¡Xbʼejeʼ jun kineʼy!

Abrahán chqä Sara kʼïy chik jnaʼ ye kʼlan. Ryeʼ xkiyaʼ qa ri jaʼäl kachoch ri kʼo Ur rchë yejeʼ chkipan jay ri yebʼanon rkʼë tzyäq. Tapeʼ ke riʼ, Sara majun bʼëy xchʼojin ta, rma kan rkʼuqbʼan wä rkʼuʼx chrij Jehová.

Rma Sara nrajoʼ wä njeʼ jun rneʼy, xuʼij reʼ che rä Abrahán: «Si rït nbʼejeʼ jun awalkʼwal rkʼë Agar, ri nmos, achiʼel ta jun wal rïn xtbʼejeʼ». Taq xqʼax ri tiempo, Agar xbʼejeʼ jun ral chqä Ismael rbʼiʼ xkiyaʼ.

Kʼïy jnaʼ chrij riʼ, taq Abrahán kʼo wä chik 99 rjnaʼ y Sara 89, xebʼechʼaʼëx kimä oxiʼ achiʼaʼ. Abrahán xuʼij chkë chë keʼuxlan chuxeʼ jun cheʼ chqä chë kewaʼ qa kikʼë. ¿Ataman rït ye achkë riʼ ri achiʼaʼ riʼ? Ye ángeles. Ryeʼ xkiʼij reʼ che rä Abrahán: «Le jun chik jnaʼ, rït chqä awixjayil xtbʼejeʼ jun iwalkʼwal». Sara kʼo wä pa rachoch chqä najin wä nuyaʼ rxkïn. Taq xkʼoxaj ri xkiʼij ri ángeles, ryä xtzeʼen pa ran chqä xquʼ reʼ: «¿Kan xtbʼejeʼ jun wal tapeʼ yïn riʼj chik?».

Taq xqʼax jun jnaʼ, Sara xbʼejeʼ jun rneʼy kan achiʼel xuʼij r·ángel Jehová chë xtbʼanatäj. Taq Abrahán xyaʼ rbʼiʼ rkʼajol, Isaac xuʼij che rä, ri ntel chë tzij «tzeʼen».

Taq Isaac 5 rjnaʼ, Sara xtzʼët chë Ismael kowan wä nunäq rchaqʼ. Y rma nrajoʼ wä nuchajij ral, Sara xbʼeruʼij reʼ che rä Abrahán: «Taʼij che rä Agar chqä Ismael chë kebʼä äl». Pa naʼäy, Abrahán ma xrajoʼ ta xuʼän riʼ. Pero Jehová nrajoʼ wä chqä nuchajij Isaac. Rma riʼ xuʼij reʼ che rä Abrahán: «Tabʼanaʼ ri xuʼij Sara. Rïn xtinchajij Ismael, pero rkʼë Isaac xtbʼanatäj wä jontir ri ntzjun chawä».