Rútiwa ídemuei houn wíbirigu lidan irumu 2021

Lidan irumu lánina eseriwiduni 2021,a mígirun lumuti COVID-19 ubóu. Kei lafuranguagüdüniwa lidan ariñahani “Ídemuei le ichugúbei lidan sun ubóu lidan lidaani sandi COVID-19”, gástaadiwa saragu míñunu dólarüb lun gayaraabei lan wagagibudagun luma lénrengunga le ani adügǘwaali lóugiñe 950 sétanu le hani ídehatiña.

Sun anihán lan sandi le adaagua damichi lidan sun ubóu, anihán giñe ámuya chagaguaü anüga fulasu, dandu le lanügübei liñawan dan, hárabaganali o katei líbeina lira kei le ladügübei wügüri, ani sun katei le, bahiguati hawagun wábirigu. Ligía líchugunbei Sétanu le Arihibei lau Híderawagun Íbirigu üma lun layusurún 8 míñunu dólarü lun letenirún houn íbirigu ha asufurirubaña lidan lóugiñe 200 amu chagaguaü le ubouagubei, bóugudin luéi seinsu le ichugúbei lun larihíniwa lau le mégeiwabei lidan lidaani COVID-19. Ariha waméi ida liña lan layusurúniwa budagia le híchugubei lidan bián chagaguaü le málügilibei lúmagiñe lasuseredun.

Laduurun bulugan Nyiragongo

Weyu 22 lidan seingü-hati, irumu 2021, aba laduurun bulugan Nyiragongo, le lídanbei ageiraü Republika Demokrátiku lani Kongo. Günringuati watu le lígiragüdübei bulugan saragu muna, leskuela luma aban lareidahagüle duna. Mámarügüñein le ladüga. Sügüti saragu weyu lau bulugan ígiragüda kaliki péisiniti luagun uburugu Goma ani susereti giñe saragu hárabaganali. Sagawatiña hóugiñe hamidan lílana fulasu ligía ñéingiñe. Anurahatiña saragu milu gürigia ñéingiñe, añahein hádangiñe, chülütiña dagá Ruanda.

Añahein meha hóugiñe 5,000 gefentiña luagu Heowá hadan ha asagarúbaña hageiragiñe. Añahein hádangiñe, féridi hamutu haban ladüga bulugan, añahein amu, belutiña híwerutiña hábiñoun dan le málouga lubéi ñein. Aba hóundarun sétanu ha arihibaña lau híderawagun gürigia ha lídanbaña ageiraü Republika Demokrátiku lani Kongo hama ha lídanbaña ageiraü Ruanda lun hawadigimaridun lidan aban. Abahüdaguatu sukursáli to lani Kongo woun luagu aban lídangiñe sétanu le: “Lubaragiñebei lichugún gumadi houn gürigia lun háfuridun lídangiñe fulasu le lídanbei denchaü, gumeseti sétanu le afanreinha éigini, duna, sidi tuma daüguaü, íbini buin liña meha uburugu hau gürigia ha ibidiñebei houn kaba lan hadüga”. Lidan aban uburugu le ñeinhin lubéi houdin hóugiñe 2,000 íbirigu, aba hachülürün lílana sétanu le íderagubaliña gürigia lun hesetirun kianpu houn luma lun hederegerun lidáü iyumaü houn afuranguagüda haméi houn ka lan lunbei hadügüni lun madagarun lan sandi COVID-19 luma kólera hawagu.

Lidan ǘrüwa hati, afanreinhatiña wábirigu lóugiñe sisi tonelada ri, sisi tonelada fulúaru to lautu awasi, lóugiñe 8 milu líturu agülei le lunti ábouguni luma lóugiñe widü milu líturu duna. Lun magastarun tan sukursáli saragu, agañeinhatu saragu éigini lidan ageiraü lubaragiñe tagañeinhani lídangiñe amu ageiraü.

Abahüdahatu aban íbiri: “Wasufuriruña meha saragu”. Günringualá meha bulugan tuban to iserigiruboun, íbini ítara, resibitu, tuguya hama tiduheñu, ídemuei hámagiñe íbirigu, ru hamuti le hemegeirubei houn dandu lun hawinwandun kei lun hóunigiruni hamadagua luma Heowá. Ani guentó ariñagatu: “Seremei lun Heowá, anihein le wemegeirubei wama. Ariha wamaali woungua ida liña lan líderaguniwa Heowá ani adügati lun ménrengun lan wahandilihani sügǘ le”.

Gudemei Bénesuela

Barühali Bénesuela saragu irumu lidan turobuli lánina maseinsuni. Késiti éigini ñein ani gánwountimarügaali wuribani. Dereti ibagari houn wíbirigu. Lau sun lira, machaga tumutiña lóundarun Heowá.

Lidan irumu lánina eseriwiduni le ásügürübei, gástawaali lóugiñe aban míñunu dimí dólarü lun lagañeihóun éigini luma sabun luma lun lanügǘniwa houn iduheñu hátima emegeirubalin. Afuranguagüdatu sukursáli to Bénesuelaboun: “Aban katei hénrenguti lanügǘn 130 tonelada éigini sagü hati lidoun gádürü larigei ageiraü lun lafanreinhóun houn íbirigu ha emegeirubalin”. Lun meferidirun lan éigini le, aba burí hóunahan íbirigu éigini magadeirati. Sigitu sukursáli ariñaga: “Liibe-agei dan, agañeihatiwa éigini lidan lidaani lalubahóun ani gíbeti wagañeihan, lugundun ítara, maserunti. Lárigiñe, aba wayusurunu ugunei tótima maseruntu lun wachülüragüdüni houn íbirigu”.

Leonel, ligía aban hádangiñe íbirigu ha lídanbaña sétanu le ídehabei Bénesuela, ani hínsiñeti lidasin lun. Ariñagati: “Íderagua laadina neseriwidun lidan híderawagun íbirigu lun buidu lan nasandiragun nungua lárigiñe tounwen nani weiriou ladüga COVID-19. Adügati katei le lun beresegu lan nakipuragun nungua luma lun nasandirun gayara níderaguniña íbirigu ha emegeirubalin. Ariha naali lau nagu guánarügü gúnfuli lani Heowá le füramase lubéi luáguti maweiyasunbei lan águraña lumutuniña”.

Ariha huméi san le labahüdahabei aban íbiri le meha nadagimeinbei lidan sétanu le íderagubaliña gürigia: “Guentó, áuhali meha emegeira ídemuei. Mámarügüñein éigini luma amu katei híchiga íbirigu woun. Íderagua hamutina giñe au tuma nani weiriou lun darangilu wamá, rútiña gurasu woun, góunigi hamutiwa ani rútiña giñe dǘgüdaguaü woun”.

Anihein burí chagaguaü le asusereduti sódini. Íbini ítara, gayaraati tíchuguni lóundarun Heowá le mégeiwabei lau lóufudagun seremei lun budagia le híchugubei lun lamainirún dasi le adügǘbei lidan sun ubóu. Lidan donate.jw.org, harihibei ida luba lan híchugun budagia. Seremei wamutün luagu gíchigadi humá!