Jesús nuʼän kʼïy milagros

Jesús xpë rchë nbʼertzjoj ri Rqʼatbʼäl Tzij Dios. Pero Jehová chqä xyaʼ rchqʼaʼ rchë nuʼän milagros chqä rchë nukʼüt achkë xtuʼän taq xttok Rey. Jesús xa bʼa achkë yabʼil xkowin xqʼomaj. Xa bʼa akuchï nbʼä wä, ri yawaʼiʼ nkikʼutuj kitoʼik che rä, y ryä yerknaj wä jontir. Ryä xuʼän chë yetzuʼun ri ma yetzuʼun ta, chë yekʼoxan ri ma yekʼoxan ta chqä chë yebʼiyïn ri ma yekowin ta yeslon. Kan xa xuʼ nkichäp rtzyaq, ryeʼ yekʼachöj. Jesús chqä xeresaj demonios chkij ri winäq. Xa bʼa akuchï nbʼä wä, ri winäq ye bʼenäq chrij. Ryä ronojel mul xertoʼ ri winäq, yajün taq nrajoʼ wä njeʼ ryonïl.

Kʼo jun qʼij, xkikʼwaj äl jun achï chpan ri jay ri akuchï kʼo wä Jesús. Ri achï riʼ ma nkowin ta wä nslon. Rma kan ye kʼïy winäq ye kʼo, ma xekowin ta xkiksaj apü. Rma riʼ, xkijäq rwiʼ jay rchë xkiqasaj ri achï rkʼë Jesús. Ryä xuʼij reʼ che rä ri achï: «Kakatäj y kabʼiyïn». Taq xbʼiyïn, ri winäq kowan xel kikʼuʼx.

Jun chik qʼij, taq Jesús xapon chpan jun tinamït, 10 achiʼaʼ ri kʼo lepra chkij kan kuw xkiʼij reʼ: «¡Jesús, kojatoʼ!». Ri tiempo riʼ, ri kʼo lepra chkij ma ütz ta wä yejelun kikʼë ri winäq. Y rLey Jehová nuʼij chqä chë ri winäq riʼ nkʼatzin yebʼä pa templo taq ntel ri yabʼil chkij. Rma riʼ, Jesús xuʼij chkë chë kebʼä chlaʼ. Taq ye bʼenäq pa bʼey, xel ri yabʼil chkij. Rma riʼ, jun chkë ryeʼ xbʼertyoxij che rä Jesús chqä xyaʼ rqʼij Dios. Chkë ri 10 achiʼaʼ, xa xuʼ jun xtyoxin.

Kʼo wä jun ixöq ri 12 jnaʼ yawaʼ, y nrajoʼ wä nkʼachöj rma ya xikʼo rkʼuʼx chë ryabʼil. Rma riʼ xtïtzʼ riʼ chkikojöl ri winäq y xchäp rchiʼ rtzyaq Jesús. Taq xuʼän riʼ, xkʼachöj. Jesús xuʼij: «¿Achkë xichapö?». Ri ixöq rxiʼin wä riʼ, pero xjelun apü rkʼë y xuʼij che rä chë yë ryä xbʼanö riʼ. Jesús xkʼuqbʼaʼ rkʼuʼx y xuʼij che rä: «Teʼ, katzolin chawachoch y majun taquʼ ta».

Jairo, jun ri nekʼwan bʼey chpan ri sinagoga, xuʼij reʼ che rä Jesús: «Joʼ chwachoch. Ri nmiʼal kowan yawaʼ». Pero ri qʼopoj xkäm taq Jesús bʼenäq wä pa bʼey. Taq xapon, xtzʼët chë ye kʼïy najin yeʼoqʼ. Jesús xuʼij: «Ma kixoqʼ ta, ri akʼal xa najin nwär». Chrij riʼ, xchäp rqʼaʼ ri akʼal y xuʼij: «Noya, ¡kakatäj!». Ri qʼopoj xkatäj, y Jesús xuʼij chkë rteʼ rtataʼ chë tkiyaʼ rway. ¡Xa xuʼ taquʼ ri xkinaʼ ri teʼej tataʼaj taq xkitzʼët riʼ!