Gayaraati gunda humá le tímatimaati

1. Ka san mini lubéi wemegeiruni lídehan Bungiu, ani ka lánibei luma ugundani le wawagubei?

UGUNDANI le tímatimaati mama aban ugundani le aduraruti murusun dan. Gayaraati ladurarun lidan sun wabagari. Lidan yanu le líchugubei Hesusu luagu wübü, arufuda lumuti ida luba lan wadariruni. Ariñagati: “Fuleseiwatiña ha asubudirubalin luagu megei hamani lídehan Bungiu” (Mat. 5:3). Subudi lumuti meha adügǘwa wamá wagía gürigia lau lanarime ayumahani lun wasubudiruni luma lun wáhuduragun lun le Adügübaliwa. Anihán le tabusenrunbei Bíbülia tariñagun dan le tayanuhan luagu ‘megei wamani lídehan Bungiu’. Ani, kei Heowá lubéi “Bungiu le gúndaabei”, wagía ha eseriwidubaña lun gayaraati giñe gunda wamá (1 Tim. 1:11, TNM).

2, 3. a) Kátaña san amu gürigia gayaraabei gunda hamá según le lariñagubei Hesusu? b) Kaba wariha lidan aturiahani le, ani ka uagu megei wabéi wayanuhan luagu katei le?

² Mégeiwati san lun buidu lan léibugun sun katei lidan wabagari lun gunda wamá? Úa. Lidan yanu le líchugubei Hesusu luagu wübü, ariñagati aban katei le aweiridagüdübarun wanigi. Ariñagati: “Fuleseiwatiña ha ayahubaña” gayaraati gunda hamá lau sun sandigua hamá houngua lau duru ladüga figóu o hásügürüña lan lídangiñe somu lénrengunga. Lanwoun lira, ariñagati Hesusu “fuleseiwatiña ha asufurirubaña éibaahouni luagu hadügüni lugundan Bungiu” o ha asufurirubaña anabawaguni ladüga lánigu hamá disipulugu, gayaraati giñe gunda hamá gürigia ha (Mat. 5:4, 10, 11). Gama lumoun, gayaraati san gunda lan aban gürigia le tímatimaati lau sun lásügürüña lan lídangiñe lénrengunga burí le?

³ Arufudahati Hesusu memegeiruwati lan lun buidu lan lidin woun lidan wabagari lun wibihini ugundani le tímatimaati, lubaragiñe lira gúndaatiwa dan le wetenirun lun wamadagua luma Heowá luma lun wayarafadun lun (Sant. 4:8). Ida liña wibihini katei le? Lidan aturiahani le wakutihaba ǘrüwa katei súdiniti le gayaraabei líderaguniwa lun gunda wamá le tímatimaati.

ALIIHA WAMÓUN ANI ATURIAHA WAMÓUN BÍBÜLIA SAGÜ WEYU

4. Ka furumiñeti katei le lunbei wadügüni lun wagundaarun le tímatimaati? (Sálumu 1:1-3).

⁴ FURUMIÑETI KATEI LE LUNBEI WADÜGÜNI: Lun gunda wamá le tímatimaati, mosu waturiahanu luma waliihanu Bíbülia sagü weyu. Lun gayara lan wawinwandun, dandu wagía gürigia kei animaalugu mégeitiña éigini. Gama lumoun gürigiarügüñanu gayara haliihanu Bíbülia, ani mégeitiwa wadügüni. Ligía lariñagubei Hesusu: “Mámarügübei tau fein habagarida gürigia, habagariduba giñe lau sun dimurei le lariñagubei Bungiu” (Mat. 4:4). Ligíati, mígira wamá lun lásügürün aban weyu lun maliiha wamanu Bíbülia to Lererun Bungiu. Ariñagati abürühati Sálumu: “Fuleseiwatiña gürigia ha [...] lídanñein lilurudun Aburemei hínsiñehabu, luagu lúrudu ligía hasaminara, áriebu wéyuagu” (aliiha huméi Sálumu 1:1-3).

5, 6. a) Ka gayaraabei wafurendeirun tídangiñe Bíbülia? b) Ida liña líderaguniwa waliihanu Bíbülia?

⁵ Kei hínsiñe wabéi lun Heowá, ariñaga lumuti woun tidan Bíbülia ka lan gayaraabei wadügüni lun wagundaarun le tímatimaati. Kei hénpulu, arufuda lumuti woun ka lan uagu líchigei ibagari woun, ida luba lan gayara lan gamadagua wamá luma ani ka lan lunbei wadügüni lun feruduna lani wafigoun. Subudigüda lumuti giñe woun luagu lubuidun füramase le füramase lubéi woun lubá ámuñegü (Her. 29:11). Buíngüda lumutu wanigi lau ugundani wasubudiruni inarüni le tariñagubei Bíbülia dan le waturiahanu.

⁶ Ítara kei warihini, anihein saragu adundehani tidan Bíbülia le gayaraabei lahuudun woun lidan wabagari. Dan le wadügüni, gúndaatiwa lidan wabagari. Ligíati, dan le nidiheri wamá ladüga turobuli, sagá wamá dan lun waliihanu Lererun Heowá luma lun wasaminarun luagu le waliihabei. Aba lariñagun Hesusu: “Fuleseiwatimatiña ha aganbubalin ani adüga haméi le lubeibei Bungiu!” (Luk. 11:28).

7. Ida luba wasagarun saragu katei buiti lídangiñe dan le wadireirubei lun waliihanu Lererun Bungiu?

⁷ Dan le waliihanu Lererun Bungiu, sagá wamá dan lun “wasandiruni” le waliihabei. Ka mini lubéi le? Ru wamá aban hénpulu. Samina wamá aba lan lábougu aban gürigia aban éigini le hínsiñeti woun. Gama lumoun kei beresegu waña lubéi furesetiwa ani anihein saragu turobuli wáchügüagü aba wéigini éigini ligía lau lóufudagun ani masandi wamuti lisemén. Dan le lagumuchun weigin aba wíchugun fe furese lan wéigini, ani hínsiñe lan hamuga woun wéigini éigini ligía lau lámarun lun wasandiruni lisemén. Gayaraati lasuseredun ligiaméme woun dan le waliihanu Bíbülia. Háfuga furese wamá darí lun madaani wamá lun “wasandiruni” lisemén le waliihabei. Sagá wamá dan lun waliiha lau dan, wasaminarun luagu sügǘ le waliihabei, waganbuni hamalali ha lídanbaña sügǘ luma wararamagun asaminara luagu le waliihabei. Ánhawa adügei sun katei le gúndaatimabadiwa.

8. Ida liña lagunfulirun “musu úaraguati ani gunfuranda ligía” lau lidasin? (Ariha huméi abürüdǘni).

⁸ Ruti Hesusu aban dasi lun “musu úaraguati ani gunfuranda ligía” lun líchuguni lidan dan ariñahani le mégeiwabei le ítarabei woun kei éigini, ani gíbeti ariñahani líchugun woun (Mat. 24:45).b Tídangiñe Bíbülia lasagarei musu úaraguati sun ariñahani le líchugubei woun (1 Tesa. 2:13). Íderagua lumutiwa ariñahani le asubudirei ka lan lisaminanbei Heowá, ítara kei tarufuduni Bíbülia. Ligía waliihabarun Garüdia Awisahatu tuma agaguduabá!, luma aturiahani le lídanbei jw.org. Aransetiwa giñe lubá adamuridaguni le adügübei labadinagua dimaasu luma le adügübei samudi o dimaasu, ariha wamuti giñe programa le áfuachubei sagü hati lidan JW Broadcasting^® anhein anihein lubéi lidan wererun. Lau wasagarun saragu buiti lídangiñe ariñahani tídangiñebei Bíbülia le, le ítarabei woun kei éigini íderagua lumutiwa lun wadügüni libiaman katei, lun wibihini ugundani le tímatimaati.

GAGANBADI WAMÁ LUN LILURUDUN HEOWÁ

9. Ka libiaman katei lunbei wadügüni lun gunda wamá le tímatimaati?

⁹ LIBIAMAN KATEI LE LUNBEI WADÜGÜNI: Lun gunda wamá le tímatimaati, mosu gaganbadi wamá lun lilurudun Heowá. Ariñagati abürühati Sálumu: “Fuleseiwatibu, buguya le inebehabubei lun Aburemei gaganbadi buguya lun” (Sal. 128:1). Inebewalá Heowá, mini lan, sandi wamá aban óunwenbu inebesei luagu darí lun mabusenrun wamá wadügün somu katei le mínsiñeti lun (Ari. 16:6). Ligía wásigirubei áfaagua lun wagunfulirun lau lilurudun luagu le buídubei luma luagu le wuribabei, ani darí wamuti lúrudu le tidan Bíbülia (2 Ko. 7:1). Ánhawa adügei le mínsiñebei lun Heowá ani dise wagíame luéi le mínsiñebei lun, gúndaatimabadiwa (Sal. 37:27; 97:10; Rom. 12:9).

10. Amu luéi wasubudiruni ka lan lugundanbei Bungiu, ka gayaraabei wadügüni? (Rómana 12:2)

¹⁰ (Aliiha huméi Rómana 12:2). Másiñati anihein lan somu gürigia le asubudirubalin garicha lan Heowá lun lariñaguni le buídubei luma le wuribabei, gama lumoun mosu gaganbadi lan lun lilurudun Bungiu. Ru wamá aban hénpulu. Subudi lumuti aban gürigia garicha lan aban gumadimati lun líchugun lúrudu ida luba lan labugahóun ǘmadarugu, háfuga mabusenrun lan lun gaganbadi lan lun lúrudu ligía. Ábati oufun lan labugahan. Lidan wakesin, larufudubei wagaburi anhein inarüni lubéi afiñen wamá le lan buídubei lun lan inebe lan lilurudun Heowá woun (Ari. 12:28). Afiñeti meha Dawidi ítara liña lan, ligía ariñagubei lun Heowá: “Barufudubei lémeri ibagari nun. Anihein óunweboun ugundani biñuarü” (Sal. 16:11).

11, 12. a) Ka lunbei gabaroun wamani danme le nidiheri wamá o hiru wamá? b) Ida liña líderaguniwa dimurei le lídanbei Filipuna 4:8 lun wanúadirun isebáhari buiti?

¹¹ Dan le nidiheri wamá o hiru wamá, másiñati áluga wamá wadügün somu katei le lunbei líderaguniwa lun wabulieidagun luéi turobuli, gunfurandawati katei le. Gama lumoun, mosu góunigi wamá luéi wadügün somu katei le iyereegubei lun Heowá (Efe. 5:10-12, 15-17).

¹² Tidan gárada to labürüdüboun apostolu Pábulu houn kristiánugu ha Filipubaña, ariñagati houn lun lan hasaminarun luagu sun le richabei, le harumabei, le gunda wabéi lau, luagu sun le buídubei luma sun le gadüna wabéi uéiriguni (aliiha huméi Filipuna 4:8). Lau sun mayanuhan lan Pábulu luagu isebáhari, gayaraati ladundehaniwa dimurei le labürüdübei dan le wanúadirun somu isebáhari. Ka uagu mouchun wabéi wadügüni le? Le ñein lubéi láfuacha dimurei “katei” lidan bérusu le, sansi waméi luagu “uremu”, “pikchá”, “líburu”, o “huraraü tidan konputadora”. Líderagubadiwa katei le lun wasaminarun ka lan katei hínsiñebei lun Bungiu ani ka lan katei mínsiñebei lun. Ladüga busentiwa wawinwandun úara luma lilurudun Heowá (Sal. 119:1-3). Ítara, lau saminaü buiti, gayaraabei wadügüni lǘrüwan katei le gayaraabei líchugun ugundani woun le tímatimaati (Adü. 23:1).

RU WAMÉI WÁHUDURAGUN LUN HEOWÁ LIDAN FURUMIÑETI LÚGAARU

13. Ka lǘrüwan katei le lunbei wadügüni lun wagundaarun le tímatimaati? (Huan 4:23, 24).

¹³ LǗRÜWAN KATEI LE LUNBEI WADÜGÜNI: Mosu wachoururuni wáhuduragun lan lun Heowá ligía lan furumiñe lidan wabagari. Kei Heowá lubéi adügübaliwa, ligía gadünabei lun wáhuduragun lun (Aruf. 4:11; 14:6, 7). Ligíati le súdinitimabei lidan wabagari wáhuduragun lun Heowá kei le aubei labusenra, “lau sífiri luma inarüni” (aliiha huméi Huan 4:23, 24). Busentiwa lun ladundehani lani Bungiu sífiri sandu wáhuduragun lun lun úara lan luma inarüni le tídanbei Bíbülia. Le lunbei súdinitima lan woun weseriwidun lun íbini wawinwanduña lan lidan aban fulasu ñein lubéi máhawa lan lun wapurichiha. Uguñe weyu, añahein hóugiñe 100 íbirigu furisunrugun ladügarügü gefén hamá luagu Heowá.c Íbini ítara, gúndaatiña adüga hamuti sun hayaraati lun hafurieidun, lun haturiahan luma lun hayanuhan houn amu luagu Wabungiute luma luagu Larúeihan. Lau sun hanabaguniwa o héibaahaniwa, gúndaatiwa ladüga wasubudiruni anihein lan Heowá wama ani líchugubei wafayeiruaha woun (Sant. 1:12; 1 Fe. 4:14).

ABAN SÜGǗ INARÜNITI

14. Ka asuseredubei lun aban íbiri nibureinti Tayikistán, ani ka uagu?

¹⁴ Anihein sügǘ inarüniti lánina ibagari le arufudubalin woun gúndaagüda lumutiwa lan le tímatimaati ǘrüwa katei le wakutihabei, meberesenga ka lan gádanbaliwa. Ariha waméi likesin íbiri Yovidón Boboyónov, aban nibureinti 19 irumu lau le awinwandubei Tayikistán. Ladüga lumahan lasudarahan aba houdin anügei lau éregu hábiñegiñe 4 lidan diisi-hati irumu 2019. Daün hamuti luagu fiu hati ani óusera hamuti kamá gürigia wuribati. Fuati ñunsu tidan radiu ítara kei tidan bigibigitu lidan fiu ageiraü luagu marichaü le. Ariñawagúati bulesei hamani dan le hadügüdarunbei luagu lun lariñaguni füramase le burí hariñagubei sun súdaragu luma lun ladaürünu hadaüragun. Lárigiñe aba híchugun lidurun, ñéingiñe aba hóunahani lidoun fulasu le ñein lubéi lawadigimariduniwa saragu darí lun feruduna lani lurúeite ageiraü ani aba líchugun gumadi lun lígiragüdüniwa. Lidan burí sun óuchawaguni le, úaraguati Yovidón ani gúndaati. Ida liña libihini? Lau líchugun fe megei lan ídemuei lúmagiñe Bungiu.

15. Ida liña lakipuruni Yovidón lumadagua luma Heowá sun dan le furisunrugun lubéi?

¹⁵ Dan le furisunrugu lubéi Yovidón, sigiti afurendeira luagu Heowá lau sun ua tan Bíbülia luma ni aban tídangiñe wani agumeiraguagüdüni. Ligíati, ida liña ladüga? Dan le houdin íbirigu íchiga éigini lun, súnwandan barüina hamani bérusu lánina sagü weyu tidan aban bolsa. Ítarati gayara lan laliihanu Yovidón Bíbülia sagü weyu luma lun lararamun asaminara luagu le laliihabei sagü weyu. Dan le láfuridunbei furisunrugúgiñe, ruti adundehani houn ha masügürüngiña lídangiñe óuchawaguni hénrenguti le: “Sagá humá saragu buiti guentó lídangiñe dan le húmabei lúntima hayarafadun lun Heowá. Súdiniti lun haliihanu Bíbülia tuma wani agumeiraguagüdüni”.

16. Ka un letenira Yovidón?

¹⁶ Gaganbaditi wábiri Yovidón lun lugumadin Heowá. Lubaragiñe lígiraguagüdün lungua lun luriban ayumahani luma lun ladügün katei wuribati, aba letenirun lun lumadagua luma Heowá luma lun katei le súdinitimabei lun Heowá. Aba lasagarun dan lun letenirun aríaguei katei buiti le adüga laalibei Bungiu. Sagü meha binaafin lásaaragüdüni heremuhan dunuru, ani sagü guñoun rédeiti aríaguei Hati hama burí waruguma. Ariñagati: “Adügati idewesei le lúmagiñeti Heowá lun nagundaarun luma lun buidu lan nasandiragun nungua”. Dan le wetenirun lun wamadagua luma Heowá luma katei le líchugubei woun, gúndaatiwa, ani ruti ugundani le erei woun lun wawandun.

17. Ida luba líderaguni dimurei le lídanbei 1 Féduru 1:6, 7 aban gürigia le ásügürübei lídangiñe sügǘ libe le lásügürübei Yovidón?

¹⁷ Ru lumuti giñe Yovidón láhuduragun lun Heowá lidan furumiñe lúgaaru. Subudi lumuti le lan súdinitimabei lakipuruni úaraguni lun Bungiu le inarüniti. Ariñagati Hesusu: “Lúnrügüba Bungiu le Babureme báhuduragua; ‘Lúnrügüba giñe beseriwida’” (Luk. 4:8). Busentiña meha gumadan hama súdaragu lun lígiruni Yovidón lafiñen. Gama lumoun, furíeiti lun Heowá tídangiñe sun lanigi wéyuagu áriebu, ani amuriahati luma lun líderaguni awanda luma lun úaragua lan. Lau sun marichaü le lawandubei Yovidón, mábürühanti larüna. Guentó, gunda hali ladüga anihein hali aban katei le meha úabei luma lubaragiñe habuleseiruni luma lubaragiñe hadaürüni: afiñeni le derebuguti (aliiha huméi 1 Féduru 1:6, 7).

18. Ida luba wakipuruni wagundan?

¹⁸ Subudi lumuti Heowá ka lan mégeiwabei lun gunda wamá le tímatimaati. Ánhawa asigirei ǘrüwa katei le akutiha wamaalibei lidan aturiahani le, gúndaabadiwa lau sun gaturobulin wamá. Gayaraabei wariñagun: “Fuleseiwatiña lílana fulasu ha Búngiubei habungiute!” (Sal. 144:15).