«¡Nixta ntaman achkë riʼ Jesús!»

Taq kʼa najin na wä nkiʼän ri rkʼisbʼäl waʼin, Jesús xuʼij reʼ chkë rapóstoles: «Jontir rïx xkiniyaʼ qa re aqʼaʼ reʼ». Pedro xuʼij: «Rïn manä. Tapeʼ le nkʼaj chik xkatkiyaʼ qa, rïn majun bʼëy xkatinyaʼ ta qa». Pero Jesús xuʼij reʼ che rä Pedro: «Taq majanä tskʼin jun äkʼ, rït oxiʼ mul xtaʼij chë ma ataman ta nwäch».

Taq xekʼwäx Jesús chrachoch Caifás, kan jontir bʼaʼ chkë rapóstoles xeʼanmäj yän äl. Pero kaʼiʼ chkë ryeʼ ye bʼenäq wä chkikojöl ri winäq. Jun chkë riʼ ya riʼ Pedro. Ryä xok apü chuchiʼ rachoch Caifás y xjelun apü chuchiʼ jun qʼaqʼ rchë numëqʼ riʼ. Jun ixöq ri nsamäj wä chriʼ xtzʼët Pedro y xuʼij: «¡Rïn ntaman awäch! ¡Rït yatzeqeteʼ wä chrij Jesús!».

Pedro xuʼij: «Ya riʼ ma tzij ta. Achkë na laʼ naʼij», y xbʼä äl chuchiʼ ri jay. Chrij riʼ, jun chik ixöq ri nsamäj chqä chriʼ, xtzʼët Pedro y xuʼij reʼ chkë ri nkʼaj chik: «¡Re achï reʼ ntzeqeteʼ wä chrij Jesús!». Pedro xuʼij: «¡Nixta ntaman achkë riʼ Jesús!». Jun chik achï xuʼij: «Rït yït kichiʼil. Kan nqʼalajin, rma yatzjon achiʼel ri galileos, achiʼel Jesús». Pero Pedro xuʼij: «Chöj nbʼij chiwä chë ma ntaman ta rwäch».

Chrij riʼ, xskʼin jun äkʼ. Pedro xtzʼët chë Jesús najin wä nutzuʼ pä, y xbʼenatäj pä che rä ri xuʼij ryä che rä. Rma riʼ, xel äl chqä kowan xoqʼ.

Ri aqʼaʼ riʼ, ri Sanedrín, ri tribunal ri más rqʼij chkiwäch ri judíos, xkimöl kiʼ pa rachoch Caifás rchë nkiqʼät tzij pa rwiʼ Jesús. Ryeʼ nkajoʼ wä nkikamsaj Jesús, pero majun wä mak nkïl chrij. Pa rkʼisbʼäl, Caifás xkʼutuj reʼ che rä Jesús: «¿Yït rït Rkʼajol Dios?». Jesús xuʼij: «Jaʼ, yïn riʼ». Caifás xuʼij: «Ma nkʼatzin ta chik nqatamaj más. ¡Ryä najin nuyöqʼ Dios!». Rma riʼ, jontir xkiʼij: «Re achï reʼ kʼo chë nkamsäx». Xkichbʼaj chqä xkiyaʼ qʼaʼ chupaläj, xkitzʼapij rnaqʼ rwäch, xkichʼäy y xkiʼij reʼ che rä: «¡Si yït profeta, taʼij chqë achkë xachʼeyö!».

Taq xsaqarsan qʼanäj, xekʼwäx chik jmul Jesús chwäch ri Sanedrín y xkikʼutuj reʼ che rä: «¿Yït rït Rkʼajol Dios?». Jesús xuʼij: «Jaʼ. Kan rïx najin yixbʼin riʼ». Rma riʼ xkiʼij chë najin nuyöqʼ Dios chqä xkikʼwaj äl pa rpalacio Poncio Pilato, jun gobernador aj Roma. ¿Achkë xbʼanatäj chrij riʼ? Tqatzʼetaʼ.