Ida luba wayusuruni ariñahani aganbahóuarügüti?
1. Bóugudin tuéi agumeiraguagüdüni to luntu taliihóun, ka amu ariñahani gayaraabei wadariruni?
1 Ídehaali wani páhina lidan Internet jw.org lun hadarirun saragu gürigia ariñahani le buidu buriti luma burí dimurei richati lun haliihani (Apur. 12:10). Gama lumoun, aganbañaha humaali san ariñahani le lídanbei páhina le? Adügǘwatu tiibe-agei agumeiraguagüdüni to ñeinboun lun giñe gayara lan taganbahóun. Ka un lahuuda katei le?
2. Ida luba wayusuruni ariñahani aganbahóuarügüti dan le waturiahan wábuguarügü o hama waduheñu?
2 Lun waturiahan wábuguarügü o hama waduheñu. Líderagubadiwa waganbahani taliihóun Bíbülia, garüdia o amu agumeiraguagüdüni dan le waweiyasuhaña lan o wadügüñein lan waberesegun lun wayusuruni wadaani buidu (Efe. 5:15, 16). Aban lídangiñe katei le gayaraabei wadügüni lidan wáhuduraguña lan keisi iduheñu wasigiruni taliihóun somu agumeiraguagüdüni sun awanha lan aganbahei. Ídehati giñe waganbahani taliihóun Bíbülia o amu agumeiraguagüdüni dan le waturiahaña lan wábuguarügü lun wabuiduragüdüni ligaburi waliihan o dan le wafureindeiruña lan amu iñeñein.
3. Kábatima un lahuuda ariñahani aganbahóuarügüti hádangiñe sun gürigia ha wadarirubaña lidan wapurichihan?
3 Lun wapurichihan. Saragu hádangiñe gürigia ha wadarirubaña lidan wapurichihan saminatiña madaani hamá lun haliihan, gama lumoun, másiñati hánharuba lan haganbahan somu ariñahani tídangiñeti Bíbülia. Añahein hagía, amu hañeñe wawéi ani másiñati hánharuba lan haganbuni uganu luáguti Larúeihan Bungiu anhein waganbagüda houn lidan hañeñe (Adü. 2:6-8). Anihein fulasu le ídanti súdinitima lan houn gürigia haganbahan. Kéiburi ha ayanuhabalin iñeñein hmong. Lúmagiñe lidan binadu dan, héchutiña abahüdaguei sügǘ burí le haganbubei hámagiñe hagüchagu houn hasaanigu ani ménrengunti houn haritaguni le haganbubei. Lidan saragu fulasu Áfürika, hínsiñetimati houn gürigia hafurendeirun lau haganbahan abahüdaguni.
4. Ka burí álügüdahani gayaraabei wadügüni wóuniwagua danme wasaminarun wayusurun ariñahani aganbahóuarügüti lidan apurichihani?
4 Ariha humaali san anhein lahuuduña lubéi hamuga hun hakipurun murusun ariñahani le aganbahóuarügüti húmagua lun haganbahagüdüni houn gürigia lidan hañeñe dan le hapurichihan lidan fulasu le ñein lubéi latokara hun? Subuditün san somu gürigia le unbei gayara lan tahuudun somu agumeiraguagüdüni aganbahóuarügütu to gayaraaboun hóunahanu lun tuéigiñe koréu lidan Internet? Buídubei funa san harariragüdün somu agumeiraguagüdüni aganbahóuarügütu lidoun aban siidí lun hederegeruni lun aban gürigia le busenti lasigirun afurendeira úara tuma aban agumeiraguagüdüni to luntu taliihóun? Gayaraabei wabürüdünu sun líburu, garüdia o tratadu to warariragüdün dayarügü lun wóunahanu o wíchugunu lun somu gürigia tidan gárada to ídanboun wíchiga ariñahani luagu wapurichihan. Mámarügüñein lun waturiahan wábuguarügü ladügǘwa ariñahani aganbahóuarügüti, adügǘwati giñe lun wábunaguni lila inarüni (1 Ko. 3:6).