Jesús nutzjoj Rqʼatbʼäl Tzij Dios

Taq xuʼän yän rbautismo, Jesús xchäp rbʼixik reʼ: «Ri Rqʼatbʼäl Tzij Dios ya naqaj chik kʼo pä». Ryä xbʼä Galilea chqä Judea, y rtzeqelbʼëy ye bʼenäq wä rkʼë. Taq Jesús xtzolin Nazaret, ri akuchï xkʼïy wä, xbʼä pa sinagoga, xjäq ri rollo rchë ri profeta Isaías y xskʼij rkʼë nüm rchʼaʼäl re peraj reʼ: «Jehová ryaʼon pä ri loqʼoläj rchqʼaʼ pa nwiʼ rchë ntzjoj ri ütz taq rtzjol». ¿Achkë xrajoʼ xuʼij Jesús? Ri winäq nkajoʼ wä nkitzʼët milagros. Pero ryä ma xa xuʼ ta rma riʼ xyaʼöx pä ri loqʼoläj rchqʼaʼ Dios pa rwiʼ, xa kan rchë chqä nutzjoj ri ütz taq rtzjol chrij Rqʼatbʼäl Tzij Dios. Pa rkʼisbʼäl, Jesús xuʼij reʼ: «Komä xtzʼaqät re profecía reʼ».

Chrij riʼ, Jesús xbʼä chuchiʼ ri mar rchë Galilea. Chriʼ xertzʼët Pedro, Andrés, Santiago chqä Juan, kajiʼ ye ajchapöy kär, y xuʼij reʼ chkë: «Kixampä wkʼë y xtinkʼüt chiwäch achkë rbʼanik yeʼikanuj winäq achiʼel ta yeʼikanuj kär». Ryeʼ xkiyaʼ qa kikʼayij y xebʼä äl rkʼë Jesús chpan jontir Galilea, y xkitzjoj Rqʼatbʼäl Tzij Jehová chkipan sinagogas, pa taq kʼaybʼäl chqä pa taq bʼey. Ye kʼïy winäq xkitzeqelbʼej Jesús y kʼa näj xbʼä wä rtzjol, yajün Siria.

Taq xqʼax ri tiempo, Jesús xyaʼ kichqʼaʼ jojun rtzeqelbʼëy rchë yekiqʼomaj yawaʼiʼ chqä rchë yekesaj demonios chkij ri winäq. Jojun chik xebʼä rkʼë rchë nkibʼetzjoj Rchʼaʼäl Dios chkipan jalajöj tinamït. Kikʼë ryeʼ ye bʼenäq chqä jojun ixoqiʼ, ri nkiʼän wä ri nkʼatzin che rä ryä chqä chkë rtzeqelbʼëy, achiʼel María Magdalena, Juana, Susana chqä nkʼaj chik.

Taq xertjoj yän rtzeqelbʼëy, Jesús xertäq rchë nkibʼetzjoj Rchʼaʼäl Dios. Taq ye bʼenäq wä Galilea, ye kʼïy xkiʼän bautizar kiʼ rchë yeʼok rtzeqelbʼëy Jesús. Kan ye kʼïy nkajoʼ wä nkiʼän riʼ. Rma riʼ ryä xerjnamaj rkʼë jun tkoʼn ri ya ütz chik nesäx rwäch. Ryä xuʼij: «Tibʼanaʼ orar che rä Jehová rchë nutäq pä más mos rchë nkimöl rwäch ri tkoʼn». Chrij riʼ, xerchaʼ 70 rtzeqelbʼëy y pa kakaʼ xertäq rchë nkibʼetzjoj Rqʼatbʼäl Tzij Dios chpan jontir Judea chqä che rä xa bʼa achkë xtkïl. Taq xetzolin rkʼë Jesús, kan kiʼ kikʼuʼx xkitzjoj che rä jontir ri xbʼanatäj kikʼë. Ri Diablo majun ta xkowin xuʼän rchë ma ta xtzjöx Rchʼaʼäl Dios.

Jesús xuʼän jontir ri nkʼatzin rchë rtzeqelbʼëy ma nkiyaʼ ta qa rbʼanik re samaj reʼ taq ryä xttzolin chkaj. Ryä xuʼij reʼ chkë: «Titzjoj ri ütz taq rtzjol chrij Rqʼatbʼäl Tzij Dios chwäch jontir le Rwachʼlew. Tikʼutuʼ Rchʼaʼäl Dios chkiwäch ri winäq chqä keʼibʼanaʼ bautizar».