Ri xbʼeqʼalajin pä chwäch ri xan

Taq xqʼax ri tiempo, Belsasar xbʼeʼok rey pa Babilonia. Kʼo jun aqʼaʼ, xuʼän jun waʼin chkë mil winäq ri kʼo más kiqʼij chpan ri tinamït. Ryä xuʼij chë kesäx pä ri vasos ri yebʼanon rkʼë oro ri xresaj pä Nabucodonosor chpan rtemplo Jehová. Belsasar chqä ri ye kʼo rkʼë xkiksaj ri vasos riʼ chqä xkiyaʼ kiqʼij kityox. Chaq kʼateʼ, chpan ri jay ri akuchï ye kʼo wä, xbʼeqʼalajin pä rqʼaʼ jun winäq ri xtzʼibʼaj jojun tzij chwäch ri xan.

Belsasar kowan xxiʼij riʼ. Xerskʼij ri ajqʼijaʼ y xuʼij reʼ chkë: «Ri xtbʼin chwä achkë yeʼel chë tzij le tzij laʼ xtinbʼän chë xtbʼeʼok ri rox achï ri más rqʼij xtjeʼ chpan Babilonia». Majun ta jun xkowin xbʼanö riʼ. Ya riʼ taq xapon ri reina y xuʼij: «Rbʼanon qa, yë wä Daniel nbʼin che rä Nabucodonosor achkë yeʼel chë tzij rachïkʼ chqä ri ma yeqʼax ta pa rjolon. Ryä xtkowin xkaturtoʼ».

Taq Daniel xapon, ri rey xuʼij reʼ che rä: «Si xkakowin xtaskʼij le tzij laʼ chqä xtaʼij chwä achkë yeʼel chë tzij, xtinyaʼ jun acollar de oro y xtinbʼän chë xkatok ri rox achï ri más rqʼij xtjeʼ chpan Babilonia». Daniel xuʼij: «Ma nwajoʼ ta ya riʼ. Pero xtinbʼij chawä achkë yeʼel chë tzij. Nabucodonosor, ri atat, kowan xnaʼ riʼ, rma riʼ Jehová xkʼüt chwäch chë nkʼatzin ma nunaʼ ta riʼ. Rït ataman achkë xbʼanatäj rkʼë. Tapeʼ ke riʼ, xaqasaj rqʼij Jehová. Xaksaj ri vasos ri ye kʼo wä pa rtemplo rchë xaqüm vino. Rma riʼ, Dios xertzʼibʼaj re tzij reʼ: MENÉ, MENÉ, TEQUEL y PARSÍN. Reʼ ntel chë tzij chë ri medos chqä ri persas xtkichʼäk Babilonia, y rït ma xkatok ta chik rey».

Achiʼel ta majun ta jun nkowin nchʼakon chrij Babilonia, rma kʼo wä mamaʼ taq muros chrij chqä jun mamaʼ raqän yaʼ. Tapeʼ ke riʼ, ri aqʼaʼ riʼ ri medos chqä ri persas xebʼä chrij Babilonia. Ciro, ri rey rchë Persia, xuʼän äl chik jun rbʼey ri yaʼ rchë ri soldados yekowin yebʼä apü kʼa chuchiʼ ri tinamït. Taq xeʼapon, ¡ri puertas yejaqäl qa! Ri soldados xeʼok apü, xkichʼäk ri tinamït chqä xkikamsaj ri rey. Komä yë chik Ciro xqʼatö tzij pa rwiʼ Babilonia.

Ri naʼäy jnaʼ ri najin nuqʼät tzij, Ciro xuʼij: «Jehová xuʼij chwä chë nyäk chik jmul rtemplo chlaʼ Jerusalén. Ri judíos ri nkajoʼ yetoʼon ütz yebʼä». Rma riʼ, ye kʼïy xetzolin pa kitinamit taq qʼaxnäq chik 70 jnaʼ wulan Jerusalén. Ke riʼ rbʼanik xbʼetzʼaqät ri xuʼij Jehová. Chqä Ciro xtzolij äl ri vasos ri yebʼanon rkʼë oro chqä plata, chqä ri nkʼaj chik ri xresaj pä Nabucodonosor chpan ri templo. ¿Xatzʼët achkë rbʼanik xksaj Jehová ri rey Ciro rchë xtoʼ rtinamit?