Jesús nuchʼajchʼobʼej ri templo

Más o menos pa ikʼ abril rchë ri jnaʼ 30, Jesús xbʼä Jerusalén. Ye kʼïy winäq xebʼä chqä rchë nkiʼän ri Pascua. Rma ri nmaqʼij riʼ, ye kʼïy yekiyaʼ sacrificios pa templo. Ye kʼo jojun nkikʼwaj äl kichkop, ye kʼa jojun chik yekilöqʼ chriʼ Jerusalén.

Taq Jesús xapon pa templo, xtzʼët chë jojun winäq yekikʼayij wä chköp chriʼ. ¡Xa kʼayij wä najin nkiʼän chpan rachoch Jehová! ¿Achkë xuʼän Jesús? Ryä xbʼerkʼamaʼ pä jun koloʼ y rkʼë ya riʼ xeresaj äl ri karneʼl chqä ri wakx chpan ri templo. Chqä xpiskolij kimesas ri yekʼexö päq, rma riʼ jontir ri päq xkar äl. Jesús xuʼij reʼ chkë ri najin yekʼayin palomas: «¡Tiwesaj äl jontir reʼ aweʼ! ¡Ma tiʼän ta kʼaybʼäl che rä rachoch Ntataʼ!».

Ri winäq kan ma nkinmaj ta wä ri xuʼän Jesús. Ri rtzeqelbʼëy xbʼenatäj pä re profecía reʼ chkë chrij ri Mesías: «Kowan xtinloqʼoqʼej rachoch Jehová».

Kayoxiʼ jnaʼ chrij riʼ, pa jnaʼ 33, Jesús xchʼajchʼobʼej chik jmul ri templo. Ryä ma xyaʼ ta qʼij chë ma ütz ta rksaxik nbʼan che rä rachoch Rtataʼ.