Jesús yerchaʼ ri 12 apóstoles

Taq Jesús rkʼë jbʼaʼ jun jnaʼ rkʼë nkʼaj najin nutzjoj Rchʼaʼäl Dios, kʼo jun xkʼatzin xuʼän ri kowan rqʼij. Ryä xkʼatzin xerchaʼ achkë ronojel mul xkejeʼ rkʼë chqä xtkikʼwaj bʼey chwäch ri congregación. Rma riʼ, xbʼä ryonïl pa rwiʼ jun jyuʼ rchë xkʼutuj rtoʼik che rä Jehová. Ryä jun aqʼaʼ xuʼän orar. Chkaʼn qʼij, Jesús xermöl rtzeqelbʼëy y xerchaʼ ye 12 rapóstoles. ¿Ataman rït achkë kibʼiʼ? Kibʼiʼ ya riʼ: Pedro, Andrés, Santiago, Juan, Felipe, Bartolomé, Tomás, Mateo, Santiago rkʼajol Alfeo, Tadeo, Simón y Judas Iscariote.

Ri 12 xebʼä rkʼë Jesús xa bʼa akuchï xbʼä wä. Ryä xkʼüt chkiwäch achkë rbʼanik nkitzjoj Rchʼaʼäl Dios, y pa rkʼisbʼäl, xertäq äl chubʼanik riʼ. Chqä Jehová xyaʼ kichqʼaʼ rchë yekesaj demonios chqä rchë yekiqʼomaj yawaʼiʼ.

Jesús ramigos xertzʼët ri 12 apóstoles chqä xkʼuqbʼaʼ rkʼuʼx chkij. Chkiwäch ri fariseos, ri apóstoles kan majun kitaman ta. Pero Jesús ma ke riʼ ta xertzʼët. Ryä xertjoj rchë nkiʼän rsamaj Jehová. Ryeʼ ronojel mul xkejeʼ wä rkʼë Jesús, achiʼel taq jbʼaʼ nrajoʼ rchë nkamsäx o taq xkʼasöx pä chkikojöl ri kamnaqiʼ. Kan jontir bʼaʼ chkë ryeʼ ye aj Galilea, achiʼel Jesús, chqä kʼo jojun ye kʼlan.

Ri apóstoles xa kʼo qa mak chkij, rma riʼ kʼo mul ma xkiquʼ ta ri xkiʼij, kʼo xkiʼän ri ma kan ta ütz o kan chanin xpë kiyowal. Chqä nkiʼän wä chʼaʼoj chkiwäch xa xuʼ rma nkajoʼ chë yë ryeʼ njeʼ más kiqʼij. Tapeʼ ke riʼ, ryeʼ ütz kinaʼoj chqä nkajoʼ wä Jehová. Yë wä ryeʼ xkekʼwan bʼey chwäch ri congregación cristiana taq Jesús ma kʼo ta chik kikʼë.