LEKSIÓUN 4

Ebelaagülei buiti lun bérusu tídangiñeti Bíbülia

Matéu 22:41-45

LE LUNBEI HADÜGÜNI: Aranse huméi hasaminan gürigia lubá haganbuni bérusu tídangiñeti Bíbülia le lunbei haliihani.

Samina huméi furumiñe ka lan lébunabei haliiruni bérusu. Lubaragiñe haliiruni bérusu, ariñaga humá somu katei houn gürigia le gayaraabei lídehan lun hetenirun lun ariñahani súdiniti le habusenrubei hafuranguagüdün houn.

Gabaroun huméi le uágubei layanuhóua. Anhaün ariñaga ítaga lan gürigia ariñagubei aban katei o abürüdübei aban líburu tídangiñetu Bíbülia, chouru huméi ítara liña lan.
Leelá tariñagubei Bíbülia gebegitima hun. Danme hayanuhan houn gürigia ha afiñetiña luagu Bungiu, afuranguagüda huméi houn “Lererun lan Bungiu” tídanbei Bíbülia, ítara luba harufuduni tidan lan ladarirúa lichú aau le wéiritimabei.
Adüga humá lun busén hamá gürigia haganbuni le lariñagubei bérusu. Adüga humá aban álügüdahani le ounabúati lidan bérusu le lunbei haliihani, írida humá aban turobuli le unbei líchiga bérusu adundehani lun laransehóun o adundehani méiniti le gayaraabei lafurendeirúniwa lídangiñe aban abahüdaguni.

Gabaroun huméi le subudi hamaalibei gürigia luagu le uágubei hayanuha luma luagu bérusu. Ayanuha humá luagu le lariñagubei bérusu lidan aban igaburi le adügüti lun habusenrun gürigia haliiruni lau sun subudi hamaali lan, ani íderagua humaña lúntima gunfuranda hamani o lun hafurendeirun somu katei iseri lídangiñe.