Ru wamá gurasu houn wíbirigu lidan adamuridaguni

1. Ka uagu wíchiga óunabagülei lidan wadamuridagun?

KA UAGU woudin adamuridagua? Létima lébunabei woudin adamuridagua ladüga busén wamá walawahani Heowá (Sal. 26:12; 111:1). Ínchaha lumutiwa giñe adamuridaguni lun wíchugun gurasu wámagua lídantima dan hénrenguti le (1 Tesa. 5:11). Ligíati, dan le wíchugun óunabagülei ibihatiwa bián katei le.

2. Ka chansi wámabei lun wíchugun óunabagülei lidan wadamuridagun?

² Sagü dimaasu gachansintiwa lun wíchugun óunabagülei lidan adamuridaguni. Kei hénpulu, lidan adamuridaguni le adügǘbei samudi o dimaasu gayaraati wíchugun óunabagülei lidan taturiahóun Garüdia Awisahatu. Ani lidan adamuridaguni le adügǘbei labadinagua dimaasu, gayaraati wiñuruni wáhabu lun wíchugun óunabagülei lidan fánreinti le gíribei “Darí wamá pérüla lánina lichú aau”, lidan taturiahóun Bíbülia lidan damuriguaü luma lidan amu burí fánreinti le ñein lubéi lamuriahóua wama lun wíchuguni wóunabagüle.

3. a) Ka katei gayaraabei ladügün lun míchugun wamani wóunabagüle? b) Ida liña líderaguniwa Ebüréu 10:24, 25?

³ Sun wagía busentiwa walawahani Heowá luma lun wíchugun gurasu houn wábirigu lau óunabagülei le wíchugubei. Gama lumoun, anihein fiu katei le adügübei lun míchugun wamá óunabagülei: wanufudedun saragu darí lun mabusenrun wamá wiñuruni wáhabu lun wíchugun óunabagülei o dan le lan wiñuruni wáhabu saragu wéiyaasu ani michugúnwati chansi woun lun wíchuguni sun óunabagülei le hamuga wabusenrubei wíchugun. Tidan gárada to labürüdüboun apostolu Pábulu houn ebüréu, daritiwa saminaü le gayaraabei líderaguniwa. Dan le layanuhanbei Pábulu luagu lisudinin adamuridaguni, ariñaga lumuti kaba lan un wetenira, lariñaga: “Ru wamá gurasu houn wíbirigu” (aliiha huméi Ebüréu 10:24, 25). Anhein gabaroun wamá gayara lan wíchugun gurasu houn amu íbini lau wíchugun aban óunabagülei ménrengunti le arufudubalin wafiñen, mebelubei saragu anufudei woun danme le wiñuruni wáhabu. Anhein siñá lubéi wíchugun saragu óunabagülei kei hamuga wabusenrun, gúndaabadiwa danme le warihin gachansin hamá amu lun hadügüni (1 Fe. 3:8).

4. Kaba ǘrüwa katei wariha lidan aturiahani le?

⁴ Lidan aturiahani le, furumiñe, warihuba ida luba lan wíchugun gurasu wámagua lidan aban damuriguaü ñǘraüti, le ñein lubéi mibe hamá íbirigu ani le ñein lubéi gachansin wamá lun wíchugun saragu óunabagülei. Lárigiñe warihuba ida luba lan wadügüni lidan aban damuriguaü wéiriti, le ñein habéi saragu íbirigu ha busenbaña híchuguni hóunabagüle. Ani lagumuhóun wakutihaba, ida luba lan ligaburi wóunabagüle lun wíchugun gurasu inarüniti houn amu.

IDA LUBA WÍCHUGUN GURASU WÁMAGUA LIDAN ABAN DAMURIGUAÜ ÑǗRAÜTI?

5. Ka gayaraabei wadügüni lun wíchugun gurasu wámagua anhein mibe wabéi lidan adamuridaguni?

⁵ Lidan aban sétanu o lidan aban liraüraü damuriguaü, fiúrügüñanu íbirigu ñein lun hídehan lau hóunabagüle. Anihein dan mosu lan lagurabahan íbiri le alidihabalin adamuridaguni, kaba lan iñurei háhabu. Gayaraati ladügün katei le lun hámaru lan lawanserun adamuridaguni. Ani adügati lun mibihin hamani wábirigu gurasu le hemegeirubei. Ka gayaraabei wadügüni dan le lasuseredun sügǘ libe le? Lunti aranseñu wamá lun wíchugun óunabagülei saragu wéiyaasu. Ítarati, wínchahabaña amu lun giñe hiñuruni háhabu lun hóunabun.

6, 7. Ka gayaraabei hadügüni lun manufudedun humá saragu?

⁶ Láurügü hasaminarun fiu íbirigu híchugun óunabagülei lidan adamuridaguni, adügati lun hanufudedun saragu. Anhein ligía lubéi asuseredubei hun, ka gayaraabei hadügüni? Ka uagu máluahan hubéi ariñahani le gayaraabei líderagunün lun manufudedun humá luma lun gayara lan híchugun gurasu houn amu lau hóunabagüle?

⁷ Aban katei le gayaraabei líderagunün, hakutihan fiu adundehani le meha áfuachubei tidan Garüdia Awisahatu.b Aban lídangiñe adundehani ligía, lun haranserun buidu lubá kada aturiahani (Ari. 21:5). Éibume hasubudiruni ariñahani buidu, ménrenguntimabei hun lun hiñuruni húhabu. Ábaya adundehani buiti le gayaraabei líderagunün, haranserun lun híchugun óunabagülei chátiti (Ari. 15:23; 17:27). Lau híchuguni hóunabagüle lau murusun dimurei, manarimebei anufudei hasandirun. Lanwoun lira, ménrenguntimabei houn íbirigu lun gunfuranda hamani le hariñagubei, háfuga buídurügübei lan lau aban o bián puntu, sügǘ lau aban óunabagülei le migifeti. Ánhadün íchiga óunabagülei le chátiti lau hererun guánarügü, harihubei ha híbiri íbirigu aranse humá buidu ani gunfuranda humani ariñahani.

8. Ka lasandirubei Heowá dan le larihini wáfaaguña lan lun wadügüni sun wayaraati lun wíchuguni wóunabagüle?

⁸ Ánheinti lárigiñe lubéi hafalarun fiu lídangiñe adundehani burí le, adügamémegili anufudei lun ábanrügü lan o biama óunabagülei gayara híchugun, ka gayaraabei hadügüni? Haritagua huméi weiri lan lebegi lun Heowá sun áfaaguni le hadügübei lun híchuguni hóunabagüle (Luk. 21:1-4). Haritagua huméi giñe magurabun lan Heowá lun hadügün lóugiñe le hiyaraabei adüga (Fili. 4:5). Ligíati, gabaroun huméi átiribei lan óunabagülei gayara híchuguni, aranse humá lun híchuguni ani amuriaha humá luma Heowá lun líchugun darangilaü hun. Gayaraati hagumeserun lau híchugun aban óunabagülei le chátiti.

IDA LUBA WÍCHUGUN GURASU WÁMAGUA LIDAN ABAN DAMURIGUAÜ WÉIRITI?

9. Ka katei gayaraabei lasuseredun lidan aban damuriguaü wéiriti?

⁹ Anhein añahein lubéi saragu apurichihatiña lidan damuriguaü le ñein hubéi, háfuga hagagibudaguña luma amu burí sügǘ. Másiñati anihein lan dan siñati híchugun óunabagülei ladüga gibe hamá íbirigu ha busentiña híchuguni hóunabagüle. Samina wamá tuagun Danielle, aban íbiri to hínsiñebei tun tíchugun óunabagülei lidan adamuridaguni.c Súdiniti tun lun lichugún óunabagülei tun ladüga ariha tani kei aban fánreinti lídangiñe táhuduragun lun Heowá, kei aban igaburi lun tíchugun gurasu houn amu ani íderagua lumutu lun lerederun inarüni le tídanbei Bíbülia tichügüwagu. Gama lumoun, dan le tagumeserunbei eseriwida lidan aban damuriguaü wéiriti, míchuhaña meha saragu óunabagülei tun ani anihein meha dan míchugun hamá ni aban tun. Ariñagatu: “Adügati katei le lun wuriba lan nasandiragun nungua. Sandiguatina meha nungua kamá hamuga féridihadina aban dasi súdiniti. Dan le michugún lan saragu chansi bun lun bíchugun óunabagülei, aba bagumeserun asaminara mabuseerunrügühaña lan híchugun óunabagülei bun”.

10. Ka gayaraabei hadügüni lúntima gachansin humá lun híchugun óunabagülei?

¹⁰ Sandiguañahaadün san hungua kei Danielle? Anhein ítara liña lubéi, háfuga saminaadün lan buídutimabei lan lun miñurun humani húhabu, ani lun aganbaharügü humá. Gama lumoun, mábürühala harüna. Ka gayaraabei hadügüni lun gachansintima humá lun híchugun óunabagülei? Ualá gufuruma humá láurügü haranserun aban óunabagülei. Ítara, anhein siñá lubéi híchugun óunabagülei lidan burí furumiñeti párafu, gayaraabei hóunabun lidan furumiñeguarügü párafu. Danme le haranserun lubá taturiahóun Garüdia Awisahati, samina humá ida liña lan lúaradun kada párafu luma tema le lichügüdinabei aturiahani ligía. Ítarati, aranseñu huba lun hóunabun. Ábaya katei le gayaraabei hadügüni, haranserun lidan burí párafu le ayanuhabei luagu inarüni le tídanbei Bíbülia létima hulilibei (1 Ko. 2:10). Kei le hénrengu lubéi lafuranguagüdüniwa, míbetiña íbirigu iñurei háhabu lun hóunabun lidan burí párafu ligía. Ánheinti hénrengumemegili lubéi hun lun híchuguni hóunabagüle lárigiñe hafalaruni sun burí adundehani le lidan saragu adamuridaguni? Lubaragiñe lagumeserun adamuridaguni, gayaraati hayanuhan luma íbiri le alidihabalin aturiahani lun hariñaguni lun ka lan álügüdahani habusenrubei hóunabun.

11. Según Filipuna 2:4, ka gayaraabei wadügüni?

¹¹ (Aliiha huméi Filipuna 2:4). Lau ladundehan lani Bungiu sífiri sandu, ínchaha lumutiña apostolu Pábulu íbirigu kristiánugu lun háluahani le buídubei houn amu. Ida luba wafalaruni adundehani le lidan adamuridaguni? Lau waritaguni busén hamá giñe amu íbirigu híchugun óunabagülei.

12. Ka igaburi buídubei lun wadügüni lun hasandiragun wábirigu houngua heresibiruña lan gurasu lidan adamuridaguni? (Ariha humóun giñe iyawaü).

¹² Ru wamá aban hénpulu le gayaraabei líderaguniwa lun gunfuranda wamani katei le. Ma inarüni dan lan le hayanuhan hama humadagu mámarügüñein huguya ayanuha sun dan, ígiratün giñe lun hayanuhan humadagu, adián? Aban katei ítarati asuseredubei lidan adamuridaguni. Busentiwa lun híchuguni hiibe-agei íbirigu hóunabagüle. Ligíati, aban katei buiti le gayaraabei wadügüni lun wíchugun gurasu houn wábirigu lau wíchugun chansi lun hayanuhan luagu hafiñen (1 Ko. 10:24). Ariha waméi ka lan gayaraabei wadügüni lun híchuguni saragu íbirigu hóunabagüle.

13. Ka gayaraabei wadügüni lun gachansin hamá saragu íbirigu lun híchuguni hóunabagüle?

¹³ Luagu le aban oubaü, lunti chati lan wóunabagüle. Ítara, ñeinbei chansi lun gíbetima hamá íbirigu óunabutiña. Wéiyaaña lidan afiñeni hama amu Gefentiña ha barühaña saragu irumu lidan inarüni lúnbaña híchuguni hénpulu lidan katei le. Lanwoun lira, íbini chátibei lan wóunabagüle, moun lumuti giñe wayanuhan luagu saragu puntu. Ánhadün ayanuha luagu sun puntu le lídanbei párafu, siñabei hadarirun ha híbiri óunabagülei. Kei hénpulu, lidan párafu le, anihein bián adundehani: lunti lan chati lan óunabagülei luma lun mibe lan puntu uáguti hayanuha. Anhein ichugúa furumiñeti óunabagülei hun lidan párafu le, ka uagu mayanuhan hubéi luágurügü aban lídangiñe bián adundehani le ichugúbei lidan párafu le?

14. Ka lunbei gabaroun wamani dan le wanúadirun átiribei lan wéiyaasu wiñuruni wáhabu lun wíchugun óunabagülei? (Ariha humóun giñe iyawaü).

¹⁴ Samina humá hawagun amu danme le hanúadirun átiribei lan wéiyaasu hiñuruni húhabu lun lichugún óunabagülei hun. Ánhawa iñurei wáhabu sun oura, másiñati lasandirun íbiri le alidihabalin aturiahani wafosuruñein lan lun líchuguni óunabagülei woun íbini machansigiña lan ha híbiri íbirigu lun híchuguni hóunabagüle. Lanwoun lira, ladügüba katei le lun hasaminarun amu meseriwín lan áfaaguni le hadügübei lun híchuguni hóunabagüle (Apur. 3:7).

15. a) Ka lunbei wadügüni anhein michugún óunabagülei woun lidan adamuridaguni? b) Ka lunbei gabaroun lani íbiri le adügübalin álügüdahani? (Ariha huméi rekuáduru “Lalidihóun fánreinti le laubei álügüdahani luma óunabagülei”).

¹⁵ Dan le gibe hamá íbirigu ha busentiña híchugun óunabagülei, másiñati siñabei lan wíchugun saragu óunabagülei kei hamuga wabusenrun. Másiñati lagumuchun adamuridaguni míchugunga wagía ni aban óunabagülei. Inarüni gayara lan ladügün katei le lun wuriba lan wasandiragun woungua, gama lumoun moun lumuti ladügün katei le lun wagañidun (Apur. 7:9).

16. Ka gayaraabei wadügün lun wíchugun gurasu houn íbirigu ha íchugubalin hóunabagüle?

¹⁶ Lau sun siñá lan híchugun saragu óunabagülei kei yebe habusenruni, súnwandan gayaraabei lan haganbuni hóunabagüle íbirigu luma lun hariñaguni houn lárigiñe adamuridaguni buidu lan óunabagülei le híchugubei. Másiñati gayaraabei lan heresibirun íbirigu ha saragu dǘgüdaguaü lídangiñe lubuidun burí dimurei le hariñagubei houn ítara kei óunabagülei le yebe habusenrubei híchugun (Ari. 10:21). Dan le wariñagun houn amu buidu lan hadüga, rútiwa giñe gurasu houn.

ÁBAYA KATEI LE GAYARAABEI WADÜGÜNI LUN WÍCHUGUN GURASU WÁMAGUA

17. a) Ka gayaraabei hadügüni agübürigu? b) Según bidéu, ka gádürü adundehani gayaraabei hafalaruni lun haranserun aban óunabagülei? (Ariha huméi giñe abürüdǘni).

¹⁷ Ka amu katei gayaraabei wadügüni lun wíchugun gurasu wámagua lidan adamuridaguni? Anhein gasaanigu hubéi ha ñǘbürigiña, íderagua humaña aransera óunabagülei le gayara habéi irahüñü íchiga según harumudiri (Mat. 21:16). Anihein burí dan akutihóuati tema hanarimeti kei burí turobuli lidan habagari maríeitiña o tema luáguti laruman ibagari. Lau sun lira gayaraati ñeinbei lan aban o bián párafu ñein lun gayaraabei lan híchuguni hisaanigu hóunabagüle. Gayaraati giñe híderaguniña hisaanigu lun gunfuranda hamani ka lan uagu michugúnbei lubéi óunabagülei houn sagü hiñuruni háhabu. Anhein hafuranguagüda katei le houn hisaanigu, mírudunbaña danme le lichugún óunabagülei houn amu ani michugúnti houn (1 Tim. 6:18).d

18. Ka gayaraabei wadügüni lun mayanuhan wamá saragu wawougua dan le wíchuguni wóunabagüle? (Ariñawagúni 27:2).

¹⁸ Sun wagía gayaraati waranserun óunabagülei buiti le íchuguti uéiriguni lun Heowá ani ru ligía gurasu houn wábirigu (Ari. 25:11). Aniheinbei burí dan gayara lan wíchugun óunabagülei luagu le wásügürübei, gama lumoun, moun lumuti wayanuhan saragu wawougua (aliiha huméi Ariñawagúni 27:2; 2 Ko. 10:18). Le lunbei wadügüni, lun wayanuhan luagu Heowá, tuagu Lererun luma hawagu lubúeingu (Aruf. 4:11). Lau sun lira, anhein anihein lubéi aban álügüdahani lidan aban párafu le amuriahabei lun wayanuhan luagu le wásügürübei gayaraabei wadügüni. Hadariruba aban hénpulu lidan le aban párafu.

19. a) Kaba buiti wibiha ánhawa asaminara hawagun amu lidan adamuridaguni? (Rómana 1:11, 12). b) Ka uagu hínsiñe lubéi hun híchugun óunabagülei lidan adamuridaguni?

¹⁹ Íbini ua lan lúrudu le ariñagubei ida luba lan wíchugun óunabagülei lidan adamuridaguni, sun wagía gayaraati wáfaagun lun wíchuguni wóunabagüle lidan aban igaburi le íchuguti gurasu houn íbirigu. Mini lan le houn fiu íbirigu mosu lan haganwoundagüdüni hóunabagüle. Ani houn amu mini lan gufuruma hamá lau chansi le ichugúbei houn lun híchuguni hóunabagüle luma lun gunda hamá luagu añahein lan amu íbirigu ha giñe busentiña híchugun hóunabagüle. Lidan adamuridaguni, ánhawa asaminara hawagun amu, gayaraabei wagundaarun súngubei lau wíchugun gurasu wámagua (aliiha huméi Rómana 1:11, 12).