Jesús ma nqä ta pa rqʼaʼ ri Diablo

Taq Jesús xuʼän yän bautizar riʼ, ri loqʼoläj rchqʼaʼ Dios xkʼwaj äl pa desierto. Majun xtäj ta chkipan 40 qʼij, rma riʼ kowan xpë rnmik. Ya riʼ taq ri Diablo xkanuj rbʼanik rchë Jesús nqä pa rqʼaʼ. Naʼäy xuʼij reʼ che rä: «Si kantzij yït Rkʼajol Dios, taʼij chkë re abʼäj reʼ chë keʼok pan». Pero Jesús xksaj Rchʼaʼäl Dios rchë xuʼij reʼ: «Tzʼibʼatäl qa chë ri winäq ma xa xuʼ ta ri nkitäj nkʼatzin chkë rchë yekʼaseʼ, xa kan nkʼatzin chqä nkikʼoxaj jontir ri nuʼij Jehová».

Chrij riʼ, ri Diablo xkʼwaj äl kʼa pa rwiʼ ri templo, y xuʼij reʼ che rä: «Si kantzij yït Rkʼajol Dios, takʼaqaʼ äl awiʼ, rma tzʼibʼatäl qa chë Dios xkertäq pä r·ángeles rchë ma yakäm ta». Pero Jesús xuʼij: «Chqä tzʼibʼatäl qa reʼ: ‹Ma taʼän ta chë Jehová kʼo jun nuʼän xa xuʼ rchë natzʼët si kantzij yaturtoʼ o manä›».

Pa rkʼisbʼäl, Satanás xkʼüt chwäch Jesús jontir ri qʼatbʼäl taq tzij chqä kibʼeyomal, y xuʼij reʼ che rä: «Xtinyaʼ jontir reʼ chawä si xa rkʼë jmul yaxkeʼ chi nwäch rchë nayaʼ nqʼij». Pero Jesús xuʼij: «¡Jät äl Satanás! Rma tzʼibʼatäl qa chë xa xuʼ Jehová nkʼatzin nayaʼ rqʼij».

Rma riʼ, ri Diablo xbʼä äl y xepë jojun ángeles rchë xkiyaʼ rway Jesús. Chrij riʼ, Jesús xchäp rtzjoxik ri ütz taq rtzjol chrij Rqʼatbʼäl Tzij Dios. Ya riʼ ri samaj xchlaʼëx pä che rä rma Jehová. Ri winäq kan nqä wä chkiwäch ri nukʼüt Jesús. Rma riʼ, xa bʼa akuchï nbʼä wä, ri winäq ye bʼenäq chrij.