Nukʼüt chë rkʼuqbʼan rkʼuʼx chrij Jehová

Abrahán xuʼän jontir ri kʼo pa rqʼaʼ rchë chë Isaac, ri rkʼajol, nrajoʼ Jehová. Ryä chqä xkʼüt chwäch chë ütz nukʼuqbʼaʼ rkʼuʼx chë jontir ri rtzjun Dios kan xtbʼanatäj. Pero taq Isaac kʼo wä jun 25 rjnaʼ, Jehová kʼo jun kan kwest xkʼutuj che rä Abrahán chë tbʼanaʼ. ¿Ataman rït achkë xuʼij che rä?

Dios xuʼij reʼ che rä Abrahán: «Tabʼanaʼ utzil, takʼwaj äl akʼajol y jäx pa rwiʼ jun jyuʼ ri kʼo Moria. Taq xkixapon chriʼ, takamsaj rchë natzüj rkʼaslemal chi nwäch». Abrahán ma rtaman ta wä achkë rma Jehová xkʼutuj ya riʼ che rä. Tapeʼ ke riʼ, xnmaj tzij.

Chkaʼn qʼij, taq najin wä nsaqirsan qʼanäj, Abrahán xkʼwaj äl Isaac chqä kaʼiʼ rmos y xkichäp bʼey rchë yebʼä Moria. Oxiʼ qʼij chrij riʼ, ryeʼ xekitzʼët apü ri jyuʼ. Abrahán xuʼij chkë rmos chë tkiyoʼej qa chriʼ loman ryä chqä Isaac nkibʼebʼanaʼ jun sacrificio chwäch Dios. Abrahán xkʼwaj äl ri cuchillo y xyaʼ äl ri siʼ chrij rkʼajol. Isaac xkʼutuj reʼ che rä: «¿Akuchï kʼo wä ri chköp ri xtqatzüj chwäch Dios?». Abrahán xuʼij: «Yë Jehová xtyaʼö pä taʼ».

Taq xeʼapon pa rwiʼ ri jyuʼ, xkiʼän jun altar. Chrij riʼ Abrahán xxïm rqʼaʼ chqä raqän Isaac y xyaʼ pa rwiʼ ri altar.

Taq Abrahán xchäp ri cuchillo, r·ángel Jehová xtzjon pä chlaʼ chkaj y xuʼij: «¡Abrahán! ¡Ma takamsaj ta akʼajol! Komä ntaman chë kan akʼuqbʼan akʼuʼx chrij Dios, rma ma xakʼewaj ta xatzüj akʼajol chwäch». Ya riʼ taq Abrahán xtzʼët jun achij karneʼl ri qʼatäl rkʼaʼ chpan qʼayis. Rma riʼ chanin xkïr Isaac y yë ri karneʼl xtzüj chwäch Dios.

Kan chpan qa ri qʼij riʼ, Jehová xuʼij ramigo che rä Abrahán. ¿Ataman rït achkë rma? Rma Abrahán xuʼän jontir ri xkʼutuj Jehová che rä, tapeʼ ma xqʼax ta chwäch achkë rma xkʼutüx che rä.

Jehová xkamluj che rä Abrahán ri xtzüj yän che rä. Ryä xuʼij: «Kan kʼïy ütz xtinyaʼ pä pan awiʼ, y xtinbʼän chë kan kʼïy ajatzul xkejeʼ». Ri xuʼij Jehová ntel chë tzij chë ryä xtksaj rjatzul Abrahán rchë kʼo ütz xtyaʼ pä pa kiwiʼ ri winäq ri xtkinmaj tzij.