Íderagua wamaña gürigia marihintiña afurendeira luagu Heowá
1. Ida liña meha larufuduni Hesusu nidiheri lan hawagu gürigia ha marihinbaña?
1 Furimémeli meha Hesusu Herikógiñe. Aba hagumeserun bián marihintiña agúaraha lun hariñaga: “Wabureme, [...] gudeme wamá bun”. Háfuga nidiheri lan meha Hesusu weyu ligía, lugundun subudi lumuti meha fiúrügaali lan weyu lubá lounwen. Íbini ítara, ráramaguati, aba lagúarun houn ani aba lareidaguagüdüniña (Mat. 20:29-34). Ida luba wáyeihani lugudemehabu Hesusu?
2. Danme le wadunragun luma somu gürigia le marihinti ǘmadarugu, ida luba wapurichihan lun?
2 Íderagua wamaña. Ánhawa adunragua luma somu gürigia le marihinti ǘmadarugu, írida waméi wiri lun ani ariñaga wamá lun gayara lan wíderaguni. Háfuga mafiñenbei lan wawagu furumiñe, lugundun añahein saragu gürigia adügütiña dañu houn marihintiña. Gama lumoun, ánhawa ayanuha houn keisi aban umadaü ani arufuda waméi houn berese wamá hau, háfuga ábame darangilu hamá. Moun lumuti giñe wabulieiduni añahein lan gürigia arihatiña íbini murusunraü ani añahein amu marihintiña ni kata, ani según hasandiragun houngua ítara liña ídemuei le hemegeirubei. Lárigiñe wíderaguniña, gayarabei wariñaguni houn weseriwiduña lan arufudaha houn gürigia tuagu Bíbülia. Aliiha wamá aban bérusu tídangiñeti Bíbülia houn, kéiburi Sálumu 146:8 o Isaíasi 35:5, 6. Anhein galiihadi lubéi gürigia ligía lidan braille álügüda huméi anhein hínsiñebei lubéi hamuga lun libihin agumeiraguagüdüni lidan braille lun lasigirun afurendeira tuagu Bíbülia. Gayarati giñe híderaguni arariragüda ariñahani lídangiñe jw.org lun laganbahani. Anhein anuhein lubéi aban konputadora luma to aliihabalin ariñahani le áfuachubei tidan, háfuga gayarabei leseriwidun sun ariñahani le lídanbei jw.org lun tuma burí agumeiraguagüdüni to gayarabei tarariwagüdǘn lidan (RTF). Dandu agumeiraguagüdüni lidan braille kei lidan RTF lídanrügüñein chumagü gayara lan tadarirún luma lidan burí iñeñein le wéiribei layanuhóun ubouagu. (Ariha huméi rekuáduru “Danme le híderagun aban gürigia marihinti...”.)
3. Ida luba wadariruniña gürigia marihintiña ha lídanbaña fulasu le ñein lubéi wapurichiha?
3 Áluaha wamaña gürigia ha marihintiña. Háfuga madariraditiwa gürigia marihintiña dan le wapurichihan muna tuagu muna, lugundun saragu hádangiñe gürigia ha himei hamuti mayanuhan hamá hama gürigia ha achülürüti adaünha luagu habenari ani ha ibidiñetiña houn. Ligía lunti lubéi wáfaagun lun wáluahaniña lun wapurichihan houn (Mat. 10:11). Gánitiwa san somu paaná lidan wadagimanu o leskuelarugu le marihinti? Anhein ítara liña lubéi, ayanuha wamá luma luagu inarüni. Anhein anuhein lubéi somu leskuela houn marihintiña lidan fulasu le ñein lubéi wapurichiha, álügüda waméi máisturu le arihibei tau leskuela tugía anhein busén lubéi lun wanügün agumeiraguagüdüni tidoun hani líburu-agei to gayarati haliihanu gürigia ha marihinbaña. Subuditiwa san somu gürigia ha gaduheñutiña gürigia marihintiña? Anuhein san somu óundaruni lidan fulasu le ñein lubéi wapurichiha to íderagubaliña marihintiña o somu muna to ñein lubéi hiderawagúa gürigia ha mégeiti somu lídangiñe lumegegun hágubu ani añahein giñe marihintiña ñein? Afuranguagüda huméi lun liduhe gürigia le marihinbei, o lun gürigia le eresibirubaliña achülürütiña tidan muna tuguya o lun le arihibei tau leskuela luagu busén hamá gefentiña luagu Heowá híderaguniña gürigia ha marihinbaña, ani anuhein lan agumeiraguagüdüni wama lidan braille luma burí ariñahani lun haganbahan. Arufuda waméi houn tau Bíbülia füramase lan Bungiu lareidaguagüdüniña marihintiña sunsuinagubei. Gayarati giñe warufuduni bidéu le gíribei “No sé qué haría sin ella,” houn le lídanbei jw.org. Labahüdaguña bidéu le luagu aban íbiri le marihinti le asagarubei buiti lídangiñe laliihanu Bíbülia lidan braille. Anhein wariñaga houn furangu ka lan lébunabei wabisidahaniña, háfuga ménrenguntimabei woun wayanuhan hama ha marihinbaña.
4. Ka wafurendeirubei lídangiñe le tadügübei Janet?
4 Ñǘdüntu aban íbiri marihintu gíritu Janet tidan aban muna ñein lubéi heredera gürigia marihintiña, ani aba tayanuhan tuma aban nibureintu. Aba tariñagun tun: “Dan le meha ya lubéi Hesusu ubouagu, areidaguagüdati fiú gürigia marihintiña lun larufuduni le lunbei ladügüni hawagu sun marihintiña ámuñegü”. Akutiha hamuti le lariñagubei Arufudúni 21:3, 4 ani aba tafuranguagüdüni tun ida luba lan lagunfuliruni Larúeihan Bungiu füramasei ligía. Aba támanichagun nibureintu tuguya, lárigiñe aba tariñagun: “Furumiñe tariñaguni aban gürigia marihintu katei le nun. Hiibe-agei gürigia ha arihatiña saminatiña hafayeihaña lan marihintiña luagu somu katei wuribati le hadügübei o le hadügübei haduheñu lidan binadu dan”. Aban tóunahan Janet aban koréu tun lau aban fánreinti le anügübarun sügülügü tidoun líburu Kátima san, guentó haturiahañoun Bíbülia úara bián wéiyaasu lidan dimaasu.
5. Íbini siñá lan wareidaguagüdüniña marihintiña, ida luba lasansirun habagari ánhawa eberesera hau?
5 Furanguti siñá lan wareidaguagüdüniña marihintiña kei meha ladüga Hesusu. Gama lumoun, gayarati wíderaguniña. Daruguaali lubungiute ubóu le lau hasaminan besafu gürigia, íbini lau hasaminan fiú hádangiñe ha marihinbaña. Gayarati lubeiti wíderaguniña súngubei lun gunfuranda hamani inarüni le tídanbei Lererun Bungiu (2 Ko. 4:4). Areidaguagüdati meha Hesusu bián gürigia marihintiña yarafa lun Herikó ladüga hagudemedagun lun (Mat. 20:34). Ánhawa giñe eberesera hau gürigia ha marihinbaña, gayarabei wíderaguniña asubudirei Heowá, le lunbei ladügün lunya harihin luma lun habihin ibagari magumuchaditi.