Mabulieidun lumutiña Heowá ha maganbunbaña

Busenti Heowá lun hafurendeirun sun gürigia luagu luma luagu Larúeihan meberesenga le gádanbaliña (1 Timotéu 2:3, 4). Ligía hadügünbei gefentiña luagu Heowá Bíbülia luma burí amu ídemuei lun híderaguniña sun gürigia ha hayara lun haturiahanu Bíbülia, gürigia ha maganbunbaña haganagua. Ligía adügaaru lubéi lóundarun Heowá saragu milu agumeiraguagüdüni lidan burí bidéu lidan lóugiñe 100 iñeñein seini.a Ida liña tadügǘn luma tafanreinhoun agumeiraguagüdüni burí to? Ka aransehani buiti adügǘwaalibei lau lásügürün dan?

Ida liña ladügǘn burí bidéu lidan iñeñein seini?

Lidan sun ubóu, anihein sétanu lánina tásügürawagüdün agumeiraguagüdüni lidoun ámuñegueinarügü iñeñein seini. Dan le mosu lan tásügürawagüdün aban agumeiraguagüdüni, akutiha hamuti lílana kada sétanu ariñahani úara buidu buidu. Lárigiñe, aba hanúadiruni ida luba lan hásügüragüdüni ariñahani ligía lidoun iñeñein seini lidan aban igaburi le gunfurandawati buidu. Lagumuhóun, aba gürawárü hamanu agumeiraguagüdüni lidan bidéu. Guentó, añahein 60 sétanu ásügüragüdütiña agumeiraguagüdüni lun taturiahoun Bíbülia lidoun iñeñein seini ha adügübalin wadagimanu le mararamagunga. Leti líbiri 40 sétanu, adüga hamuti wadagimanu le kada átiri dan.

Lidan dan le sügühalibei, séruti meha ladügǘn burí bidéu lidan iñeñein seini. Lidan dan ligía, sérutimatu meha tulu tuma burí kámara to mégeiwaboun lun ladügǘn wadagimanu le sügǘ lau guentó. Lanwoun lira, tidan meha estudiu gürawárua lan ariñahani le. Anihein meha dan mosu lan wábunagunu muna lun ladügǘn wadagimanu le o waranserun aban muna to anuheinharu wama. Lóugiñeñein meha 30,000 dólarüb agastarúti lun ligirún sun katei aranseñu lun hawadigimaridun aban sétanu ásügüragüdütiña lidoun iñeñein seini.

Lun buidu lan layusurún budagia, áfaaguatu lóundarun Heowá lun lásügürawagüdün lidan aban igaburi buiti ani ménrengun ligía. Lun lira, yusu wamutu tulu burí to iseritimaboun, to maseruntimaboun ani ménrengun ligía tayusurún. Kei hénpulu, memegeirúnwaaru estudiu. Sügügüda hamuti íbirigu bidéu tidan hani áfisi ani yúsutiña aban gamisa bérüde hanagangiñe. Dan le háfuachun saragu íbirigu lidan aban bidéu, adüga hamuti kada aban hádangiñe hani fánreinti tidan hani áfisi o hábiñegiñe.

Adügaadiwa giñe saragu programa tídanti konputadora lun wíderaguniña íbirigu ha ásügüragüdübaña. Ídehaali katei le lun lararirun dan le meha lanügübei tadügǘn aban agumeiraguagüdüni lidan iñeñein seini lun lamidan. Wéiriti heteingiruni íbirigu asansiruni burí le. Ariñagati aban íbiri gíriti Alexánder: “Wéiriti nugundan ladüga gíbetimahali lan bidéu lidan iñeñein seini guentó sügǘ lau lidan amu dan. Sagü weyu narihin somu bidéu”.

Uguñe weyu, magastarúnwaali lóugiñe 5,000 dólarü lun ligirún sun katei aranseñu habá íbirigu ha lúnbaña hásügüragüdün lidoun iñeñein seini. Ídehati katei le lun gíbetima lan iñeñein seini ídanti gayara lan ladügǘn bidéu.

Ida liña lafanreinhóun bidéu lidan iñeñein seini?

Lárigiñe gürawárua tan aban agumeiraguagüdüni, mosu tachülürawagüdün houn ha emegeirubarun. Luagu meha aban dan, ounahóuati meha le gürawáruaalibei tidoun aban bísinisi lun tadügün kopia le gayaraati larihín lidan VHS luma DVD ani lárigiñe, ábaha lounahóun lidoun burí damuriguaü. Lun ladügǘniwa lira, mégeiwati meha saragu dan, áfaaguni luma seinsu. Lídanrügü irumu 2013, gástawati lóugiñe 2,000,000 dólarü lun ladügǘn DVD lidan iñeñein seini.

Lau sun weiri lan meha hagundan gürigia ha maganbunbaña lau bidéu burí le, le linarün katei, anihein meha dan hénrengu lan houn hayusuruni, dántima le aganwoundeina lubéi. Anihein meha kesi mégeiwa lan saragu DVD tun ábanrügü líburu tídangiñetu Bíbülia. Abahüdaguati aban íbiri gíriti Gilnei, le awinwandubei Bürasíli: “Sagü meha wabusenrun waliihan aban bérusu tídangiñe Bíbülia, mosu meha wadariruni kaseti lánina bidéu le ñein lubéi furumiñe ani lárigiñe, mosu meha wáluahani bérusu ligía. Hénrenguti meha katei le”. Aban íbiri gíritu Rafayane, to meha ayusuruboun DVD lidan iñeñein seini, ariñagatu: “Wéiriti meha labuchadun nuagu dan le naturiahan nábuguarügü. Barütina meha saragu dan áluahei bérusu tídangiñeti Bíbülia luma burí amu ariñahani”. Ani dan meha houdin íbirigu apurichiha, mosu meha hanügüni DVD luma burí kaseti hámagua lun híchuguni tidan bigibigitu to hábiñeboun gürigia ha busenbaña hafurendeirun. Ani añahein meha íbirigu barǘ hamuti hamahinan le ídanbei larihúa DVD hámagua. Lauti lásügürün dan, aba láfuridun burí máhina le gayaraati hanaahani gürigia hámagua, le aliihabei DVD ani ménrenguti layusurún. Ariñagati aban íbiri gíriti Bobby, le awinwandubei Meriga: “Lárigiñe barufudun aban bérusu tídangiñeti Bíbülia ani busén buguya barufudun amu, mosu meha basansiruni DVD. Kei meha mégeiwa lubéi dan lun lira, hénrenguti meha warufudun bérusu tídangiñeti Bíbülia houn gürigia dan le wayanuhan hama”.

Lidan irumu 2013, adügatu lóundarun Heowá aban programa gíriti JW Library Sign Language, le ídanbei gayara lan harariragüdün luma harihin íbirigu bidéu lidan iñeñein seini lidan hagagamurun o tablet. Furumiñe, lídanrügüñein meha iñeñein seini le merigana gayara lan layusurúniwa programa le. Lídanti irumu 2017, aba laranserún lun gayara lan lahuudun lidan furumiñeguarügü iñeñein seini. Ma meha lueirin hagundan íbirigu! Ariñagati aban íbiri gíriti Juscelino, le awinwandubei Bürasíli: “Wéiriti meha nugundan. Meredeti meha nasaminarun luagun lueirin ínsiñeni le lasandirubei Musu Úaraguati wawagu wagía le maganbunbei ani busén lan lun wederebudagüdüni wamadagua luma Heowá ítara kei íbirigu ha gayaraabei haganbun. Wéiriti meha nugundan lau programa le ani adügati katei le lúntima busén nan naturiahanu Bíbülia”.

Uguñe weyu, adüga wamuti sun bidéu lídanti iñeñein seini lidan aban igaburi le ídehati lun gayara lan larariragüdüniwa lídangiñe wani páhina lidan Internet luma lídangiñe programa JW Library Sign Language lidoun gágamuru, konputadora o katei líbeina lira. Adügati aransehani le lun tadügǘn, tásügürawagüdün luma tafanreinhóun agumeiraguagüdüni lidan iñeñein seini lídanrügü fiu weyu ani manügünhali wadagimanu le saragu hati o irumu. Darí lun anihein lan iñeñein seini le ídanti táfurida agumeiraguagüdüni lidan ligiaméme dan le ídanbei táfurida lidan iñeñein le ayanuhóuarügüti.

Teni humá lun le hariñagubei fiu íbirigu ha maganbuntiña. Ariñagatu aban íbiri gíritu Klízia: “Ka amu óundaruni bereseboun hau gürigia ha maganbunbaña ítara darí lun tíchugun saragu ariñahani tídangiñeti Bíbülia houn lidan aban igaburi le ménrengunti libihíniwa? Úatu ni aban óundaruni ubouagu adügütu lira wawagu, tuéidigia lóundarun Heowá”. Ariñagati Vladimir: “Arufudahati bidéu burí le nun hínsiñe hamá dandu gürigia ha aganbubaña kei ha maganbunbaña lun Heowá”.

Anihein burí lídangiñe bidéu le wadügübei lidan iñeñein seini le ídanbei wadarirei dimurei burí le: “Malugurahóuntu agumeiraguagüdüni to. Lídangiñeti aban wadagimanu lánina arufudahani tídangiñe Bíbülia le adügǘbei lidan sun ubóu tafanreinhóun ani lau budagia lau gundaü lamainirúa”. Teinki waña hun tídangiñe sun wanigi luagu budagia le híchugubei, liibe-agei dan luéigiñe donate.jw.org. Ídehati seinsu le lun wadügün Bíbülia tuma burí agumeiraguagüdüni lun haturiahanu sun gürigia, íbini ha ayusurubaña seini.