Adundehani lun aturiahani

Akutiha humá amu katei luagu lubuidun burí ligaburi Heowá

Dan le waliihanu Bíbülia gayaraati wakutiha lanwoun ariñahani lun gayara lan gunfuranda wamani buidu. Gama lumoun, moun lumuti wadügüni lúnrügü wabuinchagüdüni wachügü lau ariñahani súdiniti. Busentiwa wasubudirun amu burí katei luagu lubuidun ligaburi Heowá, ani líderagubadiwa wasubudiruni katei le lúntima línsiñedun Heowá woun. Lun wibihini álügüdagua wamá woungua: “Ka larufudahabei abahüdaguni tídangiñeti Bíbülia le nun luagu Heowá?”.

Kei hénpulu, gayaraati wáluahan katei méiniti le arufudubalin lubuidun burí ligaburi Heowá kéiburi: línsiñehabu, lichú lau, liricha luma lubafu. Gama lumoun, anihein amu burí lubuidun ligaburi Heowá le gayaraabei wafurendeirun luagu. Halíaba gayara lan hadarirun ariñahani luagu burí igaburi le?

Hadariruba aban lísüta lau lóugiñe 50 lubuidun ligaburi Heowá lidan Índice de las publicaciones Watch Tower. Heiba lidoun ebelaagülei le gíribei “Jehová” ani lárigiñe áluaha huméi subtítulu le gíribei “Cualidades por nombre”. Ariha huméi ka lan ligaburi Heowá le tídanbei lísüta to úarabei luma le haliihabei, ani lárigiñe aliiha huméi ariñahani le hadarirubei luagu ligaburi Heowá (anhein lídanrügüñein lubéi fánreinti le gíribei Adundehani lun haturiahan gefentiña luagu Heowá, gayara lan hebelurun, heiba lidoun ebelaagülei le gíribei “Heowá” ani lárigiñe dun humá luagu subtítulu le gíribei “Ligaburi Heowá”).