña san ladügǘn uremu burí le?

Nadagimeintiña lílana Sétanu le Arihibei lau Gürawárua lan Ariñahani luma Bidéu lábugiñe laríaahan Sétanu le Arihibei lau Arufudahani le tídanbei áfisi to ñéingiñe lubéi larihúa lau hawadigimari gefentiña luagu Heowá lidan sun ubóu, hagía adügübalin uremu burí le áfuridubei lidan JW Broadcasting luma burí amu. Añahein 13 íbirigu lidan Sétanu le Arihibei lau ladügǘn Uremu tidan lóundarun Heowá, hagía arihibaña lau lácharawagun uremu, laranserúniwa, lafarúniwa, luma lau ámuya wadagimanu le emegeirúbei. Ani rúhali Sétanu le Arihibei lau Arufudahani üma lun hídehan íbirigu ha lídangiñetiña sun ubóu lidan ladügǘn wadagimanu le. Haganagua, añahein gácharaguaditiña uremu, gáfaraditiña uremu hama eremuhatiña. Lau ǘnabuguni hayusurei íbirigu ha iyaraani le hawagubei ani máluahantiña lun lichugún uéiriguni houn.

Ida liña ladügǘniwa uremu? Furumiñe, anúadira lumuti Sétanu le Arihibei lau Arufudahani kaba lan sügǘ tídangiñeti Bíbülia ayusurúa lun lila uremu luma ka lan busenwabei lun hasandiruni gürigia danme le haganbuni. Lárigiñe, aba lanúadiruni Sétanu le Arihibei lau ladügǘn Uremu kaba lan ácharaguei uremu luma kaba lan abürüdei lila. Ábati gürawárua lan lun lechekürüni Sétanu le Arihibei lau Arufudahani, ru ligía adundehani. Lárigiñe, aba haranseraguni ani ábaya gürawárua lan luagu lagumuhóun wéiyaasu. Gürawáruati burí uremu le lidan ámuñegueinarügü fulasu, kéiburi tidan Sukursáli o hábiñe íbirigu.

Lun lácharawagun uremu ani gürawárua ligíame, yúsutiña íbirigu programa tídanti konputadora lun laransehóun, labürüdǘn luma lareidahóun uremu lidan burí sétanu. Mégeiwati giñe garanwoun, gidara o katei líbeina lira, máhina to amigisiragubalin amuri, parlante luma burí mikürófonu. Gayaraati lafayeirún lúmagiñe 100 darí 1,000 dólarü o lóugiñe luagu aban mikürófonu. Lidan irumu 2020, gástawati 116,000 dólarü luagu burí máhina lun gürawárua lan uremu.

Ka adügǘbei lun mibe lan agastarúti? Lubaragiñe hichugún saragu íbirigu ha eseriwidutiña Betelirugu nadagimein lidan burí sétanu le lánina uremu, amuriahóuati hama amu íbirigu lun hídehan hábiñegiñe. Ani lubaragiñe gürawárua lan uremu lidan aban orkesta, aba hadügün íbirigu uremu lau hayusurunu konputadora.

“Adügati burí uremu le lun nederebudagüdüni nafiñen”

Hínsiñeti houn íbirigu haganbahani uremu burí le! Kei hénpulu, ariñagatu aban íbiri gíritu Tara to awinwanduboun ageiraü Yámani: “Dan le nasandirun idiheri, adügati uremu lun buidu lan nasandiragun nungua. Dan le naganbahani lidan nererun, sanditina kamá hamuga lóuburuñadina Heowá”. Ariñagati aban íbiri gíriti Dimitri, le awinwandubei Kasahistán: “Hínsiñeti nun gayara lan naganbahani uremu burí le madiheridunga luagu liletüran lugundun subudi numuti tídangiñe lan Bíbülia lasagarúa sun le lílabei. Lanwoun lira, íderagua lumutina uremu burí le lun nederebudagüdüni numadagua luma Heowá”.

Abahüdagua tumuti aban íbiri gíritu Delia, to awinwanduboun Suru Áfürika woun ida liña lan tasandiragun tungua lau burí uremu le: “Adügati burí uremu le lun nederebudagüdüni nafiñen. Dan le hiru nan o weiri lan niturobulin, súnwandan anihein lan aban uremu le ñǘbuinbei lidoun nisaminan. Anihein dan, láurügü naganbahan aban uremu, aba buíduhali lan nasandiragun nungua”.

Anihein lídangiñe uremu burí le, ligíaali hínsiñetima houn íbirigu. Ariñagati Lerato, aban íbiri le giñe awinwandubei Suru Áfürika: “Adügati burí uremu le gíribei Yarafaali luma Wagurabahañein iseri ubóu lun nasaminarun luagun ida luba lan danme le táguyugun núguchu lídangiñe óunweni. Sagü naganbahani uremu le, aba nadiraarunu lidan nisaminan éibaagueina nubaroun tulegu tarüna”.

Anihein aban uremu le íderagubarun aban íbiri nibureingiru to awinwanduboun Sri Lanka. Abahüdaguatu woun: “Aba meha tásurun numaistaran to arufudahaboun siensia ariñaga nun hagibugiñe nupaanágu ladügarügü aban nan gefentu luagu Heowá. Aba nanufudedun saragu darí lun ibidiñe lan nun kaba lan nariñaga tun. Dan le nachülürünbei múnadoun, aba tariñagun núguchu nun lun naganbahani uremu le gíribei Fuerte tú serás. Íderagua lumutina uremu le lun gunfuranda nani súdini lan naturiahan nábuguarügü luma lun náluahan ariñahani lun níchugun óunabagülei. Larugan binaafin, aba nayanuhan tuma numaistaran. Aganba tumutina ani ariñagatu nun gunfuranda taali lan wafiñen wagía le gefentiña luagu Heowá. Wéiriti neteingirunu lóundarun Heowá lau hadügün uremu le íchugubei saragu dǘgüdaguaü”.

Halíagiñe san libihúa seinsu lun ladügǘniwa sun wadagimanu le? Seremei budagia le ichugúbei lidan ámuñegueinarügü igaburi le adarirúbei lidan donate.jw.org. Teinki waña hun luagu híchigadi.