Ri Sermón del Monte

Taq xerchaʼ ri 12 rapóstoles, Jesús xxleʼ äl pa rwiʼ ri jyuʼ chqä xbʼä akuchï kimolon wä kiʼ ye kʼïy winäq. Ye kʼo wä aj Galilea, aj Judea, aj Tiro, aj Sidón, aj Siria chqä ri ye kʼo jkʼan chik che rä ri raqän yaʼ Jordán. Jesús xerqʼomaj ri yawaʼiʼ chqä ri ye kʼo pa kiqʼaʼ ri demonios. Chrij riʼ, xtzʼyeʼ qa chqä xtzjon kikʼë ri winäq. Ryä xuʼij chë, si nqajoʼ nq·ok ramigos Dios, kʼo chë nqʼax chqawäch chë nkʼatzin ryä pa qakʼaslemal chqä nkʼatzin nqajoʼ. Pero ma nqkowin ta nqajoʼ Dios si ma yeqajoʼ ta ri winäq. Chqä nkʼatzin ütz qanaʼoj nqaʼän kikʼë jontir.

Jesús xuʼij: «Ma xa xuʼ ta awamigos keʼawajoʼ, nkʼatzin chqä yeʼawajoʼ ri itzel nkinaʼ chawä chqä yakyun rkʼë ronojel awan. Y si kʼo jun kʼo ryowal chawä, jät rkʼë rchë naʼij che rä chë tkyuʼ amak. Achiʼel nawajoʼ rït chë nbʼan awkʼë, ke riʼ tabʼanaʼ kikʼë ri nkʼaj chik».

Jesús chqä xyaʼ re naʼoj reʼ: «Más rqʼij yatok ramigo Jehová chwäch njeʼ kʼïy arajil; rma jun aleqʼon nkowin nuleqʼaj arajil, pero majun ta jun nkowin nbʼanö chë ma yatok ta chik ramigo Jehová. Rma riʼ, ma taquʼ ta chik achkë xtatäj, xtaqüm o xtaksaj. Tatzʼetaʼ ri palomas. Dios ronojel mul nuyaʼ kiway. Tapeʼ kowan xtaquʼ rij ri nkʼatzin chawä, ya riʼ ma xtuʼän ta chë xkakʼaseʼ más. Ma tamestaj ta reʼ: Jehová ronojel mul rtaman achkë nkʼatzin chawä».

Ri winäq ma kikʼoxan ta jun achiʼel Jesús. Ri yekʼwayon bʼey chkiwäch majun bʼëy kikʼutun ta ya riʼ chkiwäch. ¿Achkë rma Jesús kan ütz rbʼanik xerkʼüt ri naʼoj? Rma jontir ri xkʼüt rkʼë Jehová petenäq wä.