Ka burí san katei gamaniharibei lau hibagari lubá ámuñegü?
Saragu gürigia saminatiña anihein lan burí erei le aramudaguati le gamaniharibei lau habagari lubá ámuñegü. Ligía hadügünbei katei burí le hasaminarubei labuiduragüdübei lan habagari.
LE HASAMINARUBEI SARAGU
TURIAHÓUN WARUGUMA. Gíbetiña gürigia afiñetiña luagu lan hesetirun waruguma lidan weyu le nasirua habéi, dipeni lan hachansi lun buidu lan habagari ámuñegü. Ligía haliihanbarun horóscopo, lun hasubudiruni kaba la asusereda houn, ábati hóunigiragun houngua lun buidu la lidin houn.
FENG SHUI. Añahein amu saminatiña, lun lan buídutima lan lidin houn, súdini lan lun úaragua lan le geyegubei hau luma erei le marihúaditi ubouagu. Ariñagati aban wügüri le awinwanduti Hong Kong, gíriti Lo Wing,a “Ariñagati aban lumaisturun feng shui nun, ánhana lan íchiga aban bídüriu harugoungati lidan aban fulasu espechaliti tidan nani budigü, nagañeiruba lan saragu sensu”.
ÁHUDURAGUNI HOUN AGÜCHAGU. Añahein amu saminatiña mosu lan hahuduragun houn hagüchagu o houn amu burí búngiugu lun hóunigiruniña ani biní hamañame. Ariñagatu Van, aba würi to awinwanduboun Bietnamu: “Saminatina meha, ánhana lan áhuduragua houn nagüchagu, labuiduruba lan nibagari guenlé ani dandu lan nuguya kei nisaanigu buídubei lan wabagari ámuñegu”.
NASIRUA LAN SARAGU WÉIYASU. Gíbetiña giñe saminatiña dan lan wóunwegun, ábaya lan nasirua wamá lidan amu ibagari, ani sigí lan katei le asusereda saragu wéiyaasu. Ani saminatiña, katei burí lan buiti o wuribati le asuseredubei houn guentó hafayeiruñein lan le hadügübei lidan habagari le sügühalibei.
Íbini ariñaga hamá saragu, mafiñe hamá luagu katei le, mararamunti hayusurun taturiahóun waruguma, bali lánina ubunuruni, tayusurún bará lánina tarot, laliihóun lurageirugu úhabu..., luéidügü nege líderaguniña lun hasubudiruni anhein buídubei lubéi habagari ámuñegü.
LE IBIHÚBEI
Buídutimati san habagari gürigia ha afiñebaña luagu burí katei le, ani chouru ligía lubá ámuñegü?
Ariha waméi le asuseredubei lun Hào, le awinwandubei Bietnamu. Ígirati meha lun taturiahóun lan waruguma, feng shui luma áhuduraguni houn agüchagu lun ligíaba lan adundehei libagari. Buiti san lidin lun? Ariñagati Hào: “Féridi numutu nani budigü, buin au lau dúeiti, aban gaturóbulin nan hama niduheñu, ani féridi numuti nuguraasun”.
Qiuming, le awinwandubei Taiwán, afiñeti meha luagu taturiahóun waruguma, nasirua hamá gürigia saragu wéiyaasu, isinu, feng shui luma áhuduraguni houn agüchagu. Lárigiñe lakutihan hulili ariñagati: “Aba níchugun fe luagu múaran lan burí afiñeni luma échuni le ani yuriguagüda lumutiña gürigia. Ha aturiahabaña waruguma, libe-agei dan yuriguatiña. Ani libügürü nasirua hamá gürigia saragu wéiyaasu..., le linarün katei, anhein maritagun ban le badügübei lidan binadü bibagari, ida luba basansirun lúntima buidu lan bibagari dánmeya nasirua ban?”.
“Aba níchugun fe luagu múaran lan burí afiñeni luma échuni le ani yuriguagüda lumutiña gürigia” (QIUMING, TAIWÁN)
Dandu Hào, Qiuming hama saragu amu gürigia, rúhaña fe dandu lan isinun, taturiahóun waruguma, áhüduraguni houn agüchagu, luma nasirua lan gürigia saragu wéiyaasu, mídehanti lun buidu lan ibagari ámuñegü. Mini lan san le siñá lan gamanihari wamá lau le lunbei wadügüni lun buidu lan wabagari ámuñegü?
Afiñetiña saragu gürigia gayara lan hachoururuni buídubei lan habagari ámuñegu lau haturiahan tidan luban furendei íñutu o lau risi hamá. Ida liña san hasandiragun ha afalarubalin saminaü le houngua?
a Tidan garüdia to sánsiwaali fiu iri.
b Tídanñein Sandu Bürütu dimurei le, lidan Galasiana 6:7. Anihein aban saminaü genegeguati luma le lidan aban ariñawagúni hadan gürigia, le ariñagubei: “Katei wuribati le ladügübei aban gürigia, ligíaba giñe lalubaha”.