Ha gíbebaña úmati íderagua hamutiña ha lóuguabaña úmati

Gúnfulitiña gefentiña luagu Heowá lau le lamuriahabei hani relihión hama ani íderagua hamutiña gürigia lidan lóugiñe 200 ageiraü luma lirahüñü fulasu. Lau sun lira, lídanrügüñein 35 ageiraü leresibirúa budagia le nófuti hámagiñe íbirigu ha lídanbaña ageiraü ligía lun hafayeiruni le hemegeirubei. Kati asuseredubei lidan burí fulasu le ñein lubéi lougua lan seinsu?

Akutiha lumuti Musu Úaraguati le hadügübei sun gefentiña luagu Heowá ha ubouagubaña luma le hemegeirubei. Lau saragu góunigi layusurúa budagia le eresibirúabei. Anhoun eresibira aban Beteli lóugiñe seinsu le hemegeirubei, óunaha hamuti le ígiragubei tidoun amu Beteli to mégeibalin. Adügǘwati le lun lafalarúniwa hénpulu le híchugubei furumiñetiña kristiánugu. Yusu hamuti meha le ígiragubei houn lun híderagun amu kristiánugu ha míbebei hama, ítara liña habihin lun ñein lan aban “úarani” (2 Korintuna 8:14).

Ida liña hasandiragun íbirigu ha eresibirubaña seinsu lídangiñe le ígiragubei tun amu Beteli houngua? Kei hénpulu, yúsuati seinsu ligía ageiraü Tansania, le ñein lubéi hawinwanda hóugiñe hamidan lílana lau ǘnabu luéi 2 dólarü luagu weyu, lun taransehóun Luban Hadamuridagun lílana damuriguaü Mafinga. Ariñagatiña íbirigu ha lídanbaña damuriguaü ligía: “Lúmagiñe haranserunu Luban Adamuridaguni, gíbetimahaña achülürütiña adamuridagua. Rútiwa seremei tun lóundarun Heowá luma houn íbirigu ha lídanbaña sun ubóu luagu híchigadi. Guentó, anihein aban fulasu buídumeraüti wama lun wáhuduragun lun Heowá”.

Adügaali laburuchagun sandi Covid-19 lun ñein hamá íbirigu ageiraü Sri Lanka ha lóuguati éigini hadarirun. Haganagua, anuhein íbiri Imara Fernando luma tisaani le ñǘraügilibei, Enosh. Seremei lun budagia le líchugubei amu burí ageiraü, resibi hamuti ídemuei le hemegeirubei. Lárigiñe, aba habürüdün aban tiraüraü gárada to ñein lubéi hariñaga: “Seremei wamutiña íbirigu ha arufudubaña saragu ínsiñeni woun lidan dan hénrenguti le. Gúndaatiwa lau hádangiñetiwa lan iduheñu ha ani awanhagua afurieida lun Heowá lun lasigirun íderaguaña sun íbirigu lidan lagumuhóun dan le”.

Meberesenga halía lan hawinwanda wíbirigu, hínsiñeti houn hafanreinhani hámati hámagua. Kei hénpulu, adügati Enosh aban tiraüraü gafu lun líchugun budagia tidoun lun líderaguniña iduheñu, hátima mégeihabubaña. Wéiriti giñe tíchigadi Guadalupe Álvarez. Méhiku tawinwanda, lidan aban fulasu le ñein lubéi magañeirun hamá hiibe-agei gürigia saragu ani fiúrügüñanu ibihei afayeiruahaü le ǘnabutimabei. Lau sun lira, adüga tumuti sun tiyaraati lun tídehan. Abahüdahatu Guadalupe: “Seremei numuti Heowá luagu lareini luma línsiñehabu. Subudi numuti leseriwiduba lan budagia le níchugubei luma le híchugubei amu lun híderawagun íbirigu ha ásügürübaña lídangiñe lénrengunga”.

Anihein saragu ugundani tidan Beteli luagu gayara lan hóunahani seinsu le ígiragubei houn. Anthony Carvalho, lílana sétanu le arihibei tau Beteli to Bürasíliboun, ariñagati: “Luagu saragu irumu, mosu meha tíderaguniwa amu burí Beteli lau seinsu. Seremei lun ídemuei le, awanseeli wadagimanu lánina apurichihani saragu. Guentó buíduhali léibugun katei wau ani gayaraahali wíderagun amu. Ariha hamuti íbirigu apurichihani kei aban dasi le adügüti lidan sun ubóu ani subudi hamuti luagu gayara lan hídehan, kei lani Hesusu disipulugu ha buítiña”.

Ida luba gayara lan híderaguniña gefentiña luagu Heowá íbirigu ha ásügürübaña lídangiñe mégeiguaü? Buítimati lun híchuguni hani budagia lun lamainirún wadagimanu lánina apurichihani lidan sun ubóu lubaragiñe hóunahani seinsu ligía tidoun Beteli to lídanboun amu ageiraü. Gayaraati híchuguni hani budagia tidoun gafu to lídanboun damuriguaü le ñein hubéi le ñein lubéi lariñaga “Budagia lun lawanserun wadagimanu lánina apurichihani” o lídangiñe donate.jw.org. Wéiriti lebegi sun budagia le híchugubei.