Daniel nkʼaq chkikojöl leones

Darío aj Media xok chqä rey chlaʼ Babilonia. Ryä xtzʼët chë Daniel más rnaʼoj chkiwäch ri nkʼaj chik. Rma riʼ xyaʼ pa kiwiʼ ri achiʼaʼ ri kʼo más kiqʼij chpan ri tinamït. Re achiʼaʼ reʼ itzel wä nkinaʼ che rä Daniel y nkajoʼ wä nkikamsaj. Ryeʼ kitaman wä chë Daniel nuʼän orar che rä Jehová oxiʼ mul chpan jun qʼij. Rma riʼ xkiʼij reʼ che rä Darío: «Tat rey, tayaʼ jun ley rchë jontir winäq xa xuʼ chawä rït nkiʼän wä orar. Si kʼo jun ma nusmajij ta ri ley riʼ tkʼaq kikʼë ri leones». Darío xqä chwäch ri xkʼoxaj, rma riʼ xyaʼ ri ley riʼ.

Taq Daniel xkʼoxaj ri ley, xbʼä chrachoch, xxkeʼ y xuʼän orar che rä Jehová chwäch jun ventana ri jaqäl. Ri achiʼaʼ ri itzel nkinaʼ che rä xeʼok apü pa rachoch y xkitzʼët chë najin nuʼän orar. Rma riʼ, chanin xebʼä rkʼë Darío rchë xkibʼeʼij reʼ che rä: «Daniel ma najin ta nunmaj atzij. Oxiʼ mul chpan jun qʼij nuʼän orar che rä rDios». Darío jaʼäl wä nutzʼët rnaʼoj Daniel y ma nrajoʼ ta wä chë nkamsäx. Ryä jun qʼij xquʼ rij achkë rbʼanik nutoʼ, pero nixta ryä nkowin wä nujäl jun ley ri ya kʼo chik. Rma riʼ kʼo chë xuʼij chë tkʼaq Daniel chkikojöl ri leones.

Ri aqʼaʼ riʼ, Darío ma xkowin ta xwär rma kowan xquʼ rij Daniel. Nmaqʼaʼ yän xbʼä akuchï ye kʼo wä ri leones, xtzuʼun qa y xuʼij: «¡Daniel! ¿Xaturköl aDios?».

Darío xkʼoxaj rchʼaʼäl Daniel ri xuʼij: «Ri r·ángel Jehová xtzʼapij kichiʼ ri leones, rma riʼ majun xkiʼän chwä». Darío kowan xel rkʼuʼx, rma riʼ xuʼij chë tkesaj pä chriʼ. Daniel ütz rwäch xel pä. Chrij riʼ ri rey xuʼij: «¡Keʼikʼaqaʼ kikʼë ri leones ri achiʼaʼ ri xetzjun chrij Daniel!». Taq xekʼaq qa, ri leones kan chanin xekitäj.

Darío xuʼij reʼ che rä rtinamit: «Majun ta jun tqasan rqʼij rDios Daniel. Ryä xköl chkiwäch ri leones».

¿Y rït? ¿Naʼän orar che rä Jehová ronojel qʼij, achiʼel Daniel?