Ida luba wídehan dan le lasuseredun somu günringuaü?

Sagü dan aganwoundeina liña lan liñawan dan. Dan le lasuseredun aban lídangiñe somu liñawan dan, aranseñuhaña íbirigu lun hídehan, ha únbaña lichugúa dasi lun híderawagun íbirigu lárigiñe lasuseredun aban damichi ani adüga hamuti sun katei lau lubudubu. Ligía líchugunbei Musu Úaraguati adundehani lun ñein lan aban Sétanu le arihibei lau híderawagun íbirigu lárigiñe lasuseredun hárabaganali, herigini o katei líbeina lira tidan kada sukursáli.

Dan le híchugun íbirigu ha lídanbaña sétanu le fe susereeli lan aban liñawan dan, hárabaganali o katei líbeina lira, aba háwarun houn wéiyaaña lidan afiñeni lau lóufudagun lun hasubudiruni ka lan hemegeirubei íbirigu. Anhein weiri lubéi damichi le lígirubei liñawan dan ani siñá hamuti íbirigu ha awinwandubaña ñein aranseha hábuguarügü, tíridubaña sukursáli íbirigu ha lun hídehan aransehei damichi. Íbirigu ha tóunahabaña sukursáli, másiñati hamuriahan ídemuei hama amu íbirigu o budagia lau katei létima hemegeirubei o lagañeihóun ílagu le mégeiwabei lun lichugún houn.

Anihein saragu resun lun laransehóun katei ítara. Kei hénpulu, ídehati le lun lidan lan lubudubu áfaaguni le adügǘbei luma lun mawesirun lan seinsu, dan luma ubuñei luma lun ua lan chagaguaü, gayaraati lasuseredun katei le dan le hadügüni íbirigu katei mariñawagunga houn.

Íbirigu ha tóunahabaña sukursáli gayaraati híchugun fe átiriñein lan seinsu hama íbirigu emegeirúa lun hídehan. Gayaraati giñe hayanuhan hama gumadimatiña ha lídanbaña fulasu le ñein lubéi lasusereda damichi, lugundun gayaraati hídehan lun ménrengun lan lun wagunfulirun lau wadasin. Ligíati, anhein mamuriahóun lubéi huma lun hadügüni, bégitiwa hun, lun mamuriahan humá seinsu hama amu ni lun hóunahan ni kata, maweiyasuhan huguyame lidoun fulasu le ñein lubéi damichi.

Le linarün katei, wéiriti hínsiñe wíbirigu woun, ligía busén wabéi wídehan dan le lasuseredun somu katei houn (Ebü 13:16). Kati gayaraabei wadügüni? Wafurieidun hawagu wíbirigu ha asufurirubaña luma hawagu ha ídehabaña ligía, katei le súdinitimabei. Gayaraati giñe wíchugun budagia lun wadagimanu lánina apurichihani lidan sun ubóu. Ha arihibaña tau burí sukursáli ha ladundehabaña Musu Úaraguati subuditimabalin ida luba lan ani halíaba lan layusurúa budagia. Ani anhein busén wabéi woudin ídeha, gayaraati wabuinchagüdünu gárada Solicitud de voluntario local de diseño y construcción (DC-50).

LÁRIGIÑE HARIHINI BIDÉU LABUINCHUN SARAGU FULASU AGEIRAÜ BÜRASÍLI, ÓUNABA HUMÉI ÁLÜGÜDAHANI LE:

Ka hínsiñetimabei hun lídangiñe wadagimanu le lánina híderawagun íbirigu le hadügübei gefentiña luagu Heowá Bürasíli lárigiñe aban liñawan dan?