Magumuchaditi línsiñehabu Heowá

1, 2. Ida liña hasandiragun saragu íbirigu houngua dan le hagagibudagun luma lénrengunga lánina ibagari?

SAMINA wamá tuagu aban waporu to lídanboun aban liñawan dan. Anihán garabali ayudeihoun ani anihán giñe lugudi barana áfaraha tuagun lau lere, ani genegeti tabulucha lan. Ábanrügüñein katei gayara hadügüni mádulungu, hágurun óunguru lun madibiragun tan.

² Hásügürüña san lídangiñe somu turobuli hénrenguti? Anhein ítara liña lubéi, másiñati sandigua humá hungua kei aban waporu to lunboun tadibiragun. Adügati turobuli le hásügürübei lidan hibagari lun hasandiragun hungua ítara. Anihein dan sandí humá hínsiñe humá lun Heowá ani íderagua lanün, anihein dan hasaminarun meberesen lan Heowá lau le hásügürübei lidan hibagari (Sal. 10:1; 13:1). Másiñati lariñagun aban humada hun somu dimurei le íchuguti gurasu, ani adügati lira lun buidu lan hasandiragun hungua luagu fiu dan (Ari. 17:17; 25:11). Lau lásügürün dan, ábaya lebelurun machouruni hun. Másiñati aba lan hasaminarun mebegi humá lun Heowá. Anhein nihán lubéi le gádanbalün, ida luba “hágurun óunguru”?, mini lan le, ida luba hachoururuni hínsiñe humá lun Heowá ani líderagubadün lan luma lun maweiyasun humá eferidirei ni abulieidei ichouruni ligía?

3. a) Ka mini lubéi ínsiñeni magumuchaditi? (Sálumu 31:7; 136:1). b) Ka uagu wariñaga ua lan ni aban le arufuduti igaburi le buidu buidu luéidügü Heowá? (Ariha huméi giñe dibuhu).

³ Aban katei le lunbei wadügüni dan le wásügürün lídangiñe aban turobuli hénrenguti, waritaguni línsiñehabu Heowá le magumuchaditi, ligía aban igaburi lun “wágurun óunguru” (aliiha huméi Sálumu 31:7; 136:1). Ka mini lubéi dimurei “ínsiñeni magumuchaditi”? Mini lan aban ínsiñeni wéiriti le lasandirubei aban gürigia luagu amu, le adügübei lun úabei lan ni kata lun lafanreinraguagüdüni ínsiñeni ligía. Úati ni aban arufuduti igaburi le buidu buidu luéidügü Heowá. Ariñagatu Bíbülia ariñaga lan Heowá luougua: “Wéiritina lidan ínsiñeni”. Ariñagatu giñe: “Buítibu hama sun ha ayumuragubaña bun” (Afu. 34:​6, 7; Sal. 86:5). Samina humá luagu le mini lubéi bérusu burí le: maweiyasunbei lan Heowá achagaraña lubúeingu ha úaraguabaña lun! Líderagubadiwa waritaguni le lariñagubei bérusu burí le lun wakipuragun woungua derebugu dan le wagagibudagun luma lénrengunga lidan wabagari (Sal. 23:4).

ARIHA WAMÉI LÍNSIÑEHABU HEOWÁ KEI FURUMIÑETI ARUFUDAHANI TÍDANGIÑE BÍBÜLIA

4. Ka burí furumiñeti arufudahani tídangiñeti Bíbülia furendei wamaalibei, ani ka uagu wafiñera luagu sunsuinagubei?

⁴ Warihini línsiñehabu Heowá kei aban lídangiñe furumiñeti arufudahani tídangiñeti Bíbülia, ligía ábanya igaburi lun “wágurun óunguru”, dan burí le wásügürün lídangiñe turobuli. Ka ñübüinbei hichügüwagun dan le haganbuni dimurei furumiñeti arufudahani tídangiñeti Bíbülia? Chóuruti hasaminaruña lan luagu furumiñeti burí inarüni le hafurendeirubei tídangiñe Lererun Bungiu. Kéiburi, Heowá lan líribei Bungiu, Hesusu lan Liraübei Heowá kei ígiramaü, ibidiñe lan ni kata houn hilaaña, ábanbei lan paraísu Ubóu le, luma hawinwanduba lan gürigia ubouagu lun súnwandan (Sal. 83:18; Apur. 9:5; Huan 3:16; Aruf. 21:​3, 4). Dan le lachoururuni aban gürigia Bíbülia lan lébunaboun arufudahani burí le, uaañame ni aban lun heyeeduni. Ítarameme, ánhawa arihei línsiñehabu Heowá kei aban lídangiñe furumiñeti arufudahani tídangiñeti Bíbülia, ménrengutimabei wadireirun luéi luriban saminaü luagu meberesen lan Bungiu lau le asuseredubei woun. Ligíati, sigí wamá ayanuha luagu katei le.

5. Ida liña ladüga aban gürigia lun lígiruni afiñeni mama inarüniti?

⁵ Dan meha le wagumeserunbei aturiahoun Bíbülia, ka meha íderagubaliwa adiseda luéi afiñeni mama inarüniti le meha arufudahóubei woun? Chóuruti aba lan wagoubaguagüdüni arufudahani le meha tarufudahabei relihión to ñein wabéi lumoun le tarufudahabei Bíbülia. Samina wamá afiñe wamá meha luagu Bungiu lan Hesusu. Eibu awansereina wamá lidan waturiahanu Bíbülia, aba wálügüdagun woungua: “Inarüni san le?”. Ábati wakutihani le tarufudahabei Bíbülia ani aba wíchugun fe iyeeni lan le meha uágubei wafiñera. Ábati wamahadun lun arufudahani ligía ani aba wánharun lun inarüni le wafurendeirubei luagu Hesusu lan “ígiramaübei, le lóugiñebei sun katei le adügǘbei” ani ligía lan “Liráü Bungiu le ábanrügüti” (Kol. 1:15; Huan 3:18). Inarüni hénrengu lan lagünrinchawagun “sun aritaguni le múaranbei luma linarün Bungiu” (2 Ko. 10:​4, 5). Dan le ígira wamaali arufudahani mama inarüniti wárigiñegua, mígira wamá lun wagiribudun lidoun afiñeni ligía (Fili. 3:13).

6. Ka uagu láguyuguagüdüwa saragu wéiyaasu lidan Sálumu 136 dimurei “magumuchaditi línsiñehabu” Heowá?

⁶ Gayaraati wadügüni ligiaméme anhein wásügürüña lubéi lídangiñe turobuli luma dan burí le liabin saminaü mabuidunti woun kei burí dan le wasaminarun mínsiñe wamá lun Heowá. Anhein asusereda le woun, álügüdagua wamá woungua: “Inarüni funa san mínsiñe nan lun Heowá?”. Lárigiñe, ábame wagoubaguagüdüni machoururuni le wawagubei lumoun le tarufudahabei Bíbülia luagu línsiñehabu Heowá, le adarirúbei lidan Sálumu 136:​1, le ñéingiñe lubéi lasagarúa liri aturiahani le. Ka uagu lariñaga Heowá magumuchadi lan línsiñehabu? Ka uagu wadarirei dimurei “magumuchaditi línsiñehabu” Heowá 26 wéiyaasu lidan Sálumu le? Kei le aubei warihei, ínsiñeni magumuchaditi le lasandirubei Heowá hawagu lumutuniña, ligía aban lídangiñe furumiñeti inarüni méiniti le tídanbei Bíbülia, kei burí amu arufudahani méiniti le uágubei afiñediwa lan. Ligía mafiñera wamá inarüni lan saminaü luagu meberesen lan Heowá wau, kei mama lubéi inarüniti saminaü le, dísegüda waméi wawariua, ítara kei wadisedagüdün furumiñeguarügü arufudahani le mama inarüniti wawariua.

7. Ka burí bérusu achoururagüdübalin woun hínsiñe wamá lun Heowá?

⁷ Daritiwa saragu bérusu tidan Bíbülia le achoururagüdübalin woun hínsiñe wamá lun Heowá. Ariha wamá bián hénpulu le achoururagüdübalin woun. Ariñagati Hesusu houn lani disipulugu: “Gebegitün sügǘ hau dunuru” (Mat. 10:31). Mariñagunti: “Másiñati gebegi humá sügǘ hau dunuru”. Heowá guánarügü ariñagubei houn lumutuniña: “Rútina erei bun, íderagua numutibu, ágüdaha numutibu lau núhabu le gagañeiradibei” (Isa. 41:10). Mariñagunti Heowá: “Másiñati níderagubadibu lan”. Kei le aubei warihei lidan burí bérusu le, layanuhaña Heowá lau ichouruni luagu líderagubadiwa lan ani gebegitiwa lun. Ligíati, dan le gaturobulin wamá ani ñübuin ligía machouruni woun luagu línsiñehabu Bungiu, mama íderaguarügü lubadiwa bérusu le lun wasandiragun woungua buidu, líderagubadiwa giñe lun wachoururuni hínsiñe wamá lun Heowá. Ligíati, ráramagua wamá asaminara luagu bérusu burí le ani ayanuha wagíame lun Heowá luagu le adügübei lun machourun lan wasandiragun woungua. Anhein wadüga, gayaraabei wariñaguni ligiaméme dimurei libe le hariñagubei kristiánugu ha lánina furumiñeti sígulu ha ariñagubaña ítara: “Ítara liña wayabin asubudirei luma afiñera luagu hínsiñe wamá lun Bungiu” (1 Huan 4:16).a

8. Ka gayaraabei wadügüni ánhawa asaminara mínsiñe wamá lun Heowá?

⁸ Anhein aniheinmémegua lubéi machouruni huagu luagu hínsiñe humá lun Heowá, agoubaguagüda huméi le hasandirubei lumoun le hasubudirubei. Íbini hasandirun mínsiñe humá lun Heowá, subudi huméi mama lan inarüni lira, lugundun arufudahatu Bíbülia hínsiñe wamá lun Heowá. Haritagua waméi súnwandan lan tariñaguni Bíbülia inarüni, anhein le wasandirubei gayaraati leyeeduniwa. Ánhawa afiñera mínsiñe wamá lun Bungiu wabulieiduñein ínsiñeni lan Bungiu (1 Huan 4:8).

RÁRAMAGUA WAMÁ ASAMINARA LUAGU HÍNSIÑE WAMÁ LUN HEOWÁ

9, 10. Ka uagu layanuha Hesusu dan le lariñaguni dimurei le luagu Heowá: “Ligía guánarügü hínsiñetün lun?” (Huan 16:​26, 27; ariha humóun giñe iyawaü).

⁹ Ábanya katei le gayaraabei líderaguniwa lun wafiñerun hínsiñe wamá lun Heowá, lau wakutihani dimurei le lariñagubei Hesusu houn lani disipulugu luagu Heowá, dan le lariñagunbei: “Mariñaguntina luagu nayumuraguba lan lun Núguchi huagu, ladüga ligía guánarügü hínsiñetün lun” (aliiha huméi Huan 16:​26, 27). Ka uagu lariñagei Hesusu dimurei le houn lani disipulugu? Lúnrügü funa san hasandiragun houngua buidu? Uá. Dan le waliiruni bérusu le lubaragiñebei bérusu 26, mama layanuhaña luagu le hasandirubei disipulugu, layanuhaña luagu amu katei: layanuhaña luagu furíei.

¹⁰ Sun liña meha lariñagun Hesusu houn lani disipulugu lunti lan hafurieidun lidan liri, gama lumoun mama lun (Huan 16:​23, 24). Súdiniti meha lun gunfuranda hamani katei le. Ka uagu? Lugundun gayaraati meha lebelurun houn lun hafurieidun lun Hesusu lárigiñe águyuguaali lan, ladüga gamadaguatiña meha luma. Kei weiri lubéi meha hínsiñe lun Hesusu gayaraati hamuga meha hasaminarun, másiña lan busenbei lan Hesusu laganbuni hafurieidun, lárigiñe ábame hamuga lariñaguni lun Lúguchi ka lan hamuriahabei. Ariñaga lumuti Hesusu houn moun lumuti lan hasaminarun ítara, ladüga ariñagati: “Hínsiñetün lun” Bungiu Húguchi le siélubei. Ligíati, Heowá guánarügü aganbubalin wafurieidun, lugundun hínsiñetiwa lun saragu ani ligía aban lídangiñe furumiñeti arufudahani tídangiñeti Bíbülia luagu furíei. Samina wamá luagu le mini lubéi katei le woun. Lau waturiahanu Bíbülia aba giñe wasubudiruni Hesusu ani aba giñe línsiñedun woun (Huan 14:21). Ítara kei disipulugu ha lánina furumiñeti sígulu, gayaraati wafurieidun lun Heowá afiñeñu hínsiñe wamá lun ani laganbubadiwa lan. Sagü wafurieidun lun Heowá warufuduñein afiñe wamá luagu ani hínsiñe lan woun (1 Huan 5:14).

FURANGU LAN WOUN KA LAN ADÜGÜBEI LUN WASANDIRUN MACHOURUNI

11. Ka uagu lagundaara Satanási dan le wagumeserun asandira machouruni luagu línsiñehabu Heowá?

¹¹ Ka adügübei lun wasandirun machouruni luagu hínsiñe wamá lun Heowá? Másiñati wasaminarun Satanási lan, ani ítara liña. Lugundun láluahaña “kaba lan lagünrinchagua” ani busenti lun wasaminarun mínsiñe wamá lun Heowá (1 Fe. 5:8). Gama lumoun, ínsiñeni le lasandirubei Heowá wawagu ligía ínchahabalin lun líchuguni lebegi esefuruni ani busenti Satanási lun wasaminarun madüna wamani idewesei le (Ebü. 2:9). Ka san agundaarubei lau wasandirun machouruni luagu hínsiñe wamá lun Heowá? Satanási. Ka san agundaarubei dan le lábürühan warüna luma dan le wagagibudagun luma turobuli? Satanási giñe. Samina wamá luagu le: ka san eferidirubalin línsiñehabu Bungiu? Ma Satanási! Ani guentoti busenti lun wasaminarun mínsiñe wamá lun Bungiu ani magundan lan wau! Tuguya aban tídangiñe sádara tótima layusuruboun Satanási (Efe. 6:11). Lau wasubudiruni ka lan labusenrunbei libihin, ladügüba katei le lun méiguadun wamá tidoun lisadaran (Sant. 4:7).

12, 13. Ka uagu gayara lubéi ladügün figóu le galagante wabéi lun wasandirun machouruni luagu hínsiñe wamá lun Bungiu?

¹² Mámarügüñein Satanási adüga lun lebelurun machouruni woun luagu línsiñehabu Heowá, anihein giñe ámuya katei: figóu le galagante wabéi (Sal. 51:5; Rom. 5:12). Adügati figóu lun wadisedun luéi Heowá, ani gadei lumuti giñe figóu wasaminan, wanigi luma wágubu.

¹³ Adügaali figóu lun wuriba lan wasandiragun woungua lau burí wasandirun gadurun wamá, lau burí wasandirun idiheri, machouruni, luma busiganu. Sandiguatiwa burí woungua ítara dan le wafigouhan. Wasandiragunbei giñe woungua ítara ladüga subudi wamani gafigoun wamá ani díseediwa luéi igaburi le aubei ladügawa Bungiu (Rom. 8:​20, 21). Ladüga figóu le galagante wabéi, ítara waña kei aban karü to úaali garabali lidan aban lídangiñe tubalabala, siñati tawadigimaridun kei dan le tadügǘnbei. Ligíati maweiridatá wanigi dan le lebelurun machouruni woun luáguti anhein hínsiñe wabéi lun Heowá. Lidan kesi le, haritagua waméi ariñaga tan Bíbülia luagu Heowá: “Bungiu wéiriguti ani hanufunati, buguya le masansiragunbei […] hama ha hínsiñehabubaña bun ani gúnfuli haméi bugumadin” (Neem. 1:5).

14. Ka uagu líderagubadiwa lubéi wasaminarun luagu lebegi esefuruni lun wachoururuni hínsiñe wamá lun Heowá? (Rómana 5:8; ariha huméi giñe rekuáduru le gíribei “Góunigi humá luéi leyeedagunün figóu”).

¹⁴ Másiñati anihein lan burí dan wasandiragun woungua madüna wamani línsiñehabu Heowá. Le linarün katei, madüna wamuti, ligía lébunabei espechali lan ínsiñeni le lasandirubei Heowá wawagu. Úati ni kata lunti wadügüni lun wagañeiruni línsiñehabu. Íbini ítara, hínsiñetiwa lun saragu darí lun líchuguni lebegi esefuruni lun gayara lan ferudunawa lan wafigoun (1 Huan 4:10). Haritagua waméi giñe mama lan liábiña Hesusu esefuraña gürigia mafigountiña, liábiña esefuraña gürigia gafigountiña (aliiha huméi Rómana 5:8). Magurabunti Heowá lun wadügüni katei machararunga, lugundun subudi lumuti siñá wabéi lan. Lau gunfuranda wamani gayara lan ladügün figóu le galagante wabéi lun wasandirun machouruni hínsiñe wamá lun Bungiu, línchahabadiwa katei le lun wadügüni sun wayaraati lun wagidaruni saminaü le wawariua (Rom. 7:​24, 25).

ÚARAGUA WAMÁ LUN HEOWÁ

15, 16. Ánhawa úaragua lun Heowá, ka gayaraabei wachoururuni ani ka uagu? (2 Samueli 22:26).

¹⁵ Busenti Heowá lun buidu lan le lunbei wanúadiruni luma lun madisedun wamá luéi dan le wásügürün lídangiñe turobuli lidan wabagari (2 Lur. 30:​19, 20). Ánhawa úaragua lun, chouru waméi úaraguabei lan giñe woun ani machaga lubadiwa meberesenga le asusereduti (aliiha huméi 2 Samueli 22:26).

¹⁶ Kei le aubei warihei, danme le wásügürün lídangiñe turobuli hénrenguti, le lunbei wadügüni “wágurun ounguru”, mini lan le, waritaguni hínsiñe wamá lun Heowá ani ñeinbei lan warugabu lun líderaguniwa. Ánheinti achülüra dan lun lebelurun machouruni woun, lubaragiñe wetenirun lun ida liña lan wasandiragun woungua, teni wamá lun le wasubudirubei luagu línsiñehabu Heowá. Afiñe wamá sunsuinagubei luagu inarüni le: magumuchadi lan línsiñehabu Heowá.