Anihagua san inebehabu le hasandirubei gürigia hawougua?

KA UAGU LUNTI LUBÉI HASANDIRUN GÜRIGIA INEBESEI HAWOUGUA?

Gürigia ha sandibaña inebesei hawougua, buítimati ligaburi hahandilihani turobuli ani mábürühanti harüna lau lumenrengun.

Anihein burí aturiahani le arufudaalibei ménrenguntima lan ladagarun sandi le lánina lueirin íruni o idiheri hawagu gürigia ha masandibaña inebesei hawougua ani gayara lan giñe gaturobulin hamá luma éigini, kéiburi gíbeya lan heigin o máhagubei hamá heigin. Ménrenguntimati giñe hábürühan lidoun átaguni, layusurún düroga o hátahan árani le mama líchugun surusia houn.
Gürigia ha sandibaña inebesei hawougua, magoubadaguagüdüntiña houngua hama amu. Ligía ménrenguntima lubéi houn hanaagun houngua buidu hama amu luma lun ladurarun umadaguaü le hadügübei hama amu gürigia. Ánhañati gürigia ha lóuguabei hasandirun inebesei hawougua, gabanitiña, gabachuhaditiña ani sun katei le, gayaraati ladügün lun lagadeirun ligaburi hanaagun houngua hama amu.
Gürigia ha sandibaña inebesei hawougua, ragüguatiña houngua lídangiñe turobuli lau lumenrengun ani lau lóufudagun héchuda luagu burí asansiruni; mígiraguagüdüntiña houngua lun burí katei le gayaraabei leberesehaniña luéi habihini le uágubei háfaagua. Ánhañati gürigia ha lóuguabei hasandirun inebesei hawougua, ménrengunti lábürühan harüna dan le masali lan somu katei houn.

KA GAYARAABEI HADÜGÜNI?

Áluaha humá umadagu ha lúnbaña híderagunün. Sügǘ humá dan hama gürigia ha inebehabutiña, ha hínsiñehabutiña hun ani ha áluahatiña buiti hun.

“Aban umadaü, súnwandan buidu lan, ítara liña kei aban íbiri lidan lidaani idiheri” (Ariñawagúni 17:17).

Íderagua humaña ha híbiri. Wéiribei ugundani le lunbei hasandiruni ani huubei hasandiragun hungua anhaün íderagua amu gürigia, hátima siñabei hagiribudagüdüni fulesei ligía hun. Ani ítara liña katei le, íbini meteingirúniwa humá luagu buiti le hadügübei.

‘Gúndaatimati le íchugubei sügǘ lau le eresibirubei’ (Adügaü 20:35, Lerérun Búngiu to Lánina Iséri Darádu [LBID]).

Íderagua humaña hisaanigu lun hafurendeirun asandira inebesei hawougua. Aban lídangiñe katei le gayaraabei hadügüni lun hibihini lira, lau hígirun lun hisaanigu guánarügü lan aransehei haturobulin darí le ñein lumuti gayara hamani. Líderagubaña lira lun hafurendeirun ahandiliha turobuli luma lun hiñuragun lídangiñe. Ítarati hasandiruba inebesei hawougua ani lahuuduba lira houn danme le haweinamudun.

“Arufudahabá buiti lun irahü dan le ñǘraügili; íbini danme le wéiyaali mabulieidun lubéi” (Ariñawagúni 22:6).

Aban gefentu luagu Heowá íchiga aturiahani tídangiñeti Bíbülia tun aban würi tidan aban éigagülei.

LE WADÜGÜBEI WAGÍA GEFENTIÑA LUAGU HEOWÁ

Ídehati adamuridaguni burí le wadügübei luma arufudahani tídangiñeti Bíbülia le wíchugubei houn gürigia, lun labuidurun habagari ani adügati lira lúntima hasandirun inebesei hawougua.

ADAMURIDAGUNI DIMAASU-AUTI LE WADÜGÜBEI

Lidan burí adamuridaguni dimaasu-auti le wadügübei, aganbatiwa burí yanu le tídangiñeti Lererun Bungiu. Lidan burí yanu ligía, ibihatiwa adundehani le íderagubaliwa lúntima wasandirun inebesei wawougua. Furumiñeguarügü gürigia, gayaraati lachülürün lidoun burí wadamuridagun ani mafayeihanbei ni kata. Ñein, hafurendeiruba luagu katei kéiburi. . .

. . . gebegi humá lun Bungiu.
. . . ida luba lan gunda lan hibagari.
. . . ka lan gayaraabei hadügüni lun gamadagu humá luma lun ladurarun umadaguaü ligía.

Hadariruba giñe umadagu buítiña, ha hínsiñeguatiña hámagua (1 Korintuna 12:25, 26).

Lun hasubudiruni ida liña lan burí adamuridaguni le wadügübei, heiba lidoun páhina jw.org, ábameti harihini bidéu le gíribei Ka adügǘbei lidan wadamuridagun?

ATURIAHANI TÍDANGIÑETI BÍBÜLIA LE WÍCHUGUBEI

Rútiwa aturiahani tídangiñeti Bíbülia houn gürigia lau tídehan líburu Winwan humá lau ugundani ani maguburahantiwa luagu. Anihein burí álügüdahani tidan líburu lánina aturiahani to le íderagubaliña gürigia asaminara luma lun gunfuranda hamá ítaga burí bérusu tídangiñeti Bíbülia. Afuranguagüdawati ariñahani le tídanbei lidan aban igaburi le ménrengunti gunfurandawa lan, ani dariwati lubuidun burí bidéu, iyawaü luma dibuhu tidan. Íderagua lumutiña aturiahani tídangiñeti Bíbülia le gürigia lun hasandirun gebegi hamá luma lun labuidurun habagari.

Anhein busén hubéi hasubudiruni ida luba lan líderagunün aturiahani tídangiñeti Bíbülia le wíchugubei wagía le gefentiña luagu Heowá, heiba lidoun páhina jw.org, ábameti harihini bidéu le gíribei Ka uagu lunti lubéi haturiahanu Bíbülia?