Buidutimalá Wadügüni Katei: Apurichiha wamá houn ha marihinbaña

KA UAGU SÚDINI LUBÉI? Mabuidunti hasandiragun gürigia ha marihinbaña houngua dan le hayanuhan hama gürigia ha ibidiñebaña houn. Ligía mosu lubéi chubalugu wamá apurichiha wamaamuga houn. Hínsiñetiña gürigia marihintiña lun Heowá ani bereseti hau (Fad 19:14). Áyeiha waméi Heowá ani áluaha wamá ida luba lan wíderaguniña lun hasubudiruni Bungiu.

LE LUNBEI LADÜGǗNIWA:

• Áluaha wamaña gürigia marihintiña (Mt 10:11). Subuditi san somu gürigia le gaduheti somu marihinti hun? Anuhein san somu muna, leskuela o óundaruni to hountu marihintiña lidan fulasu le ñein lubéi wapurichiha to ñein lubéi habusenra tílana agumeiraguagüdüni to hountu marihintiña?

• Arufuda huméi berese humá hau. Anhaün arufuda gamadóuni lun gürigia le marihinbei ani arufuda huguyame lun berese humá lau, háfuga ábame darangilu lan lasandiragun lungua. Houcha humá hayanuhan luma luagu somu katei le uáguti habusenra hiibe-agei lílana fulasu hayanuhan.

• Íderagua humaña asubudirei Heowá. Adügaaru lóundarun Heowá agumeiraguagüdüni lidan ámuñegueinarügü igaburi lun hiderawagún gürigia marihintiña o ha lóuguati harihin. Álügüda huméi gürigia ka lan tídangiñe himei lubéi. Mosu lachoururuni íbiri le arihibei lau apurichihani lidan damuriguaü anhein amuriaha lubéi íbiri le arihibei tau agumeiraguagüdüni garüdia lidan igaburi létima himei habéi gürigia ha marihinbaña.