LEKSIÓUN 8

Arufudaha humá lau hénpulu

Matéu 13:34, 35

LE LUNBEI HADÜGÜNI: Yusu humá hénpulu le ménrengunti gunfurandawa lan lun hewendedagüdüni harufudahan, lun habusenrun gürigia haganbunün luma lun harufudun somu puntu súdiniti.

IDA LUBA HADÜGÜNI?

Yusu humá hénpulu le ménrengunti gunfurandawa lan. Áyeiha huméi Hesusu; ayanuha humá luagu burí lirahüñü katei lun hafuranguagüdün katei súdiniti, yusu humá hénpulu le ménrengunti gunfurandawa lan lun hafuranguagüdün katei hénrenguti. Mariñaga humá katei le adügüti lun ua lan gunfurandawa lan hénpulu. Adüga huméi sun hiyaraati lun lúaradun hénpulu le hayusurubei luma puntu le habusenrubei harufudahan, meferidiraguagüdün humaamugaña gürigia.

Arufuda humá lichú aau. Teni humá lun sun le geyegubei hau, aturiaha humóun wani agumeiraguagüdüni, furendei huguyame hámagiñe ha garufudahadibaña. Bürǘ huméi hénpulu le gayaraabei hayusuruni lun buídutima lan harufudahan ani areida huméi.
Samina humá hawagun gürigia ha aganbubalün. Yusu humá hénpulu luáguti katei burí le hadügübei gürigia o luáguti le busén habéi haganbun. Áfaagua humá lun magañidagüdün humaniña, madügün huguyame lun hasandirun busiganu.
Afuranguagüda huméi puntu le habusenrubei harufudahan. Yusu humá burí hénpulu lun hafuranguagüdüni arufudahani létima súdinibei, mama le maweirinbei lisudinin. Áfaagua humá lun haritaguni gürigia puntu le habusenrubei harufudahan houn, mámarügü láamuga hénpulu haritagua.