Ídemuei lidan sun ubóu lidan lidaani sandi COVID-19

Lidan ǘrüwa-hati irumu 2020 ariñagatu óundaruni to arihuboun tau wátuadi lidan sun ubóu aburuchaguaali lan Sandi COVID-19, masaminaruntiña yebe aban lan irumu lárigiñe laburuchagun sandi le anihagua lan adüga damichi lidan sun ubóu. Ladüga sandi le, saragu míñunu gürigia, gefentiña luagu Heowá haganagua, súfuri haña saragu lidan ámuñegueinarügü igaburi. Ka aransehani tadügübei lóundarun Heowá lun tíderaguniña íbirigu lidan dan hénrenguti le?

Lichugún ídemuei houn ha mégeibalin

Lábugiñe laríaahan Sétanu le arihibei lau híderawagun íbirigu le lábugiñebei laríaahan Musu Úaraguati le hani gefentiña luagu Heowá, adügaaña aransehani lun ñein lan lóugiñe 950 Sétanu le ídehabei lidan lidaani chagaguaü lidan sun ubóu lun hagagibudagun luma turobuli le lanügübei sandi COVID-19. Lidan fiu kesi, adügati aransehani Sétanu burí le lun híderaguniña íbirigu ha lílanabaña hageira, lidan amu kesi, ibihatiña gefentiña luagu Heowá ídemuei le híchugubei gumadimatiña. Lanwoun lira, adügati Sétanu le ídehabei lidan lidaani chagaguaü aransehani lun híchugun óunwenbu burí ídemuei.

Kei hénpulu, ariha waméi ka lan asuseredubei Páraguai. Ariñagatu aban periodiku, adüga lan sandi le lun maseinsun hamá gürigia Páraguai, darí lun ua lan hama lun hagañeihani heigin. Gama lumoun sétanu le ídehabei lidan lidaani chagaguaü le Páraguai adügaali aransehani lun lafanreinhan éigini houn íbirigu lun ladurarun bián dimaasu. Kada bolsa, le gebegibei 30 dólarü, anihein éigini ñein luma katei burí lun arumadahani habá gádürü lílana iduheñu.

Ka hadügübei ídehatiña ha lun hóunigiragun houngua luéi sandi COVID-19 luma lun hóunigiruniña amu? Yúsutiña lidáü iyumaü ani kípuguatiña houngua díseñu. Chouru hamuti haruma lan fulasu le ñein lubéi hagañeihan éigini hama nadagimeintiña ha ñéinbaña ani gaganbaditiña lan lun gumadi le líchugubei lúrudu luagu arumani. Chouru hamuti sun lan ha adügübalin pakete le, anuhein tan daüguaü to adügüboun lun madaga lan sandi hawagu luma lun harumadahanu karü le ñeinba lubéi hanügei éigini, fulasu le ñein lubéi hakipurei éigini haruma ligía giñe ani ha afanreinhabalin éigini le kípuguatiña houngua díseñu hawéi íbirigu.

Saminawati buidu ida luba lan layusurún budagia

Lidan Eneru irumu 2021, sétanu le arihibei lau híderawagun íbirigu adügatiña aransehani lun hayusurun 25 míñunu dólarü lun híderaguniña íbirigu ha gaturobulinbaña ladüga sandi COVID-19. Góunigi tumuti sukursáli luma Sétanu le ídehabei lidan lidaani chagaguaü budagia le híchugubei gürigia buidu ani adüga hamuti sun hiyaraati lun maserun lan le hagañeihabei houn íbirigu ha emegeirubalin. Kei hénpulu íbirigu ha awinwandubaña Chile, ha lílana sétanu le ídehabei lidan lidaani chagaguaü busentiña hagañeihan 1653 líburu lenteha. Gama lumoun lídanrügü aban hati aba liñurun lebegi lenteha. Aba hadügün íbirigu aransehani lun hagañeihani lenteha le íbini seru lan. Gama lumoun bián oura lárigiñe, aba lariñagun alugurahati houn giribugüda laaru lan aban agañeinhati lenteha to buga agañeiha láaruboun. Ligíati, lubaragiñe lalugurunu lenteha to houn seru, aba lalugurunu houn tebegi meha furumiñe.

Gama lumoun, dan le hóudinbei íbirigu anügoun lenteha, mabusenrunhali alugurúti lalugurunu houn. Aba líchugun duru hawagu máfanreinha hamani éigini lau irichaü, ítara kei hadügün amu óundaruni. Adügati íbiri aban furíei lungua lárigiñe aba labahüdahani lun alugurúti adügaaña aban enkuesta lun lidan sun adamuridaguni lun hasubudiruni ka lan íbirigu mégeibaña lun híderawagun. Aba giñe hafuranguagüdüni íbirigu lun dan lan le hadügünu pakete gabaroun hamani ámuñegueinarügü lan hechun íbirigu ha íderawagunbaña. Ligíati, dan haranseruni pakete ru hamuti katei létima lunbei lahuudun houn kada iduheñu. Chóurugüda hamuti giñe lun, sun budagia le heresibirubei gefentiña luagu Heowá dandu seinsu kei umegeguni maguburahounti luagu. Aba taweiridun lanigi gürigia ligía. Ligíati lálugurubarun lenteha houn maserunga ani mámarügüñein lira ladüga, edewehati giñe 882 líburu lenteha lun dan ya hagañeihan.

“Hínsiñeguatiña hámagua le inarüniti”

Lusu, aban íbiri derebuguharu to hilaali tani weiriei to awinwanduboun Liberia hama seingü tiduheñu. Aban binaafin dan le añaha lan ata bachati ani añaha akutihei bérusu lánina sagü weyu, aba lariñagun tibari Lusu le sédübei irumu lau, úaali  lan éigini múnadoun. Aba lálügüdahan. “Kábati weiga?”, aba tíchugun agütü to dǘgüdaguaü lun irahü le lau tariñagun lun luagu furíei haru lan lun Heowá ani amuriahatu lan luma lun líderagunu, ani chouru tumuti líchugubei lan le hemegeirubei houn. Rábounweyumeme ligía, aba hagúarun wéiyaaña lidan afiñeni tun Lusu aba hariñagun tun gayara lan tidin anüga éigini. Ariñagatu; “Ariñagati nibari nun, chouru lani aganba lani Heowá nafurieidun ladüga óunaba lumuti”.

Aban gürigia lídangiñetu Republika Demokrátiku lani Kongo hóubagiñe fiu iduheñu gefentiña luagu Heowá tawinwanda. Dan le tarihin resibi hamá tubesinanigu éigini hámagiñe amu Gefentiña, ariñagatu: “Danme lásügürün sandi le, wadügaguba woungua gefentiña luagu Heowá, ladüga íderagua hamutiña hábirigu lidan dan hénrenguti le”. Aba lálügüdagunu tani weiriei: Badügaguba san bungua gefenti luagu Heowá tuágurügü aban bolsa ri?”. Aba tóunabuni: “Ua, mámarügü ladüga lira. ladüga arufuda hamá tau bolsa ri to hínseñagua hamá hámagua”.

Seremei luagu budagia le híchugubei, ligía gayara lubéi híderaguniña gefentiña luagu Heowá lau lóufudagun lidan lidaani sandi le. Seremei luagu budagia le híchugubei lidan ámuñegueinarügü igaburi le wadarirubei lidan donate.jw.org.