Ariñahani le lunbei lakutihóun lidan adamuridaguni Habagari Kristiánugu luma Heseriwidun
3-9 LIDAN NEFU-HATI
ARUFUDAHANI GEBEGITI TÍDANGIÑETI BÍBÜLIA | HUAN 1, 2
“Ladügüni Hesusu furumiñeti lani milaguru”
(Huan 2:1-3).
Kristu “lubafubei [...] Bungiu”
3 Lidan aban maríei uburugu Kaná ladügei Hesusu furumiñeti lani milaguru. Úati meha buídurügü tan diwéin to lídanboun fedu ligía ani aba meha busiganu lira houn amarieidutiña lugundun mosu meha hetenirun buidu houn sun gürigia ha lídanbaña fedu. Ábati tamuriahan María luma Hesusu lun líderaguniña amarieidutiña hagía. Ka uagu? Subudi tumuti meha profesía luáguti Hesusu buidu ani subudi tumuti meha laguarúba lan lun “Liráü Bungiu le íñubei” (Lúkasi 1:30-32; 2:52). Háfuga giñe samina tan meha gayara lan líderaguniña Hesusu amarieidutiña. Chóuruti busén tan meha María luma Hesusu híderaguniña. Ligía lasaliraguagüdünbei Hesusu 380 líturu (100 galun) duna diweinme to buitu (aliiha huméi Huan 2:3, 6-11). Mama meha mosu ladügüni Hesusu milaguru ligía, ani adüga lumuti ladüga lidiheri hawagu gürigia. Lafalaruñein meha lani Heowá hénpulu le lánina areiduni.
(Huan 2:4-11).
jy-S páh. 41 pár. 6
Ladügüni furumiñeti lani milaguru
Anihán furumiñeti milaguru le ladügübei Hesusu ani héregüda lumuti hafiñen lánigu iseri disipulu luagu. Lárigiñe maríei, aba lidin Hesusu tuma lúguchu luma hama lamulenu Kafarünaumu, uburugu le erederubei béyabu le luágunbei nórute, oubaü le ñeinhin lubéi lálüda weyu libiti barana Galiléa.
Darí wamá pérüla lánina lichú aau
(Huan 1:1, TNM).
Keisi hénpulu, ariha waméi le labürühabei Huan lidan kapítulu 1, bérusu 18: “Úagili ni aban arihiti Bungiu [Suntigabafu]”. Gama lumoun, añahein meha gürigia ariha hamuti Hesusu, le Liráü Bungiu, ariñagati Huan: “Leti Dimureibei [Hesusu], saliguati wügürime, aba labagaridun waganagua. Ariha wamaali luéirigun” (Huan 1:14). Ida lubati lariñawagún lídanñein lan Bungiu suntigabafu Irahü? Ariñagati giñe Huan luagu “ligibugiñeñein lan Bungiu” Dimurei. Ida luba san ligibugiñeñein lan aban gürigia amu gürigia, ani ligiaméme lan gürigia ligía? Lidan Huan 17:3 furanguti larufuduni Hesusu amu lan luéi Lúguchi le siélubei, le unbei lagúara “Bungiu ábanrügüti, le inarüniti”. Lubaragiñe lagumuchunu Huan Liliburun, ariñagati: “Labürüdǘnbei burí le, lun hafiñerun luagu Hesusu lan Krístubei, le Liráü Bungiu” (Huan 20:31). Ariha wamuti mariñagun lan bérusu le Hesusu lan Búngiubei, lariñaga Liráü lan Bungiu. Sun burí dátosu le tídanbei Liliburun Huan, arufuda lumuti ida luba lan gunfuranda wamani Huan 1:1. Aban “bungiu” Dimurei, o Hesusu, arufudati le aban lan gürigia le íñuti lubara, ani mítaran lan kei Bungiu le suntigabafu.
(Huan 1:29).
nwtsty abürüdǘni lau lanwoun ariñahani luagu Hn 1:29
mudún le lóunahabei Bungiu: Lárigiñe labadiseirun Hesusu luma lárigiñe lóuchaguni Mafia, aba lasubudiragüdüni Huan le abadiseihabei kei “mudún le lóunahabei Bungiu”. Yárügüñein láfuacha dimurei le luma lidan Huan 1:36 (ariha humóun sgd, seksióun 4, páh. 20, 21). Gayaraati lariñawagún ítara liña lan Hesusu kei aban mudún. Rútiña saragu gürigia ha uágubaña tayanuha Bíbülia mudún lun Bungiu keisi adagaragüdüni lugundun subudi hamuti meha gafigoun hamá ani busentiña meha hayarafadun lun. Arufuda lumuti sákürifisiu burí ligía, le meha lunbei ladügüni Hesusu lau líchuguni libagari hawagu gürigia. Gayaraati layanuhaña lan meha dimurei “mudún le lóunahabei Bungiu” luagu saragu sügǘ le tídanbei Bíbülia. Kei subudi lani meha Huan le abadiseihabei Abürüdǘni Ebüréu buidu, másiñati fuá lan dimurei le lariñagubei lídangiñe katei burí le: gábara le líchugubei Abüraámü kei adagaragüdüni gudawarügüti leweñegua Isaakü, le liráü (Agu 22:13), mudún le lánina luéyuri Esefuruni le háfarubei ísüraelina lubaragiñe lesefuruniña Bungiu luéi amudirawaguni Ehiptu (Afu 12:1-13) o mudún le meha ichugúbei lun Heowá kei adagaragüdüni sagü weyu binaafin luma guñoun Herusalén (Afu 29:38-42). Másiñati giñe haritagua lan Huan luagu profesía le lariñagubei Isaíasi ñein lubéi lariñaga Heowá lanügǘba lan lubúein “kei mudún [...] lun lafarún” (Isa 52:13; 53:5, 7, 11). Dan le labürüdünbarun apostolu Pábulu furumiñetu ligaradan houn Korintuna ariñagati Hesusu lan “mudunbei lánina wesefurun” (1 Ko 5:7). Ariñagati apostolu Féduru ítara liña lan lita Kristu “kei aban mudún le úati mégeiti luagu” (1 Fe 1:19). Ani yúsuati dimurei “Mudún” keisi hénpulu tidan líburu Arufudúni lóugiñe wein-seingü wéiyaasu lun layanuhóun luagu Hesusu le unbei lichugúa uéiriguni (ariha humá fiu hénpulu lidan: Aruf 5:8; 6:1; 7:9; 12:11; 13:8; 14:1; 15:3; 17:14; 19:7; 21:9; 22:1).
10-16 LIDAN NEFU-HATI
ARUFUDAHANI GEBEGITI TÍDANGIÑETI BÍBÜLIA | HUAN 3, 4
“Lapurichihan Hesusu tun aban würi samariana”
(Huan 4:6, 7).
nwtsty abürüdǘni lau lanwoun ariñahani luagu Hn 4:6
buchá lan luagu: Lídanrügüñein bérusu le tariñaga Bíbülia “buchá lan luagu” Hesusu. Kéiburihali meha ladaürün duusu amidi. Másiñati aweiyasuha lan Hesusu binaafin ligía lúmagiñe fulasu wayati ani gadunariti Hordán (Hudéa) darí Síkarü (Samaria), amudeireina 900 méturu (3,000 ugudi) o lóugiñe lidan üma le múaranti (Huan 4: 3-5; ariha humóun sgd, seksióun 4, páh. 20, 21).
(Huan 4:21-24).
(Huan 4:39-41).
Darí wamá pérüla lánina lichú aau
(Huan 3:29).
nwtsty abürüdǘni lau lanwoun ariñahani luagu Hn 3:29
lumada adari: Lidan meha tidaani Bíbülia, óuserati meha besi lumada adari kei le ayanuhabei luagu lufulesein adari luma kei le arihibei luagu sun aransehani lubá maríei. Yuuti meha lun lóundaraguniña adarigu. Chülütiña meha adarigu hau sun gürigia ha úarabaña hama lúbiñoun umadaü ligía o lúbiñe lúguchi adari lun hadügüni fedu ñein. Lidan añahán lan meha lidan fedu, gúndaati meha lumada adari ladüga laganbuniña adarigu ayanuha, mini lan meha lira gúnfuli lan lau lidasin. Aba lariñagun Huan le Abadiseihabei ítara liña lan kei “lumada adari”. Hesusu meha adaribei ani ítarahaña meha sun lánigu disipulu úara, kei ladari. Aranseha lumuti meha Huan le Abadiseihabei üma lubá Mesíasi lau larufuduniña furumiñetiña gürigia ha meha ítarabaña kei “adari” lun Hesukrístu (Hn 1:29, 35; 2 Ko 11:2; Efe 5:22-27; Aruf 21:2, 9). Dan le ladügünbalin lira, gúnfulihali meha “lumada adari” lau dasi le ichugúbei lun ani mámaali meha gürigia le súdinitimabei ligía. Ligía aba lubéi layanuhan luagu Hesusu luma luagu guánarügü ítara: “Ligía lunti laweirigudúntima, au lun nǘnabuduntima” (Hn 3:30).
(Huan 4:10).
nwtsty abürüdǘni lau lanwoun ariñahani luagu Hn 4:10
duna le gayaraati líchugun ibagari: O duna wínwanti. Yúsuati dimurei güriegu le keisi hénpulu lun layanuhóun luagu lísensen duna, luagu le ñéingiñe lubéi lagumesera duna éseha, duna le lídangiñeti aban fusu o duna le éibaagubei lagadábugiñe dübü. Ligíati, mítaranti “duna wínwanti” kei duna le areidúbei lidan somu ágeidinaü. Lidan Fádirigu 14:5, yúsuati dimurei ebüréu “lísensen duna” kei “duna wínwanti”. Lidan Heremíasi 2:13 luma 17:13, aliihatiwa lúmagiñe lan Heowá liabin “lísensen duna wínwanti”, lidan amu dimurei, duna le gayaraati líchugun ibagari. Dan le layanuhanbei Hesusu tuma würi samariana, yusu lumuti dimurei “duna wínwanti” keisi hénpulu, ani genegeti aba lan gunfuranda tan furumiñe layanuhaña lan luagu duna le hátubei gürigia (Hn 4:11).
17-23 LIDAN NEFU-HATI
ARUFUDAHANI GEBEGITI TÍDANGIÑETI BÍBÜLIA | HUAN 5, 6
“Falá huméi Hesusu lau resun le richabei”
(Huan 6:9-11).
nwtsty abürüdǘni lau lanwoun ariñahani luagu Hn 6:10, TNM
hañuurun [...] hawara seingü-milu wügüriña: Lídanrügüñein Ewanhéliu le labürüdübei Matéu lariñaga “bóugudin hawéi würiña hama irahüñü” dan le labahüdaguni sügǘ le (Mt 14:21). Másiñati ru lan Hesusu éigini lau aban milaguru houn hóugiñe keinsi-milu gürigia weyu ligía.
(Huan 6:14, 24).
nwtsty abürüdǘni lau lanwoun ariñahani luagu Hn 6:14
profeta: Agurabahatiña meha saragu huríu ha lánina furumiñeti sígulu Mesiasibei lan profeta le uágubei layanuha 2 Lúrudu 18:15, 18, le meha lunbei ítara lan kei Moisesi. Genegeti layanuhaña lan dimurei liabin ubouagun luagu lagurabahóuniwa liabin Mesíasi. Huanrügüñein ayanuha luagu katei burí le.
(Huan 6:25-27, 54, 60, 66-69).
nwtsty abürüdǘni lau lanwoun ariñahani luagu Hn 6:27, 54
éigini le gagumuchaditi [...] éigini le lánina ibagari magumuchaditi: Aba líchugun Hesusu fe hafalaruñein lan meha saragu gürigia, ñein lumuti lidin hama lani disipulugu, ladüga habusenrun buiti hóuniwagua. Ídehati weigin sagü weyu lun wawinwandun, ánheinti éigini le tídanbei Lererun Bungiu, gayaraati líchugun ibagari magumuchaditi woun. Lariñaguña meha Hesusu houn gürigia hagía lunti lan hawadigimaridun luagu “éigini le lánina ibagari magumuchaditi”, lidan amu dimurei, lun háfaagun lun buidu lan hamadagua luma Bungiu, arufuda hagíame afiñe hamá luagu le hafurendeirubei (Mt 4:4; 5:3; Hn 6:28-39).
Le éigiti nǘgürügü, guraléi nita: Arufudati le uágubei layanuhóua lidan bérusu le, mosu lan harufuduni ha lúnbaña heigin ani gurá hagía afiñe hamá luagu Hesukrístu (Hn 6:35, 40). Ariñaga lumuti Hesusu katei le lidan irumu 32, ligía gayara lubéi wasubudiruni mama lan layanuhaña luagu Ladinerun Aburemei, fedu le meha lunbei lagumeseruni aban irumu lárigiñe. Ariñaga lumuti lira murusun dan lubaragiñe “Luéyuri Esefuruni, le hafedun huríu” (Hn 6:4), dan le haganbunbalin gürigia le lariñagubei, másiñati haritagua hamani fedu ligía luma lisudinin lita mudún lun gayara lan lesefuhan ibagari guñoun le háfuridunbei ísüraelina Ehiptugiñe (Afu 12:24-27). Afuranguagüda lumuti Hesusu lueirin lisudinin lita lun gayara lan hawinwandun lani disipulugu aban ibagari magumuchaditi.
w05-S 1/9 páh. 21 pár. 13, 14
Úaraguala wawinwandun luma liri Heowá le Wabungiute
13 Lau sun lira, mábürühanti harüna gürigia. Sigí hamuti Hesusu ani aba hadariruni “loubafurugu duna”, kei aubei lariñagei Huan. Ka uagu houdin áluahei lárigiñe maha lan lun hadügüni urúeime? Arufudatiña meha saragu hádangiñe luágurügüñein lan le lemegeirubei hágubu hasaminara lau hayanuhan furangu luagu éigini le meha líchugubei Heowá houn ísüraelina lidan fulasu mageirawati lidaaniwagu Moisesi. Aba hariñagun lábugiñegua mosu lan meha lasigirun Hesusu ariha lau le hemegeirubei. Kei aba lubéi líchugun fe luagu katei burí würibati le meha hasaminarubei, aba lagumeserun arufudaha inarüni méiniti houn lun haransehani ligaburi hasaminan (Huan 6:17, 24, 25, 30, 31, 35-40). Añahein hádangiñe, aba hachuraguni, dan létima lariñagunbei keisi hénpulu: “Ninarün hau luagu anhaün lan meigin lídangiñe núgubu, au le Liráü Wügüri, matun humeime nita, mabagaribadün. Le éigiti nǘgürügü, guraléi nita, gabagariti le magumuchaditi, ani násaaragüdübei lídangiñe óunweni lidan lagumuhóun weyu” (Huan 6:53, 54).
14 Adügati meha hénpulu le labahüdagubei Hesusu lun larihíniwa anhein lau lubéi hanarün habusenra gürigia hayarafadun lun Bungiu, ani mámarügüñein meha dan ligía lasusereda le, lugundun hanarimeti meha ligaburi hóunabun. Aliihatiwa: “Saragu haña hádangiñe ha afalarubalin Hesusu, dan le haganbunbalin arufudahani le, aba hariñagun: Hénrenguti arufudahani le, kaba san ánhara lun?”. Lun larufuduni Hesusu houn mosu lan hasaminarun luagu le mini lubéi le lariñagubei, aba lariñagun houn: “Ruti sífiri ibagari, anhein ǘgürügü mebegiti ni kata. Ani sun burí katei le nariñagubei hun, lánina sífiri luma ibagari”. Íbini ítara, maganbuntiña hiibe-agei hádangiñe, sigiti abahüdaguni ariñaga: “Lúmagiñe dan ligía, saragu haña hádangiñe ha afalarubalin Hesusu, aba hígiruni, aba méibugunhaña lan luma” (Huan 6:60, 63, 66).
Darí wamá pérüla lánina lichú aau
(Huan 6:44).
nwtsty abürüdǘni lau lanwoun ariñahani luagu Hn 6:44
lanügün: Íbini yusua lan dimurei güriegu le ayusurúbei ya lun layanuhóun luagu hadurugudunu seni hau úduraü (Hn 21:6, 11), mama lariñaguña lira aduruuha lániña Bungiu gürigia íbini mabusenrun hamá. Másiñati layanuhaña lan Hesusu luagu le lariñagubei Heremíasi 31:3, TNM, ñein lubéi lariñaga Heowá houn lumutuniña: “Achawaha náadibu lau areini” (yusu tumuti Septuahínta dimureimeme le lidan güriegu). Aban katei libe lira lariñagubei Huan 12:32, TNM, dan le lariñagunbei achawaha lániña Hesusu sun hawuyeri wügüriña. Ariñagatu Bíbülia adüga lumutiña lan Heowá gürigia lau iarani lun hanúadiruni le habusenrubei. Lanúadiruba kada gürigia anhein leseriwiduba lubéi lun o madügün lubéi lan (2 Lu 30:19, 20). Achawaha lumutiña Bungiu gürigia ha harumabaña anigi lau ínsiñeni (Sal 11:5; Ari 21:2; Adü 13:48). Adüga lumuti Bungiu lira lau lídehan lani sífiri sandu luma uganu le tídanbei Bíbülia. Gúnfuliti profesía le lídanbei Isaíasi 54:13 luma Huan 6:45, hadan gürigia ha lachawahabaña Bungiu (konparárü huméi luma Huan 6:65).
(Huan 6:64).
nwtsty abürüdǘni lau lanwoun ariñahani luagu Hn 6:64
subudi laa[li] Hesusu [...] kaba lan alugurei: Layanuhaña meha Hesusu luagu Húdasi Isükarióte. Lidan furumiñeti dan, aban meha lubúein Bungiu le úaraguati, lugundun sügǘ lumuti meha Hesusu sun áriebu afurieida lubaragiñe lanúadiruniña 12 lánigu apostolu (Lk 6:12-16). Subudi lumuti meha Hesusu ariñaga lan profesía burí le lídanbei Abürüdǘni Ebüréu luagu lagarabaaguba lan meha aban hádangiñe lumadagu luagun (Sal 41:9; 109:8; Hn 13:18, 19). Ani kei gayara lubéi meha lasubudiruni Hesusu le lasaminarubei gürigia luma le tídanbei lanigi, ruti fe dan le lagumeserunbei Húdasi óusera wuriba (Mt 9:4). Kei gayara lubéi lasubudiruni Bungiu le lunbei lasuseredun ámuñegü, subudi laali meha Bungiu lagarabaaguba lan aban umadaü luagun Hesusu. Íbini ítara, siñati lariñawagún Húdasiba lan meha agarabaagua luagun Hesusu, lidan amu dimurei, aranserúaali lan meha katei lun ítara lan lugundun múaranti katei le luma ligaburi Bungiu ni luma ligaburi lóuseruniña lubúeingu ha lánina binadu dan.
lúmagiñe furumiñeti dan: Mama layanuhaña dimurei le luagu weyu le ídanbei nasirua lan Húdasi ni luagu dan le lanúadirunbalin Hesusu kei lani apostolu lárigiñe lásügürüni sun áriebu afurieida (Lk 6:12-16). Layanuhaña luagu dan le lagumeserunbei Húdasi agarabaagua luagun Hesusu ani subudigubei lumuti Hesusu katei lira (Hn 2:24, 25; Aruf 1:1; 2:23). Arufudati giñe lira madügün lumuti lan Húdasi katei sódini, samina laali meha buidu kaba lan ladüga lúmagiñe furumiñeti dan. Sánsiti le mini lubéi dimurei “furumiñeti dan” (güriegu arkhé) lidan Abürüdǘni Güriegu según le uágubei layanuhóua. Kéiburi, lidan 2 Féduru 3:4, yúsuati dimurei “lúmagiñe dan le ladügǘnbei ubóu” lun layanuhóun luagu “furumiñeti dan”. Liibe-agei dan, dan le layusurún dimurei le, úati mini lan saragu katei. Kei hénpulu, ariñagati Féduru aba lan liabin sífiri sandu hadoun gürigia ha mámabaña huríu kei meha liabin hawagun huríu “furumiñe” (Adü 11:15). Mama meha layanuhaña Féduru luagu luéyuri nasirua lan ni luagu weyu le ídanbei lanuadirúa kei apostolu. Layanuhaña meha luagu Pentekosutesi lidan irumu 33, dan le lounahóunbei sífiri sandu agunfulira lau aban katei espechaliti (Adü 2:1-4). Gayaraati ladarirúniwa amu burí bérusu le ídanti layusurúa dimurei “furumiñeti dan” lidan igaburi le, kéiburi: Lúkasi 1:2, Huan 15:27 luma 1 Huan 2:7.
24-30 LIDAN NEFU-HATI
ARUFUDAHANI GEBEGITI TÍDANGIÑETI BÍBÜLIA | HUAN 7, 8
“Alawaha lumuti meha Hesusu Lúguchi ani ruti uéiriguni lun”
(Huan 7:15-18).
cf-S páh. 100 pár. 5, 6
“Bürüwañu liña”
5 Busenti meha Hesusu lun gunfuranda hamani ha aganbubalin ka lan úmagiñeti uganu le lapurichihabei. Ligía aba lubéi lariñagun: “Le narufudahabei, mama númagiñeti, lúmagiñeti le óunahabalina” (Huan 7:16). Ariñagati giñe: “Madügün[tina] [...] ni kata lidan niri, luéidigia le larufudahabei Núguchi nun” (Huan 8:28). Aba giñe lariñagun: “Le burí katei le nariñagubei hun, mama [...] lau nani nungua nariñagei; Bungiu [...] adügübalin luadigimari guánarügü” (Huan 14:10). Arufudati Hesusu inarüni lan le lariñagubei ladüga gabügürüguati meha líridun fánreinti tídangiñeti Lererun Bungiu.
6 Dan le laturiahóun dimurei le lariñagubei Hesusu tidan Bíbülia buidu buidu, arihatiwa írida lan saragu katei le lídangiñeti lóugiñe tamidan líburu to lídanboun Abürüdǘni Ebüréu. Másiñati ñéinbaña lan arihiti lira kei aban katei le maweirinbei lisudinin o hálügüdahan ka lan uagu míridun lubéi Hesusu tídangiñe sun líburu to meha abürüdǘboun lidaaniwagu ladüga sügǘ lan ǘrüwa irumu dimí arufudaha luma apurichiha houn gürigia. Le linarün katei, másiñati adüga lani, lugundun haritagua wamá murusunrügüñein lan katei abürühóua lídangiñe le lariñagubei luma le ladügübei Hesusu (Huan 21:25). Murusunrügüñein oura emegeirúti lun laliihóuniwa le lariñagubei Hesusu tidan Bíbülia lau umalali héreti. Lau lira wachügüwagu, gayaraati wasubudiruni aba lan lubuidun katei laliihóuniwa arufudahani luagu Bungiu luma Larúeihan lidan lóugiñe tamidan líburu to lídanboun Abürüdǘni Ebüréu lidan murusun oura. Ani liibe-agei dan úatu meha somu hóuburatu lau abürüdǘni luma Hesusu lun líridun bérusu burí ñéingiñe. Dan le líchugunbalin liyanun le subudi wabéi kei Serumu luagu Wübü, íridati saragu bérusu le lídangiñeti Abürüdǘni Ebüréu saragu wéiyaasu maliihanga tídangiñe somu dugumedu.
(Huan 8:29).
w11-S 15/3 páh. 11 pár. 19
Resibi waméi lani Bungiu sífiri ani maha wamá lun lani ubóu le sífiri
19 Gaganbadi wamá lun Heowá súnwandan. Súnwandan meha ladügüni Hesusu lugundan Bungiu. Anihein íbini aban wéiyaasu le ídanbei gagibugua lan luma aban sügǘ le múaranti luma le labusenrubei Lúguchi. Íbini ítara, arufudati afiñe lan meha sunsuinagubei luagu Lúguchi, ariñagati lun: “Madügüwalá le nabusenrubei, leelá babusenrubei adügǘwa” (Luk. 22:42). Álügüdagua wamá woungua: “Gaganbaditina san lun Bungiu íbini dan le hénrengu lan nun?”. Anhein madügün wamá ítara, mawinwandunbadiwa lun súnwandan. Haritagua waméi lúnrügüba lan gaganbadi wamá, lugundun ligía íchugubalin wabagari woun ani rulei sun le wemegeirubei lun wasigirun awinwanda (Sal. 95:6, 7). Súdiniti gaganbadi. Ánhawa maganbadi magundanbei Bungiu wau.
Darí wamá pérüla lánina lichú aau
(Huan 7:8-10).
w07-S 1/2 pah. 6 pár. 4
Ka uagu lunti lubéi lariñawagún inarüni?
Ka hénpulu líchugubei Hesusu woun luagu lira? Aban weyu, aba hariñagun fiu gürigia ha mafiñenbaña luagu Hesusu lun: “Merederabá ya; beiba Hudeoun”. Aba lóunabun Hesusu, ariñageina: “Heiba lidan fedu [le meha lunbei ladügǘn Herusalén], au mídinbadina guentó; machülügili nidaani lun nidin”. Murusun dan lárigiñe, aba lidin Hesusu Hudeoun lun lachülürün lidoun fedu Herusalén. Ka uagu lóunabaña ítara? Ladüga úati yu lan houn hasubudiruni haliñounbei lan. Ligíati, íbini mariñagun lan Hesusu ni aban iyeeni, míchugun lumuti sun ariñahani houn ani ídehati lira lun míbedigia lan mégeiti lun o houn ha afalarubalin. Meyeehanti Hesusu lau ladügüni lira. Ariñagati lumuti apostolu Féduru katei le luagu Kristu: “Madügünti Kristu ni aban figóu, meyeehan ligía ni aban wéiyaasu” (Huan 7:1-13; 1 Féduru 2:22).
(Huan 8:12).
w09-S 15/7 páh. 5 pár. 12
“Au lilanpunbei ubóu”. (Aliiha huméi Huan 8:12 luma 9:5.) Saragu dan lubaragiñe nasirua lan Hesusu ya ubouagu, ariñagati Isaíasi lidan profesía: “Gürigia ha meha lídanbaña luburiga, arihatiña aban óunwenbu larugounga; harugoungaali houn ha meha aganóubaña lidan lamuñounga” (Isa. 9:2). Ani según le lariñagubei apostolu Matéu, gúnfuli lumuti Hesusu profesía le dan le lagumeserunbei apurichiha, ariñageina: “Asaküriha humá, ladüga yarafaali larúeihan Bungiu” (Mat. 4:16, 17). Ítara liña, adügati lapurichihan Hesusu lun hasubudiruni gürigia inarüni luma lun hesefurun luéi burí iyeeni le tídanbei relihión. Ariñagati Hesusu: “Au lánpubei; niábinbei ubouagun lun sun lan ha afiñetiña nuagu, lun merede hamá lidan luburiga” (Huan 1:3-5; 12:46).