WABAGARI KEISI KRISTIÁNUGU

Lun wadügün disipulugu, mosu wapurichihan arufudaha wagíame

Óunaha lumutiña Hesusu lánigu adüga disipulugu (Mt 28:19). Lun lira, mosu hapurichihan ani arufudaha hagíame. Lunti wálügüdagun woungua kada átiri dan: “Ka lunbei nadügüni lun buídutima lan nagunfulirun lau le mégeiwabei lun nadügün disipulugu?”.

APURICHIHANI

Lubaragiñe werederun agurabaha lun gürigiaba lan ayarafada woun, mosu wagía lan ñüdün áluahaña ha busenbaña hafurendeirun (Mt 10:11). Dan le woudin apurichiha, apurichihatiwa san houn ha úmatiña wadunragua? (Adü 17:17). Ídehati meha láfaagun apostolu Pábulu saragu lidan apurichihani lun tánharun Lidia lun inarüni (Adü 16:13-15).

Samueli apurichiha tau aban garüdia lun Esekiéli; Sólomon tuma Meri apurichiha lun Esekiéli tuma Awigaili — “Bunabei binadüri binaafin, bunabei giñe rábounweyu” (Apu 11:6).

ARIHA HUMÉI BIDÉU MEREDERALÁ WAPURICHIHANI UGANU BUITI: DAN LE GACHANSIN WAMÁ LUMA TIDAN BURÍ MUNA, LÁRIGIÑE, ÁBAME HÓUNABUNI ÁLÜGÜDAHANI BURÍ LE:

Ida liña larufuduni Samueli áfaagua lan lun meferidirun lan chansi lun lasubudiragüdüni inarüni?
Ka uagu lunti lubéi wáfaagun lun wídehan lidan ámuñegueinarügü ligaburi apurichihani?
Ka uma gayara lan nayanuhan luagu uganu luáguti Larúeihan Bungiu danme anaha lan adügei nifisiute le lánina sagü weyu?

ARUFUDAHANI

Lun wadügün disipulugu, mosu wadügün lóugiñe wafanreinhan agumeiraguagüdüni houn gürigia. Lun wíderaguniña eseriwida lun Heowá, mosu wagiribudun bisidaña ru wagíame aturiahani tídangiñeti Bíbülia houn (1 Ko 3:6-9). Kábati wadüga anhein mawanserun gürigia le unbei warufudahei inarüni luáguti Larúeihan Bungiu? (Mt 13:19-22). Mosu wáluahan amu gürigia haruma tanigi, ha ítarabaña kei “múa buiti” (Mt 13:23; Adü 13:48).

Sólomon tuma Meri aturiahoun Bíbülia luma Esekiéli tuma Awigaili; Esekiéli tuma Awigaili apurichiha lidan guririguaü — “Au ábunagubei, Apolosu áturagua, gama lumoun Bungiu aweiridagüdübalin nadü” (1 Ko 3:6).

ARIHA HUMÉI BIDÉU MEREDERALÁ WAPURICHIHANI UGANU BUITI: LIDAN GURIRIGUAÜ LUMA DAN LE WADÜGÜN DISIPULUGU, LÁRIGIÑE, ÁBAME HÓUNABUNI ÁLÜGÜDAHANI BURÍ LE:

Ida liña láturaguni Sólomon tuma Meri inarüni le abunúbei tidan lanigi Esekiéli tuma Awigaili?
Ka katei lunbei wáfaagun luagu dan le wídehan lidan ámuñegueinarügü ligaburi apurichihani, kéiburi dan le wapurichihan lidan guririguaü?
Ka lunbei wadügüni lun warufuduni warufudahani lan inarüni houn amu súdinitimabei woun?