Seis poqonal más

Jehová xtäq Moisés chqä Aarón rchë xkibʼeʼij reʼ che rä ri faraón: «Si ma xtayaʼ ta qʼij che rä ntinamit nbʼä äl, xtintäq pä tábanos chpan atinamit». Ri tábanos ya riʼ mamaʼ taq üs ri yechʼopon. Kan pa mil chkë ri üs riʼ xeʼok pa kachoch ri egipcios, kʼo o majun kirajil. Jontir ri tinamït xnuj chë üs. Pero pa tinamït Gosén, ri akuchï ye kʼo wä ri israelitas, ma xeʼapon ta. Re poqonal reʼ chqä ri xepë chrij riʼ, xa xuʼ chkij ri egipcios xepë wä, pero ma xepë ta chkij ri israelitas. Ri faraón xuʼij reʼ che rä Moisés: «Taʼij che rä Jehová chë keresaj äl ri üs. Chrij riʼ xtinyaʼ qʼij che rä atinamit nbʼä äl». Taq Jehová xuʼän riʼ, ri faraón ma xuʼän ta ri xuʼij. ¿Naquʼ rït chë ri faraón xtjäl na rnaʼoj?

Chrij riʼ, Jehová xuʼij: «Si ri faraón ma nuyaʼ ta qʼij chë ntinamit nbʼä äl, ri kichkop ri egipcios xkeyawäj chqä xkekäm». Chkaʼn qʼij, xbʼanatäj ri xuʼij Jehová. Pero kichkop ri israelitas ma xekäm ta. Tapeʼ ke riʼ, ri faraón ma xnmaj ta tzij.

Rma riʼ Jehová xuʼij che rä Moisés chë ttzolin rkʼë ri faraón y tkʼaqaʼ chaj chkaj. Ri chaj xbʼeʼok achiʼel poqlaj ri xkraj riʼ pa kaqʼiqʼ y xqä pa kiwiʼ jontir ri egipcios. Ri poqlaj riʼ xuʼän chë ryeʼ chqä ri kichkop xeʼel chʼaʼk chkij ri kowan yetoʼon. Pero jmul chik, ri faraón ma xyaʼ ta qʼij chë ri israelitas xebʼä äl.

Jehová xtäq chik jmul Moisés chwäch ri faraón rchë xbʼeruʼij reʼ che rä: «¿Achkë rma kʼa najin na naqʼät ntinamit rchë nbʼä äl? Chwaʼq xtinyaʼ pä saqbʼöch pa rwiʼ atinamit». Chkaʼn qʼij, Jehová xyaʼ pä saqbʼöch, qlojay chqä qʼaqʼ. Majun bʼëy bʼanatajnäq ta riʼ chriʼ Egipto. Xtzʼlaʼ jontir cheʼ chqä rwäch tkoʼn, pero pa tinamït Gosén ma xbʼanatäj ta riʼ. Rma riʼ ri faraón xuʼij reʼ che rä Moisés: «Taʼij che rä Jehová chë ttaneʼ ri saqbʼöch. Chrij riʼ xtinyaʼ qʼij chiwä chë yixbʼä äl». Taq xtaneʼ ri saqbʼöch, jmul chik ri faraón ma xuʼän ta ri xuʼij.

Rma riʼ, Moisés xuʼij reʼ che rä: «Komä, ri tkoʼn ri ma xechaʼ ta chiʼ rma ri saqbʼöch, yë ri mamaʼ taq xiʼl xketjö rchë». Kan pa millón chkë ri xiʼl riʼ xkitäj rwäch cheʼ chqä ri tkoʼn ri ma xechaʼ ta chiʼ rma ri saqbʼöch. Ri faraón xuʼij reʼ che rä Moisés: «Taʼij che rä Jehová chë keresaj äl ri mamaʼ taq xiʼl». Tapeʼ Jehová xeresaj äl, ri faraón ma xrajoʼ ta xnmaj tzij.

Chrij riʼ, Jehová xuʼij reʼ che rä Moisés: «Tayakaʼ aqʼaʼ chkaj». Taq Moisés xuʼän riʼ, kowan qʼequʼn xuʼän jontir. Ri egipcios oxiʼ qʼij majun xekowin ta xkitzʼët, pero ri akuchï ye kʼo wä ri israelitas ma xbʼanatäj ta riʼ.

Ri faraón xuʼij reʼ che rä Moisés: «Rït y ri awinaq ütz yixbʼä. Xa xuʼ ichkop ma tikʼwaj ta äl». Moisés xuʼij: «Nkʼatzin yeqakʼwaj rchë yeqatzüj chwäch ri qaDios». Ri faraón xkatäj ryowal, rma riʼ xuʼij: «¡Jät äl! Si xkatintzʼët chik jmul, xkatinkamsaj».