Íderagua wamutiña ha asufurirubaña hárabaganali, herigini o katei líbeina lira

Lidan irumu 2020, susereti saragu hárabaganali, herigini o katei líbeina lira ani aba laburuchagun sandi COVID-19. Ka hadügübei gefentiña luagu Heowá lun híderaguniña ha asufurirubaña ladüga turobuli burí le?

Lidan irumu lánina eseriwiduni 2020,a ruti Sétanu le Arihibei lau Híderawagun Íbirigu üma lun layusurúniwa 28 míñunu dólarüb lun híderawagun ha mégeibalin. Yúsuati seinsu le lun híderawagun íbirigu ha ásügürübaña lídangiñe lóugiñe 200 ámuñegueinarügü sügǘ, kéiburi ha asufurirubaña ladüga laburuchagun sandi COVID-19, ladüga ladagarun saragu hiriri, labuinchun saragu fulasu Áfürika, lúan éigini Bénesuela, luma ladüga lumabeigan Sinbabue. Yúsuati budagia le lun libihíniwa éigini, duna, daüguaü, agaranihani luma lun ladarirún halíaba lan heredera gürigia. Yúsuati giñe lun lagañeihóun létima mégeiwabei lun arumadahani, lun tábunawagun muna luma lun laransehóun mégeiti tuagu. Ariha wamá fiu hénpulu lídangiñe le adügǘbei lun híderawagun ha mégeibalin.

COVID-19. Lidan sun ubóu, adügaali sandi le lun wuriba lan hasandiragun wíbirigu houngua, barüti maseinsuni luma luriban átuadi. Ligía loundarúnbei lóugiñe 800 Sétanu le Arihibei lau Híderawagun Asufurirutiña Damichi lun gayara lan híderawagun ha mégeibaña ídemuei. Lílana burí sétanu le arihibalin ka lan hemegeirubei íbirigu ani aba hasubudiragüdüni lun Sétanu le Arihibei lau Híderawagun Íbirigu lun gayara lan lounahóun ídemuei le mégeiwabei.

Lidan sun irumu le, ídehatiña lílana Sétanu le Arihibei lau Híderawagun Asufurirutiña Damichi lun habihin saragu íbirigu éigini, duna, katei burí le lánina arumadahani luma árani létima mégeiwabei. Ani anihein burí fulasu le ídanbei hídeha lílana sétanu burí le hama wéiyaaña lidan afiñeni lun híderaguniña íbirigu ibihei ídemuei le líchugubei lurúeite hageira.

Ariha hamaali gürigia ha mámabaña Gefentiña ídemuei le wíchugubei houn ha emegeirubalin. Kei hénpulu, ariñagati Field Simwinga, hábuti súdara ha Nakondebaña (Sanbia) houn íbirigu: “Sanditiwa luagu dúei wamanün ladüga híderaguniña iduheñu burí ha asufurirubaña damichi dántima le hemegeirunbalin”.

Likesin éigini Angola. Adügati laburuchagun sandi COVID-19 lun lalouguadun éigini ageiraü Angola, adügatiti le lun leserudun éigini saragu. Eibu meha dan, güreweitima lan lun houn íbirigu hagañeihan éigini.

Ligía lamuriahóunbei tuma Beteli to Bürasíliboun lun tíderaguniña íbirigu ha Angolabaña lau hóunahan éigini houn. Lun gayara lan layusurúniwa budagia buidu, aba hakutihani íbirigu furumiñe ida luba lan buídutima lan lagañeihóun luma lounahóun éigini le, ani anúadiratiña hagañeihan saragu éigini lidan aban. Kéiburiñein 22 dólarü hagastarun tuagu kada sagü to gaganaboun 20 kilu (44 líburu) éigini kéiburi ri, eifi luma agülei luma lun hóunahanu. Dagá lumoun guentó ounahóuaaru 33,544 sagü, kéiburi 654 tonelada tihürü (721 tonelada merigein). Sun le luma amu burí katei le agañeihóubei ñéinmeme, seriwiti lun lichugúniwa éigini houn hóugiñe 50,000 gürigia.

Ida liñati hasandiragun wíbirigu houngua? Alexandre, le awinwandubei lidan aban fulasu díseti Angola, ariñagati: “Furanguti narihini luagu hínsiñe nan lun Heowá, luagu mama lan nábuguarügüñadina ani weiri lan nebegi tun lóundarun Heowá”. Ariñagatu Mariza, aban úguchuru to tábuguarügüñoun: “Aganba lumuti Heowá nafurieidun. Seremei numuti tau sun lóundarun”.

Lumabeigan le ageiraübei Sinbabue. Lidan irumu lánina eseriwiduni 2020, ñeinñein aban óunwenbu lumabeigan ageiraü Sinbabue, le adügübei lun ítagaraü yebe lan hóunwegun saragu míñunu gürigia lau ilamaü. Aba lóuguaali lan éigini hama saragu milu íbirigu.

Oundarúati 5 Sétanu le Arihibei lau Híderawagun Asufurirutiña Damichi lun lachülüragüdüniwa éigini houn íbirigu. Ídehatiña saragu san íbirigu apakühei éigini, ádinaguagüdei tidoun ugunei o furedei hamutu hagune.c Lidan irumu lánina eseriwiduni 2020, yúsuati 691,561 dólarü lun lichugúniwa éigini houn hóugiñe 22,700 gürigia.

Lidan fiu kesi, gumuhali meha éigini le hareidubei íbirigu habarua dan le lachülürünbei ídemuei le. Aba híchugun íbirigu seremei lun Heowá ani añahein hádangiñe aba halawahani Heowá lau uremu.

Lidan aban fulasu, ñǘdüntiña biama íbirigu ha hilaali hani weiriei lidan aban adamuridaguni le adügǘbei lidan fulasu le ñein lubéi hawinwanda, le meha ñeinba lubéi layanuhóua luagu aban ídemuei le lunbei tíchuguni aban óundaruni to mama lani urúei. Lidan adamuridaguni ligía, aba hagumeserun ayanuha luagu polítika, aba hanúadirun íbirigu ha máhabaña lan lun le amuriahóubei hámagiñe lun heresibiruni ídemuei le. Dan le hídiña lubéi íbirigu ha, aba hagumeserun gürigia ha ñéinbaña adüga bula hau ani ariñagatiña houn: “Miabin humametia amuriaha éigini wama lárigiñe, higán? Biama dimaasu lárigiñe, ligía hachülürün íbirigu lidoun fulasu ligía ani aba híchugun éigini houn íbirigu würiña ha… saragu dan lubaragiñe lachülürün ídemuei le füramase tubéi óundaruni to mama lani urúei.

Adügati giñe sun le adügǘbei Sinbabue lun híderawagun ha mégeibalin lun hayanuhan gürigia buidu luagu Heowá tuma lóundarun. Ariha waméi le asuseredubei tun Prisca, to awinwanduboun lidan aban liraüraü aüdü. Íbini aniha lan turobuli lánina lumabeigan, sagü luagu-ǘrüwa luma wándaradi táfuridun Prisca apurichiha, íbini lidan lidaani lawouhóun múa lubá bunaguaü. Ábaha hadügün lílana tageira bula tau ani ariñagatiña tun: “Báfaraguaañatia biduheñu lau ilamaü ladüga berederun apurichiha!”. Ábaha tóunabuniña: “Mágurun lumutiña Heowá lubúeingu”. Murusun dan lárigiñe, aba lachülürün éigini le tóunahabei lóundarun Heowá tun. Aba taweiridun hanigi fiu tubesinanigu ani aba hariñagun tun. “Mágurun lumutibu Bungiu. Busentiwa laganwoundun wasubudin luagu”. Guentó, haganbahañein sedü hádangiñe tubesinanigu adamuridaguni le ichugúbei tídangiñe radiu.

Éibume ayarafadeina wamá lun lagumuchagüle ubóu, wagagibudaguba luma hárabaganali, herigini o katei líbeina lira (Matéu 24:3, 7). Wéiriti weteingiruni híchigadi luma budagia burí le híchugubei lun lawanserun wadagimanu lánina apurichihani lidan sun ubóu lídangiñe ámuñegueinarügü ligaburi layusurún donate.jw.org. Wéiribei leseriwidun lun lichugún le mégeiwabei houn íbirigu ha asufurirubaña.