“Agúarahati lichú aau ǘmadarugu”

1. Ida liña hóunabun saragu gürigia lun lumalali lichú aau uguñe weyu? (Ariñawagúni 1:20, 21).

LIDAN saragu ageiraü ubouagu kamaniti harihín íbirigu lau ugundani apurichihei uganu luáguti Larúeihan Bungiu tau agumeiraguagüdüni lidan üma le ñéingiñe lubéi hásügüra saragu gürigia. Gadanñaha laadün san lubuidun ligaburi apurichihani le? Anhein adüga humaali lubéi, chóuruti saminaadün lan luagun aban sügǘ le adarirubei tidan líburu Ariñawagúni, layanuhaña luagu lichú aau le agúarahabei ǘmadarugu lun gayaraabei lan haganbuni gürigia adundehani le lariñagubei (aliiha huméi Ariñawagúni 1:20, 21). Dandu tidan Bíbülia kei tidan wani agumeiraguagüdüni dariwati lichú aau inarüniti: lichú aau le lúmagiñeti Heowá. Ligía ariñahani le hemegeirubei gürigia lun hagumeserun éibuga lidan émeri le lánina ibagari. Gúndaatiwa dan le warihin lánharun somu gürigia tun wani agumeiraguagüdüni. Gama lumoun, mama sun gürigia ánhatiña tun. Añahein gürigia himei hamuti masubudirun hamani le tariñagubei Bíbülia. Añahein hagía éheraharügütiña wau ladüga afiñetiña luagu mahuudunhaali lan le tarufudahabei Bíbülia ladüga binaduharu lan. Añahein giñe gürigia ayanuhatiña wuriba luagu le tariñagubei Bíbülia ani ariñagatiña lau ichouruni luagu deregüda lan halurudun ha inebehabubaña lun tilurudun Bíbülia ani sándudua lan hagaburi. Íbini ítara sigiti Heowá íchiga lichú aau le inarüniti houn sun gürigia. Ida liña san ladügüni?

2. Ida luba wadariruni lichú aau le inarüniti uguñe weyu, ani ka hanúadirubei hiibe-agei gürigia hadügün?

² Aban igaburi le layusurubei Heowá lun laganbun lichú aau le inarüniti lau layusurunu Bíbülia to Lererun. Anuhein líburu to hama hiibe agei gürigia ubouagu. Kábati wariñaga tuagu wani agumeiraguagüdüni to asagarúboun tídangiñe Bíbülia? Seremei Heowá, anuheinharu agumeiraguagüdüni lidan lóugiñe 1,000 iñeñein. Ha aganbubaña, lidan amu dimurei, ha aliihabarun Bíbülia tuma burí wani agumeiraguagüdüni, ani winwan haméi le hafurendeirubei, sagatiña saragu buiti. Hiibe-agei gürigia anúadiratiña maganbun hamani lumalali lichú aau le inarüniti. Dan le mosu lan hanúadirun kaba lan hadüga, himei hamuti hafiñerun hawougua o hafalaruni le hariñagubei amu gürigia houn. Gayaraati íbini wayereegudun houn ladüga busén wamá gaganbadi wamá lun le tariñagubei Bíbülia. Lidan aturiahani le wayanuhaba luagu ka lan uagu hóusera gürigia ítara. Furumiñe ariha waméi ida liña lan gayara lan wibihini lichú aau le lúmagiñeti Bungiu.

RUTI SUBUDI LE LÚMAGIÑETI HEOWÁ LICHÚ AAU WOUN

3. Ka lunbei wadügüni lun warufudun lichú aau le inarüniti?

³ Wayusuruni wasubudin lun wanúadahan buidu ligía lichú aubei. Gama lumoun, dan le wayanuhan luagu lichú aau inarüniti, wayanuhaña luagu aban katei wéiritimati. Ariñagatu Bíbülia: “Linebenwa Bungiu lagumesehabei lichú aau; lasubudirúniwa Bungiu, le Sándutimabei, ligía luálinbei ichügü” (Ari. 9:10). Ligíati, dan le lunti lan wanúadirun aban katei súdiniti lunti gabaroun wamani lichú aau le lúmagiñeti Bungiu, lidan amu dimurei, ligaburi lisaminan Heowá. Gayaraati wibihini katei le lau wakutihanu Bíbülia tuma burí agumeiraguagüdüni to asagarúboun tídangiñe. Anhein wadüga, warufudubei chu lan wau (Ari. 2:5-7).

4. Ka uagu lúmagiñerügüñein lubéi Heowá liabin lichú aau le inarüniti?

⁴ Lúmagiñerügüñein Heowá liabin lichú aau le inarüniti (Rom. 16:27). Ka uagu wariñagei lira? Furumiñe, ladüga ligía lan adügübaliwa ani mébehati lisubudin luagu sun le ladügübei (Sal. 104:24). Libiaman, sun le ladügübei arufudati lichú aau (Rom. 11:33). Ani, lǘrüwan, barüti lubuidun ladundehan Bungiu buiti houn ha awinwandubalin (Ari. 2:10-12). Anhein busén wabéi chu lan wau le tímatimaati, mosu wánharun lun ǘrüwa inarüni súdiniti le ani ígira wagíame lun ladundehaniwa lidan le wadügübei luma le wanúadirubei.

5. Ida liña san lidin houn gürigia ladüga maha hamá hafiñerun luagu lúmagiñe lan Heowá liabin lichú aau le inarüniti?

⁵ Saragu hádangiñe gürigia ha únbaña wapurichiha subudi hamuti burí buidu lan katei le geyegubei wau, gama lumoun, máhatiña hánharun luagu Bungiu lan adügübalin, aba hariñagun saliguarügü lan lungua. Añahein amu ariñagutiña afiñe hamá luagu Bungiu, ani saminatiña binaduhali lan lúrudu le tídanbei Bíbülia ani himei hamuti hawinwanduni habagari kei auti habusenra. Ida liña lidin houn? Buídutimahali san léibugun katei ubouagu ladüga hafiñerun gürigia luagu lichú hau lubaragiñe hafiñerun luagu lichú aau le lúmagiñeti Bungiu? Le san lúgubu gunda hamá o anihein aban emenigini le tímatimaati hama lubá ámuñegü? Uá. Le warihibei geyegu wau, chóurugüda lumuti inarüni le woun: “Úati lichú aau gebegiti ligibugiñe Bungiu, ni lualin ichügü ni saminaü buiti” (Ari. 21:30). Ínchaha lumutiwa le lun wasigirun amuriaha luma Heowá lun líchugun lichú aau le inarüniti woun. Híruti madügün hamani hiibe-agei gürigia lira. Ka uagu madügün habalin?

KA UAGU MAHA HABÉI GÜRIGIA LUN LICHÚ AAU LE INARÜNITI?

6. Según Ariñawagúni 1:22-25, kátaña maganbadibaña lun lumalali lichú aau le inarüniti?

⁶ Añahein gürigia meberesegúntiña lau lichú aau le “agúarahabei ǘmadarugu”. Ariñagatu Bíbülia añahein lan ǘrüwa hawuyeri gürigia ha máhatiña lun lichú aau: Ha lóuguabei hasubudin, ha gadaaguadibaña bula hama ha ibidiouguabaña au (aliiha huméi Ariñawagúni 1:22-25). Ariha waméi buidu ka lan uagu maha habéi gürigia ha lun lichú aau lúmagiñeti Bungiu luma ka lan gayaraabei wadügüni lun mítaran wamá kei hagía.

7. Ka uagu añahein lubéi gürigia anúadirutiña herederun lau lilouguan subudi?

⁷ “Ha lóuguabei hasubudin” hagía ha ígiraguagüdübaña houngua lun heyeedún lau lumenrengun (Ari. 14:15). Liibe-agei dan daritiwa gürigia ítaratiña lidan ministeriu. Inarüni añahein lan míñunu gürigia heyeedun tábutigu relihión hama polítiku. Añahein hádangiñe aba lebelurun magundani houn dan le híchugun fe yéedawaaña lan. Ánhañati ha uagubaña layanuha Ariñawagúni 1:22 sigitiña lau lilouguan subudi ladüga ítara liña lan habusenruni (Her. 5:31). Hínsiñeti houn hadügüni le habusenrubei ani mabusenrúntiña hafurendeiruni le tariñagubei Bíbülia ni lun gaganbadi hamá lun tilurudun. Gíbetiña ariñagutiña kei tariñagun aban gürigia ganigitu ligilisi Quebec (Kanadá), to ariñaguboun lun aban Gefenti le abisidahabarun: “Anhein eyeeda láadiwa lubéi wafadirin, mama wadurun lira, lidurun”. Furanguti mabusenrun wamá wáyeihaniña ha anúadirubaña herederun lau libidiounigan aau (Ari. 1:32; 27:12).

8. Kaba íderaguawa lun chu lan wau?

⁸ Ligía tínchahanbaliwa Bíbülia lun merederun wamá lau lilouguan subudi. Lubaragiñe lira, ru tumuti adundehani le woun: “Ítara humá [...] keisi wéinamuhaña lidan ligaburi hasaminarun” (1 Ko. 14:20). Ibihatiwa lichú aau dan le wíchuguni adundehani le tídanbei Bíbülia lidan wabagari. Ariha wamuti woungua murusun murusun luagu íderagua lániwa adundehani le tídanbei Bíbülia lun wanúadahan buidu luma lun wadisedun luéi turobuli. Buiti lun waríaagun woungua lun warihini anhein awanseediwa lubéi. Kéiburi anhein barühadün lubéi saragu dan aturiahoun Bíbülia luma abasiiha adamuridagua ani mederegerun humagili hibagari lun Heowá mabadiseirun huguya; gayaraati hálügüdagun hungua ka lan uagu madügün humagili lubéi. O anhein badiseihadün lubéi, átirihali san hawanserun lidan apurichihani luma larufudahóun uganu buiti? Arufuda lumuti san le hanúadirubei hadügün luagu falá humani adundehani le tídanbei Bíbülia? Óusera humutiña san gürigia kei hamuga lóuseruniña Hesusu? Anhein ariha wabéi gayara lan wabuiduragüdüni wagaburi, ru wamá arigei lun ladundehan Heowá ladüga chúgüdati hau gürigia ha lóuguabei hasubudin (Sal. 19:7).

9. Ida liña harufuduni ha gadügadibaña bula maha hamá lun lichú aau?

⁹ Ha adügübaña bula hagía habiaman hawuyeri gürigia ha madügünbaña gasu lau lichú lau Bungiu. Anihein dan wadunragun hama gürigia ítaratiña lidan wapurichihan. Hínsiñeti houn hadügün bula hau amu (Sal. 123:4). Ariñagatu Bíbülia gíbebaña lan gürigia gadügaditiña bula lidan lagumuhóun dan (2 Fe. 3:3, 4). Ítara kei meha libarimugu wügüri úaraguati Lotu, gürigia ha lídanbaña dan le mabusenrúntiña haganbuni leweridihan Heowá (Agu. 19:14). Gíbetiña adügatiña bula hau ha afalarubalin adundehani le tídanbei Bíbülia. Adügütiña bula ha, ígiraguagüdatiña houngua lun “hayumahan le wíyebei” (Hud. 7, 17, 18). Ma úarati le tariñagubei Bíbülia hawagu ha gadügadibaña bula luma hagaburi ha agarabaagubaña lun Bungiu luma hagaburi amu gürigia ha máhabaña lun Heowá?

10. Según Sálumu 1:1, ka lunbei wadügüni lun méiguadun wamá lidoun hachara ha gadügadibaña bula?

¹⁰ Ka gayaraabei wadügüni lun wóunigiragun woungua lun méiguadun wamá lidoun charati le ídounbei héiguada ha adügübaña bula? Lau madügün wamá umadaguaü hama ha ekeherubaña luagu sun katei (aliiha huméi Sálumu 1:1). Mini lan le maliihan wamá maganbahan wagíame ni kata le ñǘbuinti hámagiñe ha agarabaagubaña lun Bungiu. Ánhawa móunigi gayaraabei wagumeserun achuraha, asandira machouruni luagu Heowá luma luagu adundehani le weresibirubei tídangiñe lóundarun. Lun méiguadun wamá tidoun sádara to, gayaraati wálügüdagun woungua: “Héchutina san ariñaga somu katei wuribati dan le wibihin iseri afuranguagüdüni o iseri adundehani? Héchutina san áluaha mégeiti hawagu íbirigu ha abugurubalin damuriguaü?” Anhein wagidara luriban igaburi le wawariua lau lóufudagun, gúndaabei Heowá wau (Ari. 3:34, 35).

11. Ida liña harihini ha “ibidiouguabaña aau” lilurudun Heowá luáguti laruman ibagari?

¹¹ Ha háürüwan hawuyeri gürigia ha máhabaña lun lichú aau hagía ha “ibidiouguabaña aau”. Wáwati houn ítara ladüga maha hamá hawinwandun úara luma lilurudun Heowá le lánina laruman ibagari. Aba hadügüni le hasaminarubei luagu buidu lan (Ari. 12:15). Máhatiña lun Heowá, le úmagiñebei liabin lichú aau (Sal. 53:1). Dan le wadariruniña lidan apurichihani, gíbeti dan aba lan hayanuhan wuriba wawagu ladüga wánharun lun lúrudu le tídanbei Bíbülia, gama lumoun, úati ni kata buiti le gayaraati hariñaguni woun. Ariñagatu Bíbülia: “Ha ibidiouguabaña aau, ibidiñeti houn kaba lan hariñaga ligibugiñe aguseragüdüti, ladüga díseti lichú aau hawéi” (Ari. 24:7). Ha ibidiouguabaña aau úati ni kata buiti lun hariñaguni. Ligía leweridirunbaliwa Heowá: “Disebá hawéi ibidiougua tau” (Ari. 14:7).

12. Kaba íderaguawa lun mítaran wamá kei ibidiougua tau?

¹² Mítarantiwa kei ha iyereehabúbaña lun ladundehan Heowá, furendeihadiwa asandira ínsiñeni luagu ligaburi lasaminarun Heowá luma luagu sun lilurudun. Gayaraati wéredagüdüni ínsiñeni le lau wagoubaguagüdüni le wibihibei ladüga gaganbadi wamá luma le hibihibei ha maganbadibaña. Luagu aban oubaü, teni wamá lun sun turobuli le ídounbei hádaragua gürigia houngua ladüga maha hamá lun lubuidun ladundehan Heowá. Luagu amu oubaü, samina wamá luagu buídutimahali lan wabagari ladüga gaganbadi wamá lun Bungiu (Sal. 32:8, 10).

13. Fosu lumutiwa san Heowá lun wafalaruni lubuidun ladundehan?

¹³ Agunbiraha lumutiña Heowá sun gürigia lun hibihin lichú aau, gama lumoun, mafosurun lumutiña lun hánharun lun. Le buídubei, afuranguagüda lumuti lan le lunbei lasuseredun houn ha maganbadibaña lun lichú lau (Ari. 1:29-32). Ha anúadirubaña maganbadi hamá lun Heowá “hasufurirubei lafayeiruaha hóuserun”. Lau lásügürün dan, lanügüba ligaburi hawinwandun idiheri luma turobuli houn, ani lagumuhóun lagünrinchagubaña Bungiu. Luagu amu oubaü, ha gaganbadibaña lun lichú lau ladundehan Heowá ani winwan haméi heresibirubei füramasei le: “Ha íchugutiña harigei lun le nubeibei, habagariduba darangilu, ani manufudeuga luéi denchaü” (Ari. 1:33).

BARÜTI LICHÚ AAU INARÜNITI SARAGU BUITI WOUN

14, 15. Ka wafurendeirubei lídangiñe Ariñawagúni 4:23?

¹⁴ Barüti wafalaruni lichú aau le lúmagiñeti Bungiu saragu buiti woun súnwandan. Kei aubei warihei, ru lumuti Heowá lubuidun ladundehan woun lun ménrengun lan wadariruni lichú aau le. Kei hénpulu, lidan Ariñawagúni, ruti adundehani woun le huuti súnwandan, le adügübei lun buídutima lan wabagari anhein wafalara. Akutiha wamá 4 lídangiñe lubuidun burí adundehani le.

¹⁵ Góunigi wamóun wanigi. Ariñagatu Bíbülia: “Lídangiñe sun katei ubouagu, góunigiboun banigi, ladüga tídangiñe liabin ibagari” (Ari. 4:23). Samina wamá ka lan wemegeirubei lun wóunigirunu wanigi buidu. Mosu weigin éigini buiti, wadügün ehersísiu ani mosu giñe wadisedun luéi luriban échuni. Mosu giñe wadügün fiu katei lun wóunigirunu wanigi. Mosu waliihanu Lererun Bungiu sagü weyu. Mégeitiwa giñe waranserun lubá adamuridaguni, woudin adamuridagua ani ru wagíame óunabagülei lidan. Lanwoun lira, mosu giñe wapurichihan súnwandan. Mosu wadisedun luéi furumiñeguarügü katei le gayaraati lawiyeduni wasaminan, kéiburi wadisedun hawéi hagübüri umadagu luma luéi isebáhari le gaganati magíaguni.

16. Ka uagu súdini lubéi adundehani le lídanbei Ariñawagúni 23:4, 5?

¹⁶ Gunda wamá lau le wámabei. Ru tumuti Bíbülia adundehani le: “Máfaaguaba lun barisidun. […] Anhein bariha katei buidu, barihubei luagu ua lan irisini, áhamahati sódini kei ágila kamá hamuga saliguarügüti arünaü luagu” (Ari. 23:4, 5). Ménrengunti leferidirúniwa umegeguni. Íbini ítara, dandu rísitiña kei gudemetiña wéiriti hadiheridun luagu lagañeirún seinsu. Adügati idiheri ligía lun hóuserun lidan aban igaburi le awiyedubalin hiri, gadei ligía hamadagua hama amu ani gádeiti íbini hátuadi (Ari. 28:20; 1 Tim. 6:9, 10). Luagu amu oubaü, adügati lichú aau lun warihini seinsu keisi lubudubu. Íderagua lumutiwa lichú aau lun méiguadun wamá lidoun igaaduaü luma lun gunda wamá lau le wámabei (Apur. 7:12).

17. Ida luba wadimurehan kei ha chúbaña aau ha uágubaña layanuha Ariñawagúni 12:18?

¹⁷ Samina wamá lubaragiñe wayanuhan. Ánhawa móunigi, gayaraati wadügün damichi houn amu lau le wariñagubei. Ariñagatu Bíbülia: “Añahein gürigia, abuleseihatiña láurügü hererun, gama lumoun ha chúbaña aau, areidaguagüdatiña lau hadimurehan” (Ari. 12:18). Ánhawa madimurehan wuriba luagu hachara amu, buídubei wanaagun woungua hama ha híbiri (Ari. 20:19). Lunti lagaranihan le wariñagubei mama lun labuleseihan, lun lira mosu wabuinchagüdünu wanigi lau subudi le tídangiñeti Lererun Bungiu (Luk. 6:45). Dan le wararamagun asaminara luagun adundehani le tíchugubei Bíbülia, gayaraati wariñagun dimurei le íchuguti awalidaguni houn amu (Ari. 18:4.).

18. Ida liña líderaguniwa Ariñawagúni 24:6 lun buidu lan lidin woun lidan apurichihani?

¹⁸ Falá waméi adundehani le tíchugubei lóundarun Heowá. Ru tumuti Bíbülia adundehani huuti le: “Ladüga lau aransehani buiti ladügǘwa wuribu, hádanñein saragu eweridihatiña agañeiruni” (Ari. 24:6). Samina wamá ida liña lan líderaguniwa adundehani le lun buidu lan lidin woun lidan wawadigimari lánina lapurichihóun luma larufudahóun inarüni. Lubaragiñe wapurichihan kei aubei wabusenra, áfaaguatiwa lun wafalaruni adundehani le ichugúbei woun. Resibitiwa adundehani huuti lidan adamuridaguni, le ñein lubéi gayara lan wafurendeirun saragu lídangiñe yanu le burí híchugubei wíbirigu. Rutu giñe lóundarun Heowá agumeiraguagüdüni luma burí bidéu le íderagubaliña gürigia lun gunfuranda hamanu Bíbülia. Furendeihadün san ayusuroun tulu burí to buidu?

19. Ka hasaminarubei luagu lichú aau le líchugubei Heowá? (Ariñawagúni 3:13-18).

¹⁹ (Aliiha huméi Ariñawagúni 3:13-18). Ma lueirin wagundan luagu lubuidun adundehani le wadarirubei tidan Lererun Bungiu! Kaba hamuga wadüga lun hamuga ua lan adundehani le? Lidan aturiahani le, akutihaadiwa hénpulu luáguti lichú aau le tídanbei líburu Ariñawagúni. Ruti giñe Heowá adundehani buiti tidan sun Lererun. Falá waméi lichú lau Heowá súnwandan. Madiheriduntiwa luagu le lasaminarubei ubóu luagu lichú aau le. Chouru wamuti luagu fuleseiwatiña lan ha árügüdübaña luagu.