Abrahán chqä Sara nkinmaj rtzij Dios

Naqaj che rä Babel kʼo ri tinamït Ur. Ri winäq aj Ur ma nkiyaʼ ta rqʼij Jehová, xa tyox nkiyaʼ kiqʼij. Pero kʼo wä jun achï chpan ri tinamït riʼ ri nuyaʼ rqʼij Jehová. Ri achï riʼ Abrahán rbʼiʼ.

Jehová xuʼij reʼ che rä Abrahán: «Tayaʼ qa awachoch chqä afamiliares, y jät chwäch ri jyuʼ ri xtinkʼüt chawäch». Chrij riʼ Dios xuʼij reʼ che rä: «Xkejeʼ ye kʼïy ajatzul, y awmä rït kʼo ütz xtinbʼän pa kiwiʼ ri winäq ri ye kʼo chwäch le Rwachʼlew».

Abrahán ma rtaman ta wä akuchï xttaq wä äl, pero nukʼuqbʼaʼ wä rkʼuʼx chrij Jehová. Abrahán, Sara ri rxjayil, Taré ri rtataʼ, chqä Lot ri rsobrino xkinmaj rtzij Dios. Ryeʼ xkimöl äl ri achkë kʼo kikʼë chqä xkichäp äl bʼey.

Abrahán 75 rjnaʼ taq ryä chqä rfamilia xeʼapon chwäch ri ilew ri nrajoʼ wä Jehová chë nkitzʼët. Ri ilew riʼ Canaán rbʼiʼ. Chriʼ Jehová xuʼij reʼ che rä Abrahán: «Jontir ri jyuʼ ri natzʼët xtinyaʼ chkë awalkʼwal». Pero Abrahán chqä Sara ye riʼj wä chik y majun ta wä kalkʼwal. Rma riʼ, ¿achkë rbʼanik xtuʼän Jehová ri xtzüj?