Rït yakowin nawïl jun utziläj kʼaslemal chqawäch apü

Satanás chqä rudemonios xa jbʼaʼ chik tiempo xkekiqʼöl ri winäq. Jehová ya xeresaj yän pä chkaj (Apocalipsis 12:9). Xa jbʼaʼ chik apü, Dios ma xtyaʼ ta chik qʼij chkë rchë yekitzʼlaʼ ri winäq. Ri apóstol Juan xuʼij reʼ taq xtzjoj achkë xtzʼët chpan jun visión ri xyaʼöx pä che rä rma Dios: «Rïn xintzʼët jun ángel ri najin wä nqä pä chkaj ri rukʼwan rullave ri mamaʼ jül chqä rukʼwan jun mamaʼ cadena pa ruqʼaʼ. Ryä xchäp ri dragón, ri kumätz ri xjeʼ pa naʼäy, ri nbʼix Diablo chqä Satanás che rä, y xxïm 1,000 junaʼ. Y xkʼäq qa chpan ri mamaʼ jül chqä xtzʼapij qa ruchiʼ ri jül riʼ rchë ma yeruqʼöl ta chik ri winäq kʼa taq xkekʼis ri 1,000 junaʼ» (Apocalipsis 20:1-3). Chrij riʼ, ri Diablo chqä ri demonios kan jurayil xtchup kiwäch (Apocalipsis 20:10).

Ri itzel taq winäq xtchup chqä kiwäch (Salmo 37:9, 10; Lucas 13:5).

¡Ri kamnaqiʼ xkekʼasöx pä!

Taq Satanás chqä ri demonios xketzʼapïx, Jehová kan kʼïy utzil xtyaʼ pä pa kiwiʼ ri winäq. Tnatäj chawä chë taq jun winäq nkäm, ma nbʼä ta jukʼan chik. Jesús xjnamaj ri kamïk rkʼë ri nbʼanatäj rkʼë jun winäq taq kamnäq chë waran (Juan 11:11-14). Ryä xuʼij ya riʼ rma retaman chë xtbʼeqä ri qʼij taq ri kamnaqiʼ xkekʼasöx pä. Ryä xuʼij reʼ: «Xtbʼeqä ri hora chë konojel ri kamnaqiʼ ri ye kʼo pa taq jül [...] xkebʼeʼel pä» (Juan 5:28, 29; tajnamaj rkʼë Hechos 24:15).

Ryeʼ xkekʼasöx pä chwäch le Ruwachʼlew. Pa rukʼexel xtqakʼoxaj chkij winäq ri najin yekäm, xa kan xkeqakʼoxaj utziläj taq rutzjol chrij ri achkë xkekʼasöx pä. ¡Kan jaʼäl xtqanaʼ taq xkeqakʼül apü ri qachʼalal o ri qachiʼil ri ye kamnäq äl!