Haritagua humagili san?

Aliiha humaaru san sun Garüdia Awisahatu to lánina irumu le? Ariha huméi anhein gayara lubéi hóunabuni álügüdahani burí le:

Kaba buiti wibiha ánhawa asagara dan lun wayanuhan luma Heowá, waganbuni luma lun wararamagun asaminara luagu?

Buídutimabei le lunbei wanúadiruni, buídutima baadiwa keisi máisturugu, derebugutimaabei wafiñen ani wéiritimabei línsiñe Heowá woun (w22.01, páhina 30 luma 31).

Ka uagu buidu lubéi lun wafurendeirun afiñera luagu Heowá luma hawagu íbirigu ha anügübalin ubaraü?

Guentó dánhali lun wafurendeirun afiñera luagu ligaburi ladügüni Bungiu katei. Wadügübei sin wasandirun machouruni luagu le hanúadirubei wéiyaaña lidan afiñeni luma adundehani le híchugubei. Danme le laduurun óunwenbu asufuriruni, aranseñu waba lun gaganbadi wamá lun adundehani le ichugúbei woun íbini genege lanme woun machourun lan. (w22.02, páhina 4 darí 6).

Ka uagu lariñaga aban ánheli lun Sakaríasi larihíba lan aban balu le lánina bunaguaü lúhaburugun gumadimati Sorobaweli? (Sak. 4:8-10).

Ligíati, lachoururagüdüñein meha ánheli houn lumutuniña Bungiu, íbini ni kata lan harihinu fiu gürigia iseri ténpulu, to meha abunúboun, lagumuchuba meha lau tábunawagun ani tagunfuliruba lan meha lau le labusenrunbei Heowá (w22.03, páhina 16 luma 17).

Ka lunbei wadügüni lun wíchugun aban lubuidun hénpulu lau ligaburi wayanuhan? (1 Tim. 4:12).

Lau warufudun ínsiñehabuni luma inebesei lidan apurichihani, weremuhan lau ubebeni lidan adamuridaguni luma lun wéchudun íchiga óunabagülei lidan, wariñaguni inarüni súnwandan, luma lun wíchugun gurasu houn amu lau le wariñagubei lúmati lun mariñagun wamá dimurei le abuleseihati (w22.04, páhina 6 darí 9).

Ka uagu genegegua lubéi ligaburi luma laríawagun mónsturu le tídanbei líburu Arufudúni 13:1, 2 hamoun gádürü mónsturugu (gumadimatiña) ha lídanbaña kapítulu 7 ha tídanbaña liliburun Danieli?

Mónsturu le uágubei layanuhóua lidan Arufudúni 13 mama layanuhaña luagu aban ageiraü le gabafubei lidan sun ubóu, kei meha Roma. Mini lan le layanuhaña lan luagu sun arúeihani le gabafuhalibei hawagu gürigia ubouagu (w22.05, páhina 9).

Ka igaburi súdiniti arufudubalin afiñe wamá luagu liricha Heowá?

Anhein adügaali lubéi aban gürigia lun wasandiragun woungua wuriba o anaba láadiwa lan, magañida wamá luma ni lun wareidahan igarihabu tidan wanigi lubá, ígira waméi sun katei lúhaburugu Heowá. Laransehabei sun wuribani le adüga laalibei figóu (w22.06, páhina 10 luma 11).

Ka lunbei gabaroun lani aban íbiri dan le lafurieidun lidan aban adamuridaguni?

Furíei burí le mama lun lichugún eweridihani lun damuriguaü ni lun lichugún ñunsu. Dántima le lagumeseruña lan adamuridaguni moun lumuti “layusurun saragu dimurei” (Mat. 6:7) (w22.07, páhina 24 luma 25).

Ida luba haguserawagüdün ha lúnbaña háguyugun ha meha adügübalin le wuribabei? (Huan 5:29).

Maguserawagüdünwabaña lun hasiadirún luagu le meha hadügübei lidan dan le sügühalibei. Le lunbei lasuseredun, haguserawagüdüwaba segunme ligaburi hóuserun lárigiñe háguyugun (w22.09, páhina 18).

Ka awisahani aweiridagüdübarun anigi le ladügübei íbiri Joseph Rutherford lidan aban adamurini le adügǘbei lidan nefu-hati irumu 1922?

Lidan aban adamurini Cedar Point (Ohio, Meriga), aba lariñagun Joseph Rutherford: “Ariha humá, larúeihaña Urúei! Huguya ounahóubei lun hayanuhan luagu sun katei le. Ligíati, awisaha humá, awisaha humá, awisaha humá luagu Urúei luma luagu larúeihan” (w22.10, páhina 3 darí 5).

Según kapítulu 30 tidan liliburun Isaíasi, ka ǘrüwa igaburi ídanbei líderaguawa Bungiu awanda?

Arufuda lumuti kapítulu le íderagua lániwa Bungiu awanda 1) ru lan arigei lun wafurieidun ani óunabalei, 2) adundeha lumutiwa ani 3) biní lumutiwa dandu uguñe weyu keime ámuñegü (w22.11, páhina 9).

Ka uagu gayara lubéi wariñagun lau ichouruni gúnfuli lan dimurei le lídanbei Sálumu 37:10, 11, 29 lidan dan le sügühalibei ani lagunfuliruba lan ámuñegü?

Furanguti larufuduni dimurei le lariñagubei Dawidi anihein lan meha darangilaü Ísüraeli, kei hénpulu, dan meha le larúeihabei Salomón. Dan le layanuhanbei Hesusu luagu Paraísu le lunbei liabin ámuñegü, yusu lumuti bérusu 11 (Mat. 5:5; Luk. 23:43, TNM) (w22.12, páhina 8 darí 10, luma 14).