Ida liña lañawarihani teknolohía hisaminan

Súnwandan hafurendeiruña lan gürigia: dan leskuelarugu wamá o lidan wawadigimari luma lidan amu okasión. Ani gayaraati líderaguniwa teknolohía. Eibu dan ménrenguntimahali lan libihín ariñahani sin wáfuridun múnadagiñe o íbini sin wiñuragun luéi wala.

Lau sun lira, gürigia ha ayusurubaña saragu teknolohía gaturobulinbaña kei burí:

Hénrenguti houn hakipuruni hasaminan lidan le haliihabei.
Hénrenguti houn hasaminarun hulili luagu ábanrügü katei.
Fureseti mésebe hamá dan hábuguarügü hamá.

LE LUNBÉI HASUBUDIRUNI

Aban nibureintu adüga saragu katei lidan aban: abürüha luéigiñe tigagamuru, adimureha luéigiñe bidéu luma aturiaha tuéigiñe konputadora tau aban líburu.

ALIIHANI

Añahein gürigia aliihatiña lau lóufudagun ani maguraasuntiña lun hasaminarun hulili libügürü sun le haliihabei.

Maribanti waliihan lau lóufudagun dan wáluahaña lan óunabagülei lun aban álügüdahani. Lau sun lira, mídehanti dan mégeiwa lan lun gunfurandawa lan aban ariñahani le huliliti.

SAMINA HUMÁ LUAGU LE: Hénrenguti san hun haliihan ariñahani le migifeti? Saminatün san anhein lan áfaagua buídutimabei lan ligaburi hafurendeirun? (ARIÑAWAGÚNI 18:15).

TENI WAMÁ LUN LE WADÜGÜBEI

Añahein gürigia saminatiña seremei lan lun teknolohía, gayara lan hadügün bián katei lidan aban: kei hénpulu, habürühan ariñahani houn hamadagu dan añaha lan aturiaha. Le linarün katei, anhein meteni gürigia lun le ladügübei dan le mégeiwa lan, lagumuchuba madügünga ni aban lídangiñe bián katei ligía buidu.

Lun wetenirun lun le wadügübei, mosu wárügüdagun woungua. Líderagubadün afurendeira. Ariñagatu aban nibureintu gíritu Grace: “Míbetimabei bichara ani másüdünbei bichügü saragu. Furendeihadina buídutima lan netenirun lun ábanrügü katei, lubaragiñe netenirun lun saragu katei lidan aban”.

SAMINA HUMÁ LUAGU LE: Adügati san teknolohía lun hénrengu lan hun lun hetenirun lun ábanrügü katei ani lun haritaguni le haturiahabei? (ARIÑAWAGÚNI 17:24).

DAN LE HÁBUGUARÜGÜ HUMÁ

Añahein gürigia mínsiñeti houn lun hábuguarügü hamá sin hadügün ni kata. Ligía hayusurunbei teknolohía isebáharime. Ariñagatu aban würi gíritu Olivia: “Siñati nerederun nírügü 15 minutu sin nechekürüni nigagamarun, tablet o nébedunu bigibigitu”.

Súngubei, dandu nibureintiña, kei wéinamuhaña, mégeitiwa wásügürün dan wábuguarügü lun wasaminarun hulili luagu le wafurendeirubei. Súdiniti le lidan busén wamá wafurendeirun.

SAMINA HUMÁ LUAGU LE: Yusu bumuti san dan le básügürübei bábuguarügü lun basaminarun? (1 TIMOTÉU 4:15).

LE GAYARAABEI HADÜGÜNI

AKUTIHA HUMÉI BUIDU IDA LIÑA LA HAYUSURUN TEKNOLOHÍA

ida liña gayara lan líderagunün teknolohía lúntima habuiduragüdüni ligaburi hafurendeirun? Ani Ida liña gayara lan lañawarihani ubafu le huágubei lúntima hetenirun lun le hafurendeirubei?

ADUNDEHANI MÉINITI: “Ragüba luagu lichú aau luma gunfurandaü súnwandan” (ARIÑAWAGÚNI 3:21).

ÁLÜGÜDAGUA HUMÁ HUNGUA:

Gaturobulintina san lun netenirun lun le nadügübei, dan naliihan aban ariñahani migifeti lídangiñe gágamuru? Anhein ítara liña lubéi, ka adügübei lun hénrengu lan nun lun netenirun lun le nadügübei?
Ka gayaraabei nadügüni lun namahadun lun burí katei le adügübei lun metenirun nan lun le nadügübei?

Adundehani: Gumese humá aliiha lirahüñü ariñahani murusun murusun, ani amigifedeina ligíame le haliihabei. Aliiha humá lau umalali íñuti, lau lihamarun, lun hakipuruni hisaminan luagu le haliihabei.

Ka aransehani gayaraabei nadügüni lun gadaani nan lun nasaminarun hulili luagu le naliihabei?

Adundehani: Dan haturiahaña lan, direi huméi lagumuhóun 10 minutu lun háguyuguagüdüni le hafurendeirubei.

Kátima san oura nadüga saragu katei lidan aban?
Ka aransehani gayarabei nadügüni lun níchuguni nisaminan luagu ábanrügü katei?

Adundehani: Lun madügün humá saragu katei lidan aban, dísegüda huméi sun le gayarabei lachawahani hisaminan lídangiñe fulasu le ñein lubéi haturiahan.

ADUNDEHANI MÉINITI: “Ibihabá lichú aau, luma lubuidun ichügü” (ARIÑAWAGÚNI 4:5).