Chülüti wani kanali tánina bigibigitu luéigiñe satelite le ñeinhin lubéi machülü lan Internet

Memeniha wanigi sagü hati lun warihini programa luma burí bidéu le hiñurubei wíbirigu lidoun JW Broadcasting, le íchugubei dǘgüdaguaü woun. Lau sun lira, siñati harihini saragu wíbirigu ha Áfürikabaña programa burí le lidan Internet. Ka uagu?

Hénrenguti larügüdǘniwa Internet lidan saragu fulasu Áfürika. Ani lidan fulasu le ñein lubéi Interneti, darasati ani wéiriti liserun. Kei hénpulu, aban weyu, rarigüdati aban óunigiruti sirkuitu aban programa lídangiñeti JW Broadcasting lidan aban fulasu le ñein lubéi lafayeihóua lun gayara lan layusurún Internet ageiraü Madagaskárü ani fáyeiti 16 dólarüa luagu. Gíbetimati le aguburahóubei tidan luban Internet tuguya luéi le hagañeirubei gürigia lidan aban dimaasu wadagimanu.

Lau sun turobuli le, belutiña saragu míñunu gürigia Áfürika lidoun JW Broadcasting ani memegeiruntiña Internet. Ida liña hadügüni katei le?

Lúmagiñe irumu 2017, gayaraahali harihini ha awinwandubaña Áfürika luéigiñe suru libiti Saara JW Broadcasting lidan aban kanali tidan bigibigitu, le lauti satelite. Mafayeihóunti luagu kanali le, ani nadagimeinti 24 oura luagu weyu, 7 weyu luagu dimaasu, lidan 16 iñeñein.

Lun libihíniwa katei le, áhayahatiña gefentiña luagu Heowá aban kanali lun hóunahan ariñahani lidoun tuéigiñe satelite, le achülürübei lidoun 35 ageiraü Áfürika le luéigiñebei suru libiti saara, afayeihóuati lóugiñe 12,000 dólarü luagu hati luagu aransehani le. Ani anihein dan lafayeihóun lanwoun lun larihíniwa burí programa lidan amu kanali lidan anihán lan programa ligía adügǘwa. Seremei lun aransehani le gayara lubéi harihini saragu milu gürigia adamurini wéiriti luma burí programa espechaliti le adügǘbei dan le lounahóun aban íbiri abisidahoun Beteli.

Ariha hamuti saragu gürigia, dandu ha gefentiña kei ha mama gefentiña, programa burí le tidan hani bigibigitu. Lau sun lira, móustarunti haseinsun saragu íbirigu lun hagañeihani umegeguni le mégeiwabei lun harihini. Ligía aba lubéi lafidihóuniwa antena tun satelite tidan 3,670 Luban Wadamuridagun. Ítarati, gayaraati harihini íbirigu JW Broadcasting ñein. Afayeihóuati kéiburi 70 dólarü anhein anuheinharu lubéi bigibigitu o aban máhina lun larihíniwa bidéu tidan Luban Adamuridaguni. Anhein ua lubéi umegeguni burí le, afayeihóuati kéiburi 530 dólarü.

Wéiriti heteingiradi íbirigu luagu kanali le. Ariñagati aban wéiyaali lidan afiñeni kamerúnna: “Ítara liña katei le houn niduheñu kei maná lamidangua fulasu mageirawati”. Ariñagati aban íbiri niheriana gíriti Odebode: “Óundaratiwa kei iduheñu lun warihini kanali ǘrüwa wéiyaasu luagu dimaasu. Memeniha hanigi nisaanigu lun lachülürün oura ligía. Darí burí lun hamuriahan lun warihini programa lubaragiñe lidaani”. Abahüdahatu ábanya íbiri niheriana gíritu Rose: “Wéiriti nugundan! Hanarimetiha naríagun ñunsu tidan bigibigitu, guenlé himei numuti narihini kanali JW. Danha naríagun ñunsu, gañi gáñitina meha ani furesetiha liñurun nita. Ánheinti kanali JW, buíduburiti ñunsu le ichaahóubei lidan, ruti darangilaü nun… ligía kanali le hínsiñetimabei nun. Aban abiniruni lúmagiñeti Heowá”.

Ariñagati aban óunigiruti sirkuitu le awinwandubei Mosanbíke aniheinhali lan sun le mégeiwabei tidan burí Luban Adamuridaguni lun gayara lan harihini kanali JW luéigiñe satelite. Chülütiña íbirigu aban oura o lóugiñe lubaragiñe lagumeserun adamuridaguni lun harihini JW Broadcasting.

Lidan adamurini wéiriti le ñein lubéi hachülüra gürigia lídangiñe sun ubóu lidan irumu 2019 uburugu Johannesburgo (Suru Áfürika), yúsuati kanali le lun larihíniwa lichugún yanu burí le súdinitimabei lidan 9 fulasu, kéiburi le líchugubei lílana Musu Úaraguati. Sphumelele le eseriwidubei lidan Sétanu le Arihibei lau Broadcasting tidan Beteli to Suru Áfürikaboun, ariñagati: “Lídangiñe meha Internet lichugúa burí yanu. Lun wadügüni, mégeitiwa meha aban Interneti le madüraagunti ani mosu meha wagañeihani. Guentó, lídangiñe kanali luéigiñe satelite, chóurutimati ani meserun ligía”.

Seremei híchigadi budagia gayara lubéi harihini wíbirigu ha Áfürikabaña JW Broadcasting luéigiñe satelite. Seremei luagu híchugun budagia lun lawanserun wadagimanu lánina apurichihani lidan sun ubóu, lau hayusurun ámuñegueinarügü ligaburi lichugún budagia lídangiñe donate.jw.org.