Sagá wamá saragu buiti lídangiñe dibuhu o iyawaü

Anihein saragu dibuhu o iyawaü tidan wani agumeiraguagüdüni le íderagubaliwa lun wafurendeirun luagu ariñahani le súdinitimabei tidan. Ka gayaraabei wadügüni lun wasagarun saragu buiti tídangiñe?

• Ariha humóun iyawaü o dibuhu lubaragiñe haliihani ariñahani. Gayaraati línchahanün katei le lun busén humá haliihani ariñahani ligía. Ítara kei dan le harihini éigini semeeti lidan hasíete busentün héigini, ligiaméme asuseredubei dan le warihin dibuhu o iyawaü lubaragiñe wagumeserun aliiha somu ariñahani, buídubei lun wálügüdagun woungua: “Ka narihibei?” (Amos. 7:​7, 8).

• Sun haliihañein lan ariñahani ligía, samina humá ka lan uéigiñe tanuadirúa iyawaü o dibuhu ligía. Anhein anihein lubéi somu ariñahani tuagu iyawaü o luagu dibuhu, aliiha huméi le lariñagubei. Houcha humá lun gunfuranda humani ka lan lánibei dibuhu o iyawaü luma aturiahani ligía ani ka hafurendeirubei lídangiñe.

• Danme lagumuchun haliihani ariñahani ligía, yusu huméi dibuhu o iyawaü lun háguyuguagüdüni ariñahani le súdinitimabei. Lárigiñe darú huméi hagu ani houcha humá haritaguni dibuhu o iyawaü to harihuboun lidan ariñahani ligía lúmati ka lan hafurendeirubei lídangiñe.

• Ariha huméi dibuhu o iyawaü le tídanbei garüdia to ani ariha huméi anhein gayara lubéi haritaguni le hafurendeirubei tídangiñe.