Buidutimalá wadügüni katei: aranse waméi kaba lan webelaagüle houn gürigia
Ka uagu súdini lubéi? Anhein madügün ebelaagülei le wayusurubei lun busén lan gürigia lasigirun aganbawa, háfuga maganbun lubéi uganu buiti le wanügübei lun. Ligía gibe habéi íbirigu asaminarutiña súdinitima lan furumiñeti burí dimurei le hariñagubei. Íbini dariwa lan burí adundehani tidan Wani Ministeriu luma tidan líburu Razonamiento libügürü le gayarabei wariñaguni houn gürigia, mama sun dan ladarirún aban ebelaagülei dayarüti ñein, gayara láamuga waransehani lau wagaburi. Ani íbini hamuga dayarügü liña lan ñein, gayaraamémeti hasansiraguni íbirigu o hayusuruni le hani houngua. Buídutimabei lidin woun ánhawa aransera aban lubuidun ebelaagülei, lubaragiñe wariñaguni le ñǘbuinti woun furumiñe lidoun wachügü dan le ladaaruni gürigia bena (Ari. 15:28).
Houcha humá hadügüni le lidan sun hati:
Direi humá dan lidan guñoun lánina háhuduragun lun Bungiu úara hama hiduheñu lun haransehani ani asayaha humeime kaba lan hebelaagüle houn gürigia danme hapurichihan.
Danme le lídanñadün lan apurichihani abahüdagua huméi lun hupaaná ka lan ebelaagülei hasaminarubei hayusurun (Ari. 27:17). Sansi huméi ebelaagülei le hayusurubei anhein hariha míchugun lan buiti resultóu.