Barüti lichugún inebesei lun Bungiu buiti woun dandu guentó keime ámuñegü

1, 2. Ida liña genegegua lan le gádanbaliwa luma le meha lásügürübei Lotu?

DAN le warihini liwiye habagari gürigia uguñe weyu, aba wasandiragun woungua kei meha Lotu, aban wügüri úaraguati le meha awinwandubei lidan tidaani Bíbülia. “Le wéiribei lidiheri luagu liwiye hagaburi gürigia wuribatiña” ladüga subudi lani mínsiñe hamá gürigia ha óuserubaña ítara lun Wáguchi le siélubei (2 Fe. 2:7, 8). Furanguti hínsiñe lan meha Heowá lun Lotu ani inebeti meha lun, ani iyereeguti meha hagaburi gürigia ha geyegubaña lau lun. Ítarameme liña giñe wasandiragun woungua. Wawinwanduña lidan aban ubóu le ñein lubéi mineben lan o lougua lan inebesei harufudun gürigia luagu lilurudun Bungiu luáguti laruman ibagari. Íbini laganagua sun katei le, anhein hínsiñe lubéi Bungiu woun ani inebe ligía woun, gayaraabei wakipurun aban ibagari harumati (Ari. 14:2).

² Yusu lumutu Heowá líburu Ariñawagúni lun líderaguniwa ibihei katei le. Sun kristiánugu —wügüriña, würiña, nibureintiña, derebuguhaña…— gayaraabei wasagarun buiti lídangiñe adundehani buiti le wadarirubei tidan líburu to.

GÓUNIGI LUMUTIWA INEBESEI LUN BUNGIU

3. Ka resun wadarirubei lidan Ariñawagúni 17:3 lun wóunigirunu wanigi? (Ariha humóun giñe iyawaü).

³ Wasubudiruni akutiha lanu Heowá wanigi, ligía ábanbei resun súdiniti lun wóunigirunu. Ka mini lubéi katei le? Mini lan, ariha lan Heowá lóugiñe le harihibei gürigia. Subudi lumutiwa múnadagiñe wabiti (aliiha huméi Ariñawagúni 17:3). Anhein ariha Heowá belú lan sun adundehani le líchugubei woun tidoun wanigi, ábame wínsiñedun lun. Tidan aban anigi to buinboun lau lichú aau, mabarati liyeeni ni lilurudun Satanási hama gürigia ha lábugiñebaña lubafu (Huan 4:14; 1 Huan 5:18, 19). Éibume wayarafadun lun Heowá, ábame aganwoundeina lan ínsiñeni luma inebesei le wasandirubei luagu. Mayumahanbadiwa wadügün ni kata le gayaraabei lírudagüdüni Wáguchi Bungiu, masaminarungubeibadiwa wafigouhan luéi wagañidagüdüni. Danme le wagagibudagun luma óuchawaguni, wálügüdaguba woungua: “Ida luba san nírudagüdüni gürigia le unbei nínsiñeda saragu chuñu nau ani le adügaalibei saragu katei nuagu?” (1 Huan 4:9, 10).

4. Lidan tikesin aban íbiri, ida liña lóunigirunu inebesei le tasandirubei luagu Heowá?

⁴ Gagibuguatu meha aban íbiri kroasiana gíritu Martab luma óuchawaguni lun tadügün magíaguni. Abürühatu: “Hénrenguti meha nun lun nasaminarun furangu. Ani hénrenguti meha giñe nun nasagaruni lídangiñe nichügü saminaü le gayaraabei ladügün lun nafigouhan. Lau sun lira, góunigi lumutina inebesei le nasandirubei luagu Heowá”. Ida? Ariñagatu Marta adüga lan inebesei le tasandirubei luagu Heowá lun tararamagun asaminara luagu wuribabei lan lidin tun anhein wuriba tanúadirun. Danme le wagagibudagun luma óuchawaguni, gayaraabei giñe wadügüni ligiaméme. Haritagua waméi wírudagüdüni lan Heowá luma lun lásiñarun wáhuduragun lun lun súnwandan ábanbei lídangiñe katei wuribatimati le gayaraabei lasuseredun woun (Agu. 6:5, 6).

5. Ka hafurendeirubei lídangiñe le asuseredubei lun Leo?

⁵ Dan le inebe lan Heowá woun, madügüntiwa umadaguaü hama gürigia ha adügütiña katei wuribati. Ligía meha lafurendeirubei Leo, aban íbiri le awinwandubei Republika Demokrátiku lani Kongo. Aba meha lagumeserun íbiri le óundaragua hama hagübüri umadagu gádürü irumu lárigiñe labadiseirun. Saminati meha mariban lan gamadagua lan hama umadagu hagía, madügünrügaali ligía katei wuribati ligibugiñe Heowá. Málüti aba láyeihani hagaburi lumadagu ani aba lagumeserun átagua saragu luma adaagua magíaguni. Ábati lararamagun Leo asaminara luagu sun meha le harufudahabei lagübürigu lun ha meha Gefentiña, luma giñe luagu ugundani le meha lasandirubei luagu aban dan lidan leseriwidun lun Heowá. Ábati lasansiruni Leo ligaburi ani lau hídehan wéiyaaña lidan afiñeni, ábaya leseriwidun lun Heowá. Ani uguñe weyu, ábanhali wéiyaali lidan afiñeni Leo, seriwiti kei prekursoru espechaliti ani gúndaati lasandiragun lungua.

6. Kaba wakutiha hawagu bián würiña ha ítarabaña kei hénpulu?

⁶ Guentó, wakutihaali Ariñawagúni kapítulu 9 le ñein lubéi ladarirúa adundehani buiti woun súngubei, dandu wügüriña kei würiña. Lidan kapítulu le, layanuhaña hawagu bián würiña ha ayusurúbaña kei hénpulu. Aban hádangiñe, arufudatu lichú aau ani to aban, arufudatu libidiounigan aau.c Sunme awanha lan aturiahei le líbiri párafu, gabaroun waméi hínsiñe lan magíaguni tuma burí iyawaü o bidéu lánina agamariduni houn lílana ubóu le lábugiñebei lubafu Satanási (Efe. 4:19). Ligía lunti lunbei wasigirun afurendeirei le lunbei wadügüni lun inebe lan Heowá woun luma lun wadisedun luéi katei le wuribabei (Ari. 16:6). Bián würiña ha lúnbaña wayanuhan hawagu, hagunbirahañanu ha “lóuguabaña isubudin”. Ítara liña kamá le hagunbirahañanu hábiñoun eiga (Ari. 9:1, 5, 6, 13, 16, 17). Gama lumoun, lidan bián agunbirahani le ámuñegueinarügüti le asuseredubei ñein. Ka san asuseredubei ñein? Ariha waméi.

MAHA WAMÁ LUN TAGUNBIRAHAN WÜRI “IBIDIOUGUA TAU”

7. Según Ariñawagúni 9:13-18, ka asuseredubei houn ha tagunbirahabaña würi “ibidiougua tau”? (Ariha huméi giñe dibuhu).

⁷ Gumese wamá ayanuha luagu agunbirahani le tadügübei würi “ibidiougua tau” (aliiha huméi Ariñawagúni 9:13-18). Lau mabusigari, agúahatu: “Higougu nun sun lougua tisubudin!”. Ítara liña tagunbirahaniña lougua tisubudin eiga túbiñe. Ka asuseredubei houn ha ebelurubaña túbiñoun? Ha afalarubarun, añahein “guentó lidan habara hilaaña” (Ari. 2:11-19). Mama furumiñe wéiyaasu tayanuhan líburu Ariñawagúni tuagu aban würi ítaratu. Lidan kapítulu le lubaragiñebei burí le, wéridi lumutiwa tuéi “würi to gámaritu” “to ígirubalin túmari”. Ariñagatu Bíbülia: “Ánhabu ñüdün tuma túbiñoun, kéigubeirügü bídiña lan lidoun óunweni” (Ari. 2:11-19). Ariñagati giñe Ariñawagúni 5:3-10 woun lun lan wóunigiragun woungua tuéi “würi gagabarahatu”. Ariñawagúati tuagu: “Leibugúniwa tuma, kéisigubeirügü leibugún lidoun óunweni”.

8. Ka lunbei hanúadiruni ha aganbubalin tumalali würi “ibidiougua tau”?

⁸ Sun ha aganbubalin le tariñagubei würi “ibidiougua tau” lunti hanúadiruni kaba lan hadüga: hánharun lun agunbirahani le tadügübei o hamaharun lun. Ídaba lasusereda aban katei ítarati? Kéiburi dan le lebelurun woun lun wadügün somu figóu le lánina magíaguni o dan le táfuridun iyawaü o bidéu lánina magíaguni. Kaba hamuga wadüga?

9, 10. Ka uagu lunti lunbei wamahadun lun magíaguni?

⁹ Gébunati lun méiguadun wamá lidoun magíaguni. Según líburu to gíriboun Ariñawagúni, ariñagatu würi “ibidiougua tau”: “Bímetimati duna íweruhouarügüti”. Ka mini lubéi “duna le íweruhouarügüti”? Ariñagatu Bíbülia ítara liña lan agamariduni hadan maríeitiña kei duna diliti (Ari. 5:15-18, TNM). Gayaraati larounrun wügüri tuma aban würi, marieirügaaña ligía ligibugiñe lúrudu. Mítaranti “duna le íweruhouarügüti”. Mini lan duna le, magíaguni, ani dürügua lumuti lilurudun Bungiu. Liibe-agei dan, gürigia ha adügübaña magíaguni, adüga hamuti aramudaguarügü, kei ladüga aban híweruti dan le líweruhan. Gürigia ha asaminarubaña haramuduñein lan iwiyei le hadaagubei, gayaraati hasandiruni katei le kei “duna bímeti”. Gama lumoun, heyeedaguña houngua. Lugundun ariha lumuti Heowá sun katei, úatiña ni aban lun heyeeduni. Ani úati ni kata gífitimati luéi weferidiruni wamadagua luma Heowá; mama aban katei bímeti lira (1 Ko. 6:9, 10). Ani mámarügübei ligía weferidira.

¹⁰ Gürigia ha adügübaña magíaguni, gayaraati hasandirun busiganu, hasandirun mebegi hamá, herederun dageinañu mabusenrunga o hagünrinchaguni habagari amu. Furanguti le lan buídutimabei lun máhawa lan lun agunbirahani le tadügübei würi “ibidiougua tau”. Saragu hádangiñe ha éiguadubaña lidoun magíaguni, mama féridirügü hamuti hamadagua luma Bungiu, gayaraati giñe ladagarun sandi máraninati hawagu le anügübaliña lidoun óunweni (Ari. 7:23, 26). Gumuti kapítulu 9 lau dimurei le lídanbei bérusu 18 ítara: “Ha [...] afalarubarun, añahein [...] guentó lidan habara hilaaña”. Kati uéigiñe hánhara saragu gürigia lun agunbirahani le anügübaliña lidoun óunweni? (Ari. 9:13-18).

11. Ka uagu wuriba lubéi taríawagun iyawaü lánina agamariduni?

¹¹ Uguñe weyu, aban sádara kamanitu taríawagun iyawaü lánina agamariduni. Lau sun añahein lan gürigia asaminarutiña mama lan aban katei wuribati taríawagun iyawaü burí to, mítaranti. Adügatu iyawaü burí to lun léchudun gürigia aríaguoun, adügatu wuribani lun gürigia ani adügatu giñe lun leferidiruni gürigia inebesei lúniwagua luma hawagu amu. Hénrenguti tagidarún iyawaü lánina agamariduni lídangiñe saminaü ani barüti saragu dan lun tabulieidúniwa. Lanwoun lira, magida tumuti iyawaü lánina agamariduni luriban ayumahani; rúrügütu lubúa (Kol. 3:5; Sant. 1:14, 15). Le linarün katei, saragu hádangiñe gürigia ha aríagubaña iyawaü lánina agamariduni, aba hábürühan lidoun magíaguni.

12. Anhoun áfuacha iyawaü to gayaraaboun tadügün lun liabin luriban saminaü wachügüwagun, ka gayaraabei wadügüni?

¹² Ka lunbei ladügüni aban kristiánu anhein áfuacha iyawaü lánina agamariduni lidan ligagamurun o tidan lani konputadora fadatu? Lunti ladigiruni larihin tuéi furesegueina ani maha ligíame tun. Aban katei le gayaraabei líderaguniwa adügei katei le, lau ua lan ni kata gebegiti woun luéidügü wamadagua luma Heowá. Ábaya katei, anuhein iyawaü o bidéu le manügǘnti kei katei lánina agamariduni, gama lumoun, gayaraati ladügün lun wagumeserun asaminara luagu magíaguni. Mabusenrúntiwa giñe warihin iyawaü tíbeina burí tura, ka uagu? Ladüga mabusenrun wamá wadügün magíaguni nírügü lidan wasaminan (Mat. 5:28, 29). Ariñagati aban wéiyaali lidan afiñeni tailandiana gíriti Dawidi: “Álügüdaguatina nungua: ‘Hínsiñebei hamuga san lun Heowá lun nasigirun aríagua iyawaü lánina agamariduni íbini menege tan iyawaü lan lánina agamariduni?’. Íderagua lumutina nasaminarun ítara lun buidu lan le lunbei nanúadiruni”.

13. Kaba íderaguawa lun buidu lan wanúadirun?

¹³ Anhein adüga inebesei le wasandirubei luagu Heowá lun madügün wamá somu katei le mínsiñeti lun, ménrenguntimabei woun lun buidu lan le lunbei wanúadiruni wadügün. Ligía lariñagunbei Ariñawagúni 9:10: “Linebenwa Bungiu lagumesehabei [o lébunabei] lichú aau”. Furanguti saminaü le lidan furumiñeti fánreinti lidan kapítulu 9 tidan liliburun Ariñawagúni, le ñein lubéi wadarira aban würi to ítaraboun kei hénpulu luáguti le mini lubéi “lichú aau”.

ANHA WAMÁ LUN AGUNBIRAHANI LE LÁNINA “LICHÚ AAU”

14. Ka amu agunbirahani wadarirubei lidan Ariñawagúni 9:1-6?

¹⁴ (Aliiha huméi Ariñawagúni 9:1-6). Lidan bérusu le, daritiwa aban agunbirahani le ñǘbuinbei lúmagiñe Heowá, Bungiu le Adügübaliwa, le úmagiñebei liabin lichú aau (Ari. 2:6; Rom. 16:27). Lidan kesi le, layanuhaña Ariñawagúni tuagu aban muna wéiritu to sédüñein tuágaburi. Adügati katei le lun wasaminarun gíchigadi lan Heowá, aban Bungiu le ánhabei lau sun lugundan lun leresibiruniña sun ha busenbaña hafalaruni lubuidun ladundehan.

15. Ka agunbirahani ladügübei Bungiu woun?

¹⁵ Aban Bungiu gíchigaditi Heowá ani ruti saragu katei buíduburiti woun. Arihúati le furangu dan le layanuhóun tuagu würi to arufuduboun “lichú aau”, to uáguboun layanuhóua kei hénpulu lidan kapítulu 9 lidan Ariñawagúni. Aranseha taali sun katei: aranseha taali úi buidu tuma diwéin, ani aransehatéi dábula (Ari. 9:2). Lanwoun lira, según bérusu 4 luma 5, ariñagati “lichú aau” houn ha lóuguabaña isubudin: “Higougu heiga”. Ka uagu lunti lubéi wánharun lun agunbirahani le tadügübei würi to? Ladüga busén lan Heowá lóunigiruniña lisaanigu ani busenti giñe líchugun lichú aau houn. Mabusenrunti lun lasuseredun katei wuribati woun ni lun wafurendeirun lau luriban lídangiñe, ni lun wásügürüni sun wabagari asaküriha luagu charati le adüga wamaalibei. Ligíati, “íderagua lumutiña ani góunigi laña [Heowá] ha abagaridubaña lidan úarani” (Ari. 2:7). Anhein inebe lubéi Heowá woun, busenbadiwa wagundaaragüdüni luma lun wafalaruni lubuidun ladundehan. Adügati katei le lun gunda wamá (Sant. 1:25).

16. Kei inebe lubéi Heowá lun Alain, ka katei buiti lanúadirubei ani ida liña lidin lun?

¹⁶ Ariha wamá aban hénpulu le arufudubalin íderagua lániwa inebesei le wasandirubei luagu Heowá lun buidu lan le wanúadirubei. Ariñagati Alain, aban wéiyaali lidan afiñeni ani nadagimeinti kei máisturu tidan aban leskuela: “Saragu hádangiñe nupaanágu lidan wadagimanu ariñagatiña buidu lan taríawagun pikchá lánina agamariduni lun larufudahóun luáguti agamariduni”. Gama lumoun, subudi lumuti Alain iyeeni lan lira. Afuranguagüda lumuti ka lan ladügübei, ariñagati: “Kei inebe lubéi Heowá nun, máhagubeitina naríagunu pikchá burí tuguya. Ani lanwoun lira, aba nafuranguagüdüni houn ha híbiri máisturugu ka lan lébubei mabusenrun nan lun naríagunu katoun burí to”. Ítara liña lafalaruni adundehani le lánina “lichú aau”: “Habagarida kei gürigia huali tichügü” (Ari. 9:6). Añahein hádangiñe lupaanágu, aba taweiridun hanigi luagu lafiñen ani aba hagumeserun aturiahoun Bíbülia ani abasiiha hagía lidoun adamuridaguni.

17, 18. Ka buiti hibihibei ha ánharubaña lun agunbirahani le lani “lichú aau” ani kaba hibiha ámuñegü? (Ariha huméi giñe dibuhu).

¹⁷ Yusu lumuti Heowá hénpulu le ítarabei kei bián würiña, lun larufuduni woun ka lan lunbei wadügüni lun buidu lan lidin woun ámuñegü. Ha ánharubaña lun tagunbirahan würi “ibidiougua tau” ani móusantu, busentiña hasandiruni “libimen nege” ladügǘn magíaguni. Luágurügüñein le habusenrubei hadügün guentó hasaminara, masaminaruntiña luagu ámuñegü, le lunbei lanügüni le hadügübei. Le linarün katei, hóudiña lidoun “habara hilaaña” (Ari. 9:13, 17, 18).

¹⁸ Ánhañati ha ánharubaña lun agunbirahani le ladügübei “lichú aau”, ma lubuidun lidin houn! Gúndaatiña ladüga anihein lan sun katei le hemegeirubei hama lun yarafa hamá lun Heowá (Isa. 65:13). Ariñagati Heowá liyumulugugiñe profeta Isaíasi: “Aganba humana buidu, ábame heigin éigini buiti, éigini semeeti” (Isa. 55:1, 2). Ítara liña, wafureindeiruña lun hínsiñe lan le hínsiñebei lun Heowá woun ani iyereegu ligíame le iyereegubei lun woun (Sal. 97:10). Lanwoun lira, gúndaatiwa lau wagunbirahaniña amu asagara buiti lídangiñe “lichú aau”. Ítara waña kei burí eseriwiduti le uágubei layanuhóua lidan kapítulu 9 lidan Ariñawagúni, le agúarahabei “luéigiñe fulasu le íñutimabei uburugu”. Ítara kei ligía, ariñagatiwa: “Higougu […] lougua tisubudin!”. Dandu wagía kei ha ánharubaña lun agunbirahani le resibitiwa saragu buiti guentó. Ani mámarügübei le weresibira. Weresibiruba giñe saragu buiti ámuñegü. Ánhawa awinwanda kei gürigia “huali tichügü”, gayaraabei wawinwandun lun súnwandan (Ari. 9:3, 4, 6).

19. Según Apurichihati 12:13, 14, ka lunbei wadügüni? (Ariha huméi giñe rekuáduru “Buiti le asagarúbei lídangiñe inebewa lan Bungiu”).

¹⁹ (Aliiha huméi Apurichihati 12:13, 14). Íbini wawinwanduña lan lidan lagumuhóun dan geyegu lau wuribani, busentiwa ítarameme wamá arufuda inebesei lun Heowá. Ítarati, wóunigiruboun wanigi, harumabei wagaburi ani wakipuraguba woungua yarafa lun Heowá. Kei hínsiñe lubéi Heowá woun ani inebe ligía woun saragu, ítarameme waba agunbirahaña sun gürigia ha wayaraatiña lun háluahani “lichú aau” luma lun hasagarun buiti lídangiñe.