Jesús nkäm pa Gólgota

Ri sacerdotes ri más kiqʼij xkikʼwaj äl Jesús rkʼë ri gobernador. Pilato xkʼutuj reʼ chkë: «¿Achkë xuʼän re achï reʼ?». Ryeʼ xkiʼij: «¡Ryä nuʼij chë rey!». Pilato xkʼutuj reʼ che rä Jesús: «¿Yït rït kirey ri judíos?». Jesús xuʼij: «Ri Nqʼatbʼäl Tzij ma rchë ta aweʼ».

Chrij riʼ, Pilato xtäq Jesús rkʼë Herodes, ri gobernador pa Galilea, rchë nutzʼët si Jesús ajmak o manä. Rma Herodes xtzʼët chë Jesús majun ta jun itzel rbʼanon, xtzolij äl rkʼë Pilato. Chrij riʼ, Pilato xuʼij reʼ chkë ri winäq: «Herodes chqä rïn majun ta jun mak nqïl chrij re achï reʼ. Rma riʼ xtinsqʼopij äl». Pero ri winäq nkiʼij wä reʼ: «¡Takamsaj! ¡Takamsaj!». Ri soldados xkichʼäy rkʼë tzʼüm o látigo, xkichbʼaj rpaläj chqä kowan xkichʼäy. Xkiyaʼ jun corona chujolon ri bʼanon rkʼë kʼix y xetzeʼen chrij. Ryeʼ nkiʼij wä reʼ che rä: «¡Xbʼä qʼij kirey ri judíos!». Pilato jmul chik xuʼij reʼ chkë ri winäq: «Rïn majun ta mak nwïl chrij re achï reʼ». Pero ryeʼ kan kuw wä nkiʼij: «¡Tabʼajij chwäch ri cheʼ!». Rma riʼ Pilato xyaʼ äl Jesús chkë rchë nkikamsaj.

Chrij riʼ, xkikʼwaj äl Jesús chpan ri jyuʼ Gólgota. Xkibʼajij chwäch jun cheʼ y chriʼ xkitzeqebʼaʼ wä qa. Jesús xuʼij reʼ che rä Jehová: «Tat, takyuʼ kimak rma ma kitaman ta achkë najin nkiʼän». Ri winäq yetzeʼen wä chrij chqä nkiʼij wä reʼ che rä: «¡Si yït Rkʼajol Dios, takoloʼ awiʼ!».

Jun chkë ri alqʼomaʼ ri tzeqäl chuxkïn Jesús xuʼij reʼ che rä: «Kinatäj chawä taq xkatok chpan Aqʼatbʼäl Tzij». Jesús xuʼij reʼ che rä: «Xkajeʼ wkʼë chwäch ri Paraíso». Tqaqʼij qa, oxiʼ horas qʼequʼn xuʼän. Jojun chkë rtzeqelbʼëy xekanaj chunaqaj Jesús, yajün María, ri rteʼ. Ya riʼ taq Jesús xuʼij che rä Juan chë tchajij María kan achiʼel ta rteʼ.

Pa rkʼisbʼäl, Jesús xuʼij: «¡Ya xtzʼaqät jontir!». Ryä xqasaj qa rjolon chqä xkäm. Chrij riʼ, xpë jun mamaʼ slonel. Ri mamaʼ cortina ri kʼo pa templo ri rjachon ri Santo rkʼë ri Santísimo, xretzetäj pa kaʼiʼ. Jun ri kʼwayon bʼey chkiwäch ri soldados xuʼij: «Le achï laʼ kan Rkʼajol wä Dios».