¿Achkë rbʼanik ütz rksaxik naʼän che rä ri päq?

Jontir nkʼatzin qarajil rchë nqalöqʼ ri nkʼatzin chkë ri qafamilia, rma achiʼel nuʼij le Biblia, ri päq kan yaturtoʼ (Proverbios 30:8; Eclesiastés 7:12). Jantäq rkʼë jbʼaʼ kʼayewal nuʼän natzjoj rkʼë akʼlaj jaruʼ päq nkʼatzin chpan afamilia, ye kʼa ma tayaʼ ta qʼij chë ya riʼ nuʼän chë nutïk chʼaʼoj chikojöl (Efesios 4:32). Rïx kʼo chë nikʼuqbʼaʼ ikʼuʼx chiwij y chixkaʼiʼ nkʼatzin nitzʼët akuchï niksaj wä irajil.

1 TIQUʼ NA AKUCHÏ NIKSAJ WÄ IRAJIL

RI NUʼIJ LE BIBLIA: «¿Achkë chiwä rïx taq nrajoʼ nuyäk jun jay ma ntzʼyeʼ ta na naʼäy rchë nutzʼët jaruʼ päq xtkʼatzin che rä chqä we xtqʼiʼ apü rchë xtkʼïs ryakik ri jay?» (Lucas 14:28). Kan kowan rejqalen niyaʼ chiwäch akuchï niksaj wä irajil (Amós 3:3). Titzʼetaʼ achkë nkʼatzin nilöqʼ chqä jaruʼ irajil kʼo (Proverbios 31:16). Tapeʼ kʼo jun ri yixkowin nilöqʼ, reʼ ma ntel ta chë tzij chë kan nkʼatzin niʼän riʼ. Ma titïtzʼ ta iwiʼ pa kʼas, más ütz tiksaj xa xuʼ ri päq kʼo iwkʼë (Proverbios 21:5; 22:7).

RI ÜTZ NAʼÄN:

• We kʼo jbʼaʼ irajil nkanaj qa taq nkʼis jun ikʼ, tichʼobʼoʼ chixkʼlaj achkë xtiʼän rkʼë ri päq riʼ

• We chpan jun ikʼ ma xixurqʼiʼ ta irajil, tikanuj rbʼanik rchë ma nisäch ta más päq. Rkʼë jbʼaʼ, más ütz rïx yixbʼanö ri rkïl iway chwäch nilöqʼ

2 KANTZIJ KATZJON CHQÄ KAN PA RBʼEYAL TATZʼETAʼ RI PÄQ

RI NUʼIJ LE BIBLIA: Kantzij katzjon, «ma xa xuʼ ta chwäch Jehová xa kan chkiwäch ri winäq chqä» (2 Corintios 8:21). Ma tawewaj ta chwäch akʼlaj jaruʼ päq nachʼäk chqä jaruʼ päq nasäch.

Ronojel mul takʼulbʼej na akʼlaj taq kʼo jun nkʼatzin naʼän o nalöqʼ ri kan nüm päq xtkʼwaj (Proverbios 13:10). Taq nitzjoj rij ri rbʼanik niksaj irajil yixurtoʼ rchë ma njeʼ ta chʼaʼoj pan ikʼlajil. Ma tamestaj ta chë ri päq nachʼäk ma xa xuʼ ta awchë rït, xa kan kichë afamilia chqä (1 Timoteo 5:8).

RI ÜTZ NAʼÄN:

• Tiyaʼ chiwäch jaruʼ päq ütz nisäch chijujnal

• Ma tiyoʼej ta na kʼa taq ma yixurqʼiʼ ta chik irajil kʼa riʼ yixtzjon chrij ri päq