Aban líburu-agei húhaburugu

“Másügürüngili saragu dan lúmagiñe wasaminarun siñabei lan hamuga wibihinu wani agumeiraguagüdüni lidan gágamuru”. Ligiaméme san hasaminarubei? Ariñaga lumuti íbiri Geoffrey Jackson dimurei le lidan Lisisin ariñahani lúmagiñeti Musu Úaraguati, irumu 2020. Ariñagati giñe: “Guentó álügüdaguatiwa woungua kaba lan hamuga wadüga lidan sandi le lun hamuga ua tan tulu kei burí JW Library wama. Sun irumu le ásügürübei laranseruñadiwa Heowá lubá katei libe burí le”.

Ida liña laransehaniwa Heowá? Ka wadagimanu adügǘbei lun ladügǘn programa JW Library? Ani ka lunbei ladügǘn lun lameinirún luma lun labuiduragüdǘniwa?

Furumiñeti programa ítarati

Lidan seingü-hati, irumu 2013, ariñagati Musu Úaraguati lun sétanu le adügübalin programa MEPS, aban departamentu tani sukursáli to arihiboun lau hawadigimari Gefentiña lidan sun ubóu, lun ladügǘn aban programa le ñein lubéi tadarirúwa Traducción del Nuevo Mundo. Ariñagati Paul Willies, le nadagimeinbei lidan departamentu le: “Madügüngidiwa meha aban programa libe le lun larariragüdǘniwa lídangiñe amu burí programa. Lun wadügüni, mosu meha lararamun lídangiñe wadasin, aba wóundarun lun wawadigimaridun lidan amu sétanu Betelirugu. Furíeitiwa saragu, ani ariha wamuti lídehan Heowá: seingü-hati lárigiñe, aba layusurún programa le lidan adamurini irumu-auti”.

Ábaya lénrengunga le úmabei wagagibudagua: wadügüni JW Library kei aban líburu-agei dayarütu, tau saragu agumeiraguagüdüni luma lidan saragu iñeñein. Lídanbei eneru, irumu 2015, anuheinharu meha tiibe-agei agumeiraguagüdüni lidan inglesi ñein, ani sisi-hati lárigiñe, gayaraahali meha tarariragüdǘniwa agumeiraguagüdüni lidan saragu san iñeñein.

Sigitiña íbirigu abuiduragüdei programa le lidan ámuñegueinarügü igaburi. Warigüdatiña bidéu ñein, ani anihein sun le wemegeirubei ñein lun waranserun lubá adamuridaguni. Gayaraati giñe, wakutihan amu ariñahani tídangiñe garüdia adundehani lun taturiahóun Lererun Bungiu.

Estodi waña iserigüdei programa JW Library

Sagü hati beluti lóugiñe 15 míñunu gágamuru o konputadora lidoun programa JW Library. Belutiña 8 míñunu hádangiñe lidoun programa le sagü weyu. Ka san emegeirubei lun lawadigimaridun programa le buidu lidan saragu gágamuru tuma konputadora? Afuranguagüda lumuti Paul Willies: “Wadagimanu le aban wadagimanu le magumuchaditi. Súnwandan dan wíchuguña iseri tulu lidoun programa le lun ménrenguntima lan lawadigimaridun luma lun ménrenguntima lan layusurún. Kei súnwandan lan asansirena lubéi luadigimari gágamuru le iseritimabei, mosu wasigirun awadigimarida lidan programa le lun lúaradun luma gágamuru le iseritimabei. Kei aganwoundeina liña lan ariñahani aganbahóuarügüti tuma águmeiraguagüdüni to lídanboun JW Library, mosu iserigüdeina wamani wani software”. Uguñe weyu, lidan JW Library anuhein kei burí 200,000 agumeiraguagüdüni luma lóugiñe 600,000 ariñahani aganbahóuarügüti luma bidéu lidan ámuñegueinarügü iñeñein.

Lun iserideina lan programa le, mégeiti amu katei luéi hardware tani konputadora. Mégeiwati giñe lun lafayeinhóun saragu lun lichugún üma lun layusurún software. Ani luagu irumu fáyeiwati 1,500 dólarü luagu. Lanwoun lira, Departamentu le Arihibei lau Programa MEPS gástati kei burí 10,000 dólarü luagu irumu lun hagañeihan ámuñegueinarügü burí tuwuyeri konputadora, gágamuru luma katei líbeina lira lun lawadigimaridun programa le maturobulinga, tidan konputadora, tablet luma gágamuru le iseritimagilibei.

Areiragüdüni le ídehabei lun mibe lan seinsu agastarúti

Seremei lun JW Library, magastarun háadiwa saragu seinsu dandu lun imprimírua tan agumeiraguagüdüni kei lun tounahóun. Kei hénpulu, ariha waméi le asuseredubei tun garüdia taturiahóun Lererun Bungiu sagü weyu. To lánina irumu 2013, imprimíruatu 12 míñunu tídangiñe garüdia to. Gama lumoun, to lánina irumu 2020, séingürüñaün míñunu imprimíruatu íbini añaheinhaña lan kéiburi 700.000 apurichihatiña ubouagu. Kagia asusuredubei? Ladüga hiibe-agei hándangiñe wábirigu aliiha hamutu taturiahoun Lererun Bungiu sagü weyu lídangiñe JW Library.a

“Wéiriti lebegi programa le!”

Gayaraati leseriwidun JW Library hun lidan saragu igaburi. Kei hénpulu, ariñagatu aban íbiri gíritu Geneviève, to awiwanduboun Kánada, íderagua laaru lan JW Library lúntima tabuiduragüdüni taturiahan tábuguarügü. Ariñagatu: “Le linarün katei, anhein hamuga lunti lubéi nasagarun saragu líburu lun naturiahan, madügün nubéi yebe sagü binaafin. Gama lumoun, lau JW Library bérügünáaru nani tablet, ani anihein sun le nemegeirubei ñein. Íderagua láadina naturiahan sagü weyu lun héretima lan nafiñen luma lun yarafatima lan nasandiragun nungua lun Heowá”.

Wéiriti lahuudun programa le lídantima Sandi COVID-19. Kei hénpulu, ariñagatu aban íbiri Merigana, gíritu Charlyn: “Lau laburuchagun COVID-19 lidan sun ubóu, barühadina lóugiñe aban irumu meresibirunga agumeiraguagüdüni gárada-autu. Gama lumoun lidan JW Library darí wamuti sun le wemegeirubei lun wawanserun lidan wamadagua luma Heowá. Teinki numuti Heowá luagu lubuidun idewesei le”.

Úarati hasaminarun saragu hádangiñe wábirigu tuma Faye, to awinwanduboun Filipína. Ariñagatu: “Wéiriti lubuidun programa le, ladüga anihein sun le nemegeirubei ñein lúntima yarafa nan lun Heowá. Yusu numuti lun naliihan binaafin, lun naganbahan somu katei le íchuguti dǘgüdaguaü dan le beresegu nan múnada lun naranserun lubá adamuridaguni lúmati lun naturiahanu Bíbülia. Dan le gadaani nan, yusu numuti JW Library lun narihin bidéu. ani dan le nidin adüga mandóu ani mosu nagurabahan, yusu numuti lun naliihanu Bíbülia tuma wani agumeiraguagüdüni. Wéiriti lebegi programa le!”.

Wéiriti giñe lahuudun programa le lidan apurichihani. Kei hénpulu, aban íbiri to awinwanduboun Kamerún hínsiñeti aban bérusu tídangiñeti Bíbülia le tayusurubei tupaaná lidan apurichihani tun saragu. Fiu dimaasu lárigiñe busentu meha íbiri to tayusuruni bérusu ligía, gama lumoun bulíei tumuti ka lan bérusu ligía. Ariñagatu: “Seremei haritagua nan murusun lídangiñe le lariñagubei bérusu ligía. Ligíati aba nebelurun lidoun JW Library tidan Bíbülia aba nabürüdüni dimurei le naritagubei lidan áluahouala. Seremei lun programa le, darí numuti bérusu le nabulieidubei”.

Seremei budagia le híchugubei wábirigu lidan ámuñegueinarügü igaburi le wadarirubei lidan donate.jw.org, gayara lubéi wameiniruni luma wabuiduragüdüni programa JW Library. Ítara liña gayara lan hasagarun íbirigu ha lídanbaña sun ubóu saragu buiti lídangiñe. Rútiwa saragu seremei hun ladüga budagia le híchugubei lau sun hugundan.

Sügǘ burí luáguti JW Library

1. 

   Lidan diisi-hati, irumu 2013: Ladügǘwa programa tau Traducción del Nuevo Mundo to echekürunboun lidan inglesi.

2. 

   Lidan Eneru, irumu 2015: Aba lichugún tanwoun agumeiraguagüdüni lidan inglesi luma lidan saragu san iñeñein.

3. 

   Lidan unsu-hati, irumu 2015: Aba ladügǘn aban iseri tulu le amakürübalin bérusu.

4. 

   Lidan seingü-hati, irumu 2016: Aba ladügǘn aban programa lun “Adamurini”.

5. 

   Lidan seingü-hati, irumu 2017: Aba ladügǘn aban programa lun gayara lan ladügǘn abürüdǘni.

6. 

   Lidan duusu-hati, irumu 2017: Aba tichugún Bíbülia lánina aturiahani lidan inglesi.

7. 

   Lidan ǘrüwa-hati, irumu 2019: Aba ladügǘn aban programa lánina larariragüdüniwa ariñahani aganbahóuarügüti, bidéu luma lun takutihóun Adundehani lun taturiahóun Lererun Bungiu.

8. 

   Lidan Eneru, irumu 2021: Aba ladügǘn iseri programa lun lichugún aturiahani tídangiñeti Bíbülia tau garüdia Winwan humá lau ugundani.