Puntu burí le asansirubei ibagari

“Másiñati gayara lan subudi hamá gürigia marihintiña hun ha aliihabarun garüdia to”, tariñagun garüdia The Watch Tower (La Torre del Vigía) to lánina 1 lidan sisi-hati, irumu 1912. Ariñagatu giñe garüdia to anuhein lan agumeiraguagüdüni mafayeihanga houn gürigia marihintiña. Ariñagayatu: “Gayaraati imprimírua tan agumeiraguagüdüni to lun haliihanu gürigia ha marihintiña. Wéiriti lebegi houn marihintiña lau hasubudiruni lachülürüba lan weyu ñeinbei lan saragu abiniruni ubouagu”.

Dan le labürüdǘbei dimurei burí le, adügaaña meha gefentiña luagu Heowá agumeiraguagüdüni tídangiñetu Bíbülia to “gayaraaboun haliihanu marihintiña” lau sun úagiru lan meha agumeiraguagüdüni lidan büraile lidan inglesi. Uguñe weyu awanhagua adüga agumeiraguagüdüni houn marihintiña. Ani adüga wamuti lidan lóugiñe 50 iñeñein! Ida liña tadügǘn?

Ida liña tadügǘn agumeiraguagüdüni lidan büraile?

Le furumiñeti katei le hadügübei, sügügüda hamuti ariñahani lidoun büraile. Ariñagati Michael Millen, le nadagimeinbei Patterson (Newayóru) lidan lásügürawagüdün ariñahani lidoun büraile: “Yúsutiwa meha programa lánina ariñahani le hayusurubei sun gürigia lidan lásügürawagüdün lidan büraile, gama lumoun meseriwínti lun lásügürawagüdün lidoun sun iñeñein lánina büraile. Guentó yusu wamuti programa Watchtower Translation System, le adügübei lun wásügüragüdün lidan liibe-agei iñeñein lidan büraile le ubouagubei. Ligíarügüñein programa ítarati. Mafiñentina anihein lan amu programa ítarati”.

Tidan agumeiraguagüdüni büraile mámarügüñein lila párafu ñein, anihein giñe ariñahani tuagu iyawaü ñein. Kei hénpulu, iyawaü le luágubei tidáü líburuWinwan humá lau ugundaniariñagati tumuti ítara lidan büraile: “Aba lagumeserun aban wügüri éibuga lídangiñe üma geyegeyeti, anihein aban fulasu buin lau fuluri ñein luma wübü”. Ariñagati Jamshed, aban ídehati lidan damuriguaü, prekursoru ligía ani marihinti: “Le ariñawagúbei tuagu iyawaü wéiriti lebegi nun”.

Lárigiñe labürüdǘn dimurei lidan büraile, aba tounahóun dugumedu tidoun sukursáli to arihiboun lau imprimírua tan. Lun lira, yúsutiña aban gárada to maheiridaguaditu dan le labürühóun tidan lau burí puntu, masansiragun ligía ligaburi tarihín íbini hayusurunu saragu wéiyaasu. Lárigiñe, aba loundarún sun tubana agumeiraguagüdüni: furumiñe aba haranseruni ubanaü ani lárigiñe aba hayusurun aban aspirali lun hóundaruni sun ubanaü ligía. Lárigiñe aba tounahóun úara tuma to tíbiri agumeiraguagüdüni lun damuriguaü, o tounahóun lidan koréu mafayeihanga houn ha marihintiña anhein ítara liña lubéi ladügǘn koréu. Anhein megei habéi wábirigu ha marihinbaña o ha gaturobulinbaña lun harihin lun heresibirunu agumeiraguagüdüni to lunboun hayusuruni lidan damuriguaü, adügatu sukursáli aransehani lun hóunahanu lau lóufudagun.

Lun ladügǘniwa katei le, mégeiwati saragu dan luma seinsu. Lanwoun lira, tidan wani imprenta Wallkill (Newayóru), dan le ayusurúbei lun tadügǘn 2 Bíbülia lidan büraile ligiaméme lun imprimírua tan 50,000 Bíbülia to mámatu lidan büraile. Luagu le aban oubaü, ábanrügü Bíbülia lidan büraile bián güradu lidan inglesi anihein 25 bolumen tidan.a Ubuñei to mégeiwaboun lun tadügǘn aban Bíbülia lidan büraile gebegitu lóugiñe 123 wéiyaasu luéi tebegi aban Bíbülia Traducción del Nuevo Mundo to mámatu lidan büraile. Ábarügü tidáü Bíbülia to 25 bolumen tidan, gebegitu 150 dólarü.

Ida liña san hasandiragun ha ídehabaña lun tadügǘn agumeiraguagüdüni to houngua? Ariñagatu Nadia, aban íbiri to nadagimeinboun tidan sukursáli Suru Áfürika: “Hénrenguti habagari íbirigu marihintiña o ha gaturobulinbaña lun harihin. Ligía nasandirubei aban óunwenbu ugundani ladüga gayara lan nadügün somu katei hawagu íbirigu ha. Chouru numuti weiri lan hínsiñe gürigia ha lun Heowá”.

Furendei humá aliiha lidan büraile

Anhein siñá lubéi laliihan aban gürigia le maliihanti büraile, ka lunbei ladügüni? Fiu irumu guentó adügǘwatu aban garüdia to gíriboun furendei humá aliiha büraile. Tidan garüdia to anihein ariñahani dandu bürüwañu kei lidan büraile. Adügǘwatu garüdia to lun hayusurunu dandu gürigia ha marihinbaña kei gürigia ha arihibaña úara. Tidan garüdia to, anihein aban ubanaü luma aban lápisi lun habürühan gürigia ha marihinbaña ñein lidan büraile. Gürigia le afurendeirubei büraile gayaraati layusuruni lápisi luma ubanaü lun labürühan lidan büraile. Líderagubei ligaburi arufudahani le, lun mabulieidun lani létüra lidan büraile luma lun lasubudiruni danme le laguuruni.

“Hínsiñetu nun saragu!”

Ida liña tíderaguniña agumeiraguagüdüni to lídanboun büraile wábirigu ha marihinbaña o ha gaturobulinbaña lun harihin? Ariha waméi le asuseredubei lun Ernst, le awinwandubei Aití. Ñǘdünti meha adamuridagua, gama lumoun úati agumeiraguagüdüni luma lidan büraile. Ligía láfaagunbei lun lerederun lichüguagu sun le labusenrubei lariñagun, lun líchugun óunabagülei lidan adamuridaguni. “Guentó ámuhali sun katei —liña lariñagun— gayaraahali niñuruni núhabu ani níchugun óunabagülei lidan furumiñeguarügü dan. Ani sanditina lílana nan damuriguaü. Sun wagía resibi wamuti ligiaméme ariñahani”.

Jan aban wéiyaali lidan afiñeni le awinwandubei Austria ani gaturobulinti lun larihin. Lau sun lira, ligía alidihabalin taturiahoun Garüdia awisahatu luma taturiahoun Bíbülia lidan damuriguaü. Ariñagati: “Wani agumeiraguagüdüni lidan büraile tugía furangutimaaboun tídangiñe to nasubudiruboun. Kei hénpulu, ganumerunti tupahina, ménrengunti lun ladarirúniwa ariñahani ani rutu ariñahani tuagu iyawaü le megei wabéi”.

Lidan ageiraü Koréa lani suru, tawinwanda aban prekursora to gíriboun Seon-ok. Marihintu maganbun tuguya. Mégeitu meha lun ladügǘn seini tun lau túhabu guánarügü, sun le ariñawagúbei lidan adamuridaguni. Guentó gayaraahali taliihan tábuguarügü, agumeiraguagüdüni le tídanbei Bíbülia lidan büraile. Ariñagatu: “Hénrenguti taliihóun amu agumeiraguagüdüni lidan büraile ladüga mégeiwati puntu tidan, segeguati tilinea o ibibieti tubana. Gama lumoun ménrenguntimati laliihóun agumeiraguagüdüni to hani gefentiña luagu Heowá ladüga gárada to hayusuruboun buídutimatu ani sandiwati puntu buidu. Gayaraati meha naturiahanu agumeiraguagüdüni tídangiñeti Bíbülia ánhanagubeirügü íderaguawa. Ánheinti guenlé gayarahali nadügüni nábugua. Hínsiñeti nun saragu naranserun lubá adamuridaguni luma lun níchugun óunabagülei saragu gayara lan. Aliiha numutu sun agumeiraguagüdüni to nibihiboun lidan büraile. Le linarün katei, hínsiñetu nun saragu!”.

Agumeiraguagüdüni lidan büraile, ítara kei tíbiri, barǘ tumuti ariñahani le: “Malugurahóuntu agumeiraguagüdüni to. Lídangiñeti aban wadagimanu lánina arufudahani tídangiñe Bíbülia le adügǘbei lidan sun ubóu tafanreinhóun ani lau budagia lau gundaü lamainirúa”. Seremei lun budagia le híchugubei lidan ámuñegueinarügü igaburi lidan donate.jw.org, ligía gayara lubéi tachülürün agumeiraguagüdüni to houn sun gürigia, íbini houn gürigia ha marihinbaña hama ha gaturobulinbaña lun harihin. Rútiwa seremei hun ladüga gíchigadi humá!